அண்டை அயல்

ஸ்டீவ் ஜாப்ஸ் எனும் கலைஞன்.

2011-10-06T22:07:00.002+05:30

நேற்றைக்கு ஒரு மால்-இல் சுமார் 3 மணிநேரம் அட்டைக்கணினிகளைச் சோதித்துக்கொண்டிருந்தேன். 13 ஆயிரம் ரூபாவில் துவங்கி 40 வரை விலை. ஒரு மென்பொருளைச் சோதனை செய்ய ஆண்றாய்ட் அட்டைவேண்டும் அதற்காகத்தான். புதிதாக வந்திருக்கும் i-ball ஸ்லைட் துவங்கி சாம்சங்கின் காலாக்ஸி பேட் வரை இடைப்பட்ட நிலையில் வ்யூசானிக், மோட்டரோலா, ஆசர், ஹெச்டிஸி, ஆர்சோஸ் என்று பலவகை அட்டைகள் உள்ளன. வேறு வேறு ஆண்றாய்ட் பதிப்புகள், வேறுவேறு திரை அளவுகள் என்று கலந்துகட்டி நமக்குத் தேர்வு செய்ய பலவிதமான வாய்ப்புகள். ஆனால் ஒவ்வொன்றிலும் ஒவ்வொரு குறை. சிலவற்றில் தன்வயப்படுத்திய இடைமுகங்கள். சிலவற்றில் வெளிஉலகத்துடன் பேச போதுமான துறைகள் இல்லாமை. மோசமான தொடுஇசைவு, குறைவான சில்லுசக்தி, போதாத ஞாபகக் கலன், சேமிப்புத்தளம் என ஒவ்வொன்றிலும் வேறுவேறு விதமான குறைபாடு. ஒன்றைப்பார்த்தால் இன்னொன்று இல்லை. சாம்சுங்கின் காலாக்ஸி தனிரகம். இந்தக்கூடத்திலிருந்து சற்றே மேம்பட்டதரத்தில் ஏறக்குறைய தேவையான அனைத்தையும் கொண்டுள்ளது. விலைஅதிகமானதும் இதுதான். ஆண்றாய்ட் அட்டைகளில் சாம்சுங்தான் சிறப்பு. ஆனால் ஒரு புது நிரலை/ செயலியை இருப்பதிலேயே சிறந்த கட்டமைப்பும் செயல்திறனும் கொண்ட ஒரு கருவியில் சோதிப்பது தவறானது. பயனர்களிடம் ஆகச்சிறந்த கருவியோ செயல்தளமோ இருக்கத்தேவையில்லை. சந்தையிலிருக்கும் மீச்சிறு வசதிகளைக்கொண்ட கருவியிலேயே சோதிக்கவேண்டும். அதில் நமது செயலி சரியாக இயங்கினால் மேலதிக வசதியுள்ள விலைஅதிகமான கருவியில் சரியாகவே இயங்கும். என்ன செய்யவேண்டும் என்று தீர்மானித்துக்கொண்டு திரும்பினேன். அடுத்த வரிசையில் சிலசிறுவர்கள் சிரித்து விளையாடிக்கொண்டிருந்தார்கள். அது ஆப்பிள் கணினிகளின் வரிசை. மூன்று அட்டைகள் இருந்தன. ஐந்தாறு சிறுவர்/சிறுமியர் இரண்டை ஆக்கிரமித்துக்கொண்டு ஒரே குதூகலம். மூன்றாவதை மற்றவர்களுக்கு முன்னால் பாய்ந்து கைப்பற்றினேன். ஜென் ட்ரா என்று மிகமிக எளிமையான வரைசெயலி அதில் இருக்கிறது. ஆட்காட்டி விரலால் எளிதாக விரைவாக வரையலாம். இரண்டுமூன்று உருவங்களை வரையத்தொடங்கினேன். இரண்டு சிறுவர்கள் வந்துவிட்டார்கள். 'ஷோ மி அங்கிள்' என்று. உலகின் ஆகச்சிறந்த நுட்பங்களைக்கொண்டு வடிவமைக்கப்பட்ட குழந்தைகள் கருவி அது. ஸ்டீவ் ஜாப்ஸ் எனும் கலைஞன் மற்றவர்களுக்கு அளித்த கொடை. இன்றைய தொழில்நுட்பத்தில் இருக்கும் அழகும் உள்ளமைதியும் செயல்திறனும் சீர்மையும் எந்தக் கவிதையிலும் கலைப்பொருளிலும் என்னால் காணமுடிவதில்லை. அதை கணினிகளில் செயலாக்கி அனைவருக்கும் விட்டுச் சென்ற ஸ்டீவ், goodbye.

1. ஸ்டீவ் ஜாப்ஸ் பற்றி வெங்கட்

2. ஸ்டீவ் ஜாப்ஸ் பற்றி பெயரிலி

சிய்யாங்கு

2011-10-04T14:03:00.000+05:30

இந்த இனிப்புக்குப் பெயர் எங்கள் வீட்டில் சிய்யாங்கு. உண்மையில் என்ன பெயரோ நான் அறியேன்.

(அ) தேவையான பொருட்கள்:
------------------------------------
1. கோதுமை மாவு - 1 கப்
2. வாழைப்பழம் - 1 (பெரிய்ய்யது) அல்லது 2 (நடுத்தரமானது)
3. வெல்லம் - 1/2 கப்
4. சிறிது வெண்ணெய் - ஒரு பெரு நெல்லிக்காய் அளவு
5. எலக்காய் - 1
6. நல்லெண்ணெய் /கடலை எண்ணெய் - பொரிக்கத் தேவையான அளவு.

(ஆ) செய்முறை:

கோதுமை மாவு, வாழைப்பழம், பொடித்தவெல்லம், வெண்ணெய் இவற்றை நன்கு பிசைந்து கொள்ளவும்.
நீர் விடக்கூடாது. பழம் நன்றாகக் கனிந்ததாக இருக்கவேண்டும். அப்பொழுதுதான் நன்றாக பிசையவரும். தோலில் கருப்புப்புள்ளிகள் வந்த பழங்கள் போதுமான அளவு கனிந்து இருக்கும்.
கடைசியில் ஏலப்பொடியை போட்டு பிசைந்து கொள்ளவும்.
எந்தப்பதத்தில் பிசைவது? வழியாத அளவு கெட்டியாக ஆனால் நன்றாக மெதுமெதுவென்று இருக்கும்படி.
எண்ணெய் காய்ந்தபிறகு சிறுதீயாக வைத்து உருண்டையாக போட்டு பொரித்து எடுக்கவும்.

(இ)
1. பழம் கனிந்து இருப்பது மிகமுக்கியம். ரோபஸ்டா/மோரீஸ் போன்ற ஹைபிரீட் வகைகளைப் பயன்படுத்தவும். அவை விரைவில் கனிந்து விடும். நம் நாட்டுப்பழங்க்அள் பூவன், ரஸ்தாளி போன்றவற்றில் மாவுச்சத்து அடர்வு அதிகம். கனிய நாளாகும். முழுவதாகவும் ஒரேயடியாக கனியாது.
2. கோதுமைமாவுதான். மைதா ஆகாது.
3. வெல்லத்திலும், பழத்திலும் நீரிருப்பதால் நீர்சேர்க்கத்தேவையில்லை. மிகவும் கட்டியாக இருந்தால் சற்றே தெளிக்கவும். ஊற்றக்கூடாது.
4. நம்நாட்டுப் பலகாரங்கள் செய்யும்போது நல்லெண்ணெய், கடலை எண்ணெய் பயன்படுத்துங்கள். வடிகட்டினவை (பில்டர்ட்) மட்டுமே. ரிபைண்ட்டு வகை அல்ல. மணமே இல்லாத சன்பிளவர், பாமாயில் போன்றவற்றைப் பயன்படுத்தாதீர்கள். ந.எ,க.எ எல்லாம் கெட்ட எண்ணெய்கள் அல்ல. எந்த டாக்டர் சொன்னாலும் நம்பாதீர்கள். தற்போதைய ஆராய்ச்சிமுடிவுகள் சன்பிளவர்தான் சிறந்தது என்றெல்லாம் சொல்லவில்லை.

பிகு. ஆமா நான் செய்ததுதான்.

அன்னா ஹாஸ்யரே

2011-08-22T20:39:00.004+05:30

" எம்முடன் பேசவரும் காபினட் அமைச்சர் குழந்தை போல தவழ்ந்துதான் வரவேண்டும் என்ற நம் ஆதார கோரிக்கையையும் அரசு ஏற்றது என்பதை காந்தியப் பணிவுடன் தெரிவித்துக்கொள்கிறோம்" .

pink mountain, green godess

2011-06-29T11:05:00.008+05:30

PinkMountainYellowCloud

GoddessOfTheGreenLight

2010 இயல்பியல் நோபல் பரிசு (physics nobel) - கரியின் அடுக்குகள்-1

2010-10-06T01:29:00.023+05:30

இந்த வருட இயல்பியல் நோபல் - கரியின் அடுக்குகள்

================================================

இந்த வருட இயல்பியல் நோபல் பரிசைப் பார்த்தவுடன் எனக்கு முதலில் நினைவுக்கு வந்தது என் சிறுவயது கிராம நினைவுகள்தான். எங்கள் ஊரில் காக்கைப்பொன் என்று அழைக்கப்படும் மைக்கா ஆங்காங்கே கிடைக்கும். கருப்பு நிறமாக கற்களுக்கு இடையில் பாளம் பாளமாக கிடைக்கும். சிறுவர்கள் நாங்கள் அதை வயல்வெளிகளில் தேடிச்சென்று தோண்டி எடுத்து விளையாடுவோம். காக்கைப் பொன்னின் முக்கிய பண்புகளில் ஒன்று அது பாளம் பாளமாக இருப்பது. படம் 1 ஐப் பாருங்கள். கட்டி போல இருந்தாலும் அதை நகத்தாலோ, குட்டி பிளேடாலோ மெல்லக் கீறினால் சன்னமான தகடுகளாக அதை உரிப்பதுபோல பிளந்து எடுத்து விடலாம். யார் மிகச்சன்னமான ஒரு காக்கைப்பொன் தகட்டை பிளப்பார்கள் என்பது எங்கள் அரை டிரவுசர் நண்பர்களுக்குள் அடிக்கடி நடக்கும் போட்டி. இந்தப் பிளப்பது (cleaving) என்பது மிக நுணுக்கமாக நடப்பது. அதாவது ஒரு உளியை வைத்து மரத்தைப் பிளப்பது போல அல்ல இது. இது அணுவளவில் நுணுக்கமானது. அதாவது பிளந்த பாளங்களின் இரு பரப்புகளும் ஒன்றுக்கொன்று சீரான அமைப்புடன் அணுவளவில் பிளக்குமுன் பொருந்தி இருந்தவை. இதைப்பற்றி பின்னால் விளக்கலாம்.
இயற்கையில் தனிமங்களும் தனிமங்களால் ஆன கூட்டுப்பொருள்களும் பலசமயம் ஒரு சீரான அணு அமைப்புடன் கட்டப்பட்டு இருக்கின்றன. இவற்றை படிகங்கள் (க்ரிஸ்டல், crystal) என அழைக்கிறோம். படிகங்கள் என்றால் அவற்றின் அணு அல்லது மூலக்கூறு அமைப்பு ஒரு சீரான முறையில் முப்பரிமாணத்தில் கட்டப்பட்டது என்று பொருள். உப்பு. சர்க்கரை போன்ற அன்றாடப் பொருள்களையும் படிகமாக்கலாம். வைரம், நீலம் போன்ற விலைஅதிகம் கொண்ட கற்களும் படிகங்கள்தான் . இவை இயற்கையாக கிடைக்கிறன. வேண்டுமானால் ஆய்வுக்கூடங்களிலும் செய்துகொள்ளலாம். அது தவிர சாதாரண அலுமினியம், செம்பு, முதல் தங்கம் போன்ற உலோகங்களையும் படிகமாக்கலாம். இவற்றில் கவனிக்க வேண்டிய விடயம் இவை அனைத்தும் முப்பரிமாண படிகங்களாகும். (சில படங்களைப் பாருங்கள்)

ஆனால் காக்கைப்பொன்போன்ற படிகங்கள் முப்பரிமாணமாகத் தோன்றினாலும் அவற்றின் அடுக்குகளுக்கு இடையேயான பிணைப்புகள் அவ்வளவு உறுதியானவை அல்ல. அதனால்தான் அவ்வடுக்குகளை எளிதில் தனித்தனியாக பிளந்து எடுத்துவிட முடிகிறது. ஒரு எடுத்துக்காட்டாக கூறவேண்டுமானால் (அடுப்புக்) கரியை கூறலாம். கரி என்பது முக்கியமாக இரு படிக வடிவங்களில் இயற்கையில் கிடைக்கிறது. ஒன்று வைரப் படிகங்களாக. வைரம் ஒரு கடினமான, உறுதியான (இவை இரண்டும் வேறுவேறு பண்புகள்) பொருள் என்பது நமக்குத் தெரியும். அது வெறும் கரிதான். அதேபோல் கரியின் இயற்கையான மற்றொரு வடிவம் கிராபைட் எனப்படுகிறது. இது ஒரு பாளங்களால் ஆன வடிவமாகும். அதாவது இரண்டு கரிப்பாளங்களுக்கு நடுவில் பிணைப்பு வலிமை இல்லை. நாம் பாளங்கள்,அடுக்குகள்,தளங்கள் என்று பலவகையிலும் குறிப்பிடுவது ஒரே பொருளில்தான். அடுக்கு என்பது சாதாரண வழக்குச் சொல் என்றும் பாளம் என்பதை லேயர் (layer ) எனும் ஆங்கிலச் சொல்லுக்கு இணையாகவும் தளம் என்பதை சர்பேஸ் எனும் கணித வழக்கிலும் (surface ) கூறலாம். அனைத்தும் அணு அடுக்குகளையே இக்கட்டுரையில் குறிக்கும் என்பதை நினைவில் கொள்வோம். தளம்,அடுக்கு,பாளம் என மாற்றி மாற்றி பாவித்தாலும் அவை குறிப்பது இனிமேல் கரிஅணுக்களால் ஆன ஒரு இருபரிமாண தளத்தையே.

கரியின் கிராபைட் படிக வடிவத்தைப்பற்றிப்பேசிக்கொண்டிருந்தோம். அது கரி அணுத் தளங்களால் ஆன ஒரு அமைப்பு. ஒருதளத்திற்க்கும் அடுத்த தளத்திற்கும் இடையில் வலிமையற்ற அணுப்பிணைப்பான வான்- டெர்- வால்ஸ் பிணைப்பு மட்டுமே உண்டு. அதனால் அடுக்கிவைக்கப்பட்ட சீட்டுக்கட்டை நகர்த்துவதுபோல ஒரு அடுக்கை இன்னொன்றின் மீது எந்த ஒரு எதிர்ப்பும் இல்லாமல் நகர்த்த முடியும். இதனால் இவ்வகையான கிராபைட் ஒரு திட உயவுப் பொருளாக பயன்படுத்தப் படுகிறது. எண்ணைக்கு பதிலாக பற்சக்கரங்கள், பேரிங்குகள் போன்றவற்றில் சில நேரங்களில் கிராபைட்டையும், மாலிப்டினம் டை சல்பைடு எனும் இன்னொரு அடுக்கு படிகத்தையும் பயன்படுத்தலாம்.

இவ் வருட நொபல் பரிசு இந்த கரிப்பாளமான கிராபைட்டின் ஒரு அடுக்கை தனியாக பிரித்தெடுத்து அதன் பண்புகளை பயின்றதற்காக வழங்கப்பட்டிருக்கிறது. ஆன்றே கைம், கொன்ஸ்டன்டின் நோவோசெலாஃப் என்ற இரு இயல்பியலாளர்கள் இப்பரிசைப் பெறுகிறார்கள். இருவரும் இஙிலாந்திலுள்ள மான்செஸ்டர் பல்கலையில் நடத்திய ஆய்வுகள் இதற்கு அடித்தளமாகின.

கரி கடந்த சில வருடங்களாகவே அறிவியலில் அதிகம் ஆய்வுநடத்தும் தனிமமாக மாறி உள்ளது. நானோ குழாய்களாகவும், உருளைகளாகவும், புல்லரீன் கோளங்களாகவும் பலவடிவங்களில் கரியின் நிலைத்தன்மை

கண்டுபிடிக்கப்பட்டுள்லது. ஆனால் இந்த ஒற்றை அணு தடிமனே கொண்ட ஒரு கரிப்பாளமாக தனியே பிரித்தெடுத்து அதன் பண்புகளைக்கற்று அதனை ஒரு நிலையான கரிவடிவமாக யாரும் ஆய்வு செய்யவில்லை. அப்படிச் செய்த கைம் மற்றும் கொன்ஸ்டண்டின் ஒரு முக்கியமான புள்ளிக்கு படிகங்களைப்பற்றிய அறிவை நகர்த்தி உள்ளனர். இந்த நிலையான கரி வடிவம் கிராபைட்டின் ஒரு அடுக்குத்தான் என்பதால் இதனை கிராபீன் என்று அழைக்கிறார்கள். கிராபீனின் மிக ஆச்சரியகரமான இயல்பியல் பண்புகளைப்பற்றி நாளை பார்ப்போம்.

ஞாமரபு -3

2010-10-03T15:35:00.005+05:30

ஞாமரபு -3

ஞாமரபு-2

2010-10-02T00:34:00.003+05:30

ஞாமரபு-2

ஞாமரபு -1

2010-09-26T22:40:00.003+05:30

ஞாமரபு -1

அடையாளம், அரசியல்

2010-08-30T16:51:00.002+05:30

அடையாள அரசியல்
-----------------------------

இந்த ஆரிய, திராவிட,தமிழ், சமஸ்கிருத சண்டைகளை ஓயாமல் நடப்பதால் இங்கே சில முக்கியக் கூறுகளைத் தொகுத்துக் கொள்கிறேன்.

அரசியல் நிலைபாடுகள்:
-------------------------
இந்துத்துவவாதிகள்:
1. சிந்து சமவெளி: சமஸ்கிருத நாகரிகம்
2. ஆரியர், திராவிடர் ஒரே இனம்;பிரிவினையே இல்லை
3. இந்து என்பது ஒரு தனி தேசியம்
4. தமிழ் சமஸ்கிருதம் இவை இரண்டும் (மற்ற இந்திய மொழிகளோடு) ஒரே மொழிக்குடும்பத்தைச் சேர்ந்தவை.

தமிழ்த்தேசியவாதிகள்:
1. சிந்து சமவெளி: திராவிட அல்லது தமிழ் நாகரிகம்;
2. ஆரியர்-திராவிட இவை வேறு வேறு இனங்கள்;
3. தமிழ் என்பது தனி தேசியம்;
4. தமிழ்-சமஸ்கிருதம் இவை வேறு மொழிக்குடும்பங்களைச் சேர்ந்த மொழிகள்.

அறிவியல் (தற்போதைய) நிலைபாடு:
-------------------------------------------
1. மொழி,இடம்(நிலம்)சார்ந்த அடையாளங்கள் பருண்மையானவை.இனம் சார்ந்த அடையாளங்களுக்கு அறிவியல் ஆதரவு இல்லை.மத அடையாளம் பருண்மையானதல்ல.
2. திராவிட எனும் அடையாளம் மொழிக்குடும்பம் சார்ந்ததெனில் பருண்மையானது.இனம் சார்ந்ததெனில் பொய்யானது.ஆரியர் அடையாளமும் அவ்வாறே.
3. படையெடுத்துவந்து ஆரிய இனம் திராவிட இனத்தை வென்றது என்பதற்கான ஆதாரம் எதையும் காணோம்.
4. ப்ரோடோ-திராவிட மொழிக் கட்டு இல்லாமல் தமிழை மட்டும் வைத்து சிந்து நாகரிகத்தை அறியமுடியாது. அங்கு வாழ்ந்தவர் தமிழர் என்பற்கும் முடிபான ஆதாரம் இல்லை.
5. திராவிட மொழிகள் அனைத்திற்கும் (மலையாளம் தவிர்த்து) தனித்த பழமையான பண்பாட்டு வரலாறு உண்டு. தனி அடையாளமும் உண்டு.
6. சிந்து சமவெளி நாகரிகம்: திராவிட நாகரிகமாக இருக்கலாம்.சமஸ்கிருதம் ,தமிழ் வேற்று மொழிக்குடும்பங்கள்.

-

ரோபோட் பாடல் - kraftwerk

2010-07-31T19:11:00.004+05:30

எல்லோரும் புதுப்பாடல்களில் கதிகலங்கி இருக்கும் போது பழைய நினைவுகள் வருவதைத் தவிர்க்க இயலவில்லை.
1977 ஆம் ஆண்டு வெளிவந்த 'வீ ஆர் த ரோபோட்ஸ்'. (சுட்டியில் இருப்பது ஆங்கில வடிவம்)
அதன் ஜெர்மன் வடிவம் இங்கே

அப்போதைய மேற்கு ஜெர்மனியின் டூஸொல்டோர்ஃப் பைச் சார்ந்த 'க்ராஃப்ட் வெர்க்' (kraftwerk) எனும் குழுவினரின் இந்தப்பாடல் சில ஆண்டுகள் கழித்து பொறியியல் கற்க பெங்களூர் வந்த எங்கள் வருட மாணவர்களுக்கு ஒரு தேசிய கீதமாகவே இருந்தது. எங்கள் கல்விச்சாலையின் இசை அறையில் ஒரு பாடலுக்கு ஐந்து பைசா கொடுத்து ஒரு தடிப் புத்தகத்தில் பதித்து வைத்துவிட்டு சோபாக்களில் நீட்டிச் சாய்ந்து கொண்டு நண்பர்களுடன் இரவு உணவுக்குப் பின் நள்ளிரவுவரை கேட்டு மகிழ்ந்த பாடல்களில் பல. இப்பாடலைப் போலவே இன்னொரு பாடலான 'மாடல்' எனக்கு பிடித்த பாடல். மாடல் கீழே.

க்ராஃப்ட் வெர்க் இசையாக்கம் செய்த அனைத்துப் பாடல்களும் அநேகமாக முழுவதும் செயற்கையாக வனையப்பட்ட இசையாகும். அனைத்து இசைத்துணுக்குகளும் இலந்திர நுணுக்கங்களால் அலைமாற்றப்பட்டவை. அந்த விதத்தில் இலந்திர இசைக்கு முன்னோடிக்குழு க்ராப்ட் வெர்க் தான்.

--

காணாமல் போன கவிதைக் கணம்.

2010-07-29T15:49:00.008+05:30

காணாமல் போன கவிதைக் கணம்.
--------------------------
மூன்று நாட்களுக்கு முன்பு (9/12/2003 இல் ராயர் காபி கிளப் எனும் இணையக்குழுமத்தில் எழுதியது) பிச்சமூர்த்தியின் கவிதைத் தொகுப்பு ஒன்றை வாங்கினேன். சாகித்திய அகாடமி வெளியீடு. நேற்று இரவுதான் அதைப் படிக்கத் துவங்கினேன். முதலில் தேடியது பூக்காரி எனும் கவிதையைத்தான். அதற்குக் காரணம் உண்டு; பின்னால் சொல்கிறேன். படித்த உடனேயே யாரையாவது முகத்தில் நாலு குத்து விடவேண்டும் என்று தோன்றியது. அது யாரை என்று கண்டறிய நண்பர்கள் உதவினால் கடப்பாடுடன் இருப்பேன்.

நான் பள்ளிச் சிறுவனாக எங்கள் கிராமத்து LLA நூலகத்தில் குடைந்து குடைந்து படித்த பல பொக்கிஷங்களில் பிச்சமூர்த்தியின் காட்டுவாத்து, வழித்துணை தொகுப்புகள் தான் எனக்கு 'புதுக்கவிதை' யை அறிமுகப்படுத்தின. இது சுமார் முப்பது வருடம் பழையகதை. அப்போது புதுக்கவிதை புதுக்கவிதையாகத்தான் இருந்தது. நாற்றங்கால் தொகுதி இன்னும் வரவில்லை (இப்போது எங்கேயாவது கிடைக்குமா இது?). வானம்பாடிகள் தத்தம் முட்டைக்குள்ளே இருந்தார்கள். முத்து காமிக்ஸ் மாயாவியை
அப்போதுதான் உலவவிட்டிருந்தார்கள். கோகுலம் வந்து ஒரிருவருடம்போல் ஆகியிருந்தது. சுஜாதா " என்றான் அப்பாஸ், என்றான் இலியாஸ்" என்று அப்போதைய தினமணிக்கதிரில் பறந்து கொண்டிருந்தார். பேசும் படத்தில் ஜெயந்தி இருபக்கங்களில் சுடச்சுட போஸ் கொடுத்துக் கொண்டிருந்தார். சிவாஜி சில படு மோசமான படங்களுக்கு அப்புறம் "மன்னனின் கௌரவம்ம்ம்..." என்று அசத்திக் கொண்டிருந்தார். இந்திரா இன்னும் மூன்றுநான்கு வருடங்களுக்காகவாவது ஜனநாயகவாதியாகத் தான் இருப்பதற்கு தயாராக இருந்தார். ரயில்கள் எல்லாம் நேரத்துக்கு செல்லாமல் இருந்தன. சாமியார்கள் சாமியார்களாகவும் அரசியல்வாதிகள் அரசியல்வாதிகளாகவும் அவர்களுக்குள்ளே குழப்பமே இல்லாத பொற்காலம் அது. அப்போதுதான் எனக்கு புதுக்கவிதையில் கவிதைக்கணம் நிகழ்ந்துவிட்டது.

" வானெங்கும் எஃகிறகு
தெருவெங்கும் பிணமலை "

என்று படித்து, எஃகிறகு என்பது புரியாமல் மீண்டும் ஒரு முறை படித்தேன். அட! உடனே அந்த தொகுப்புகளை வீட்டிற்கு issue செய்து எடுத்து வந்து விட்டேன். அப்போதெல்லாம் நூலகச்சந்தா ஒரு நூலுக்கு 2 ரூபாய். அப்பா எங்கள் கிராமத்து "பெரிய" பள்ளிக்கூடத்தில்(உயர் பள்ளி. துவக்கப்பள்ளிக்கு "சின்னப் பள்ளிக்கூடம்") ஆசிரியராக இருந்ததால் நூலகப் பொறுப்பாளர் தொந்தரவு தாங்காமல் 5 சந்தா எடுத்து வைத்திருந்தார். நான் ஏதோ ராஜா வீட்டுப்பிள்ளை மாதிரி பாவித்து நூல்களைக் கொண்டுவருவேன். வீட்டுக்கு வந்து என் தம்பியை (ஆறாம் வகுப்பு) கூப்பிட்டு எஃகிறகு என்றால் என்ன என்று கவிதையை விளக்கித் தீர்த்து விட்டேன். அவன் விட்டால் போதும் என்று நிசமான சிறகிருக்கும் கோழிகளுக்கு கறையான் பிடிக்க ஓடிவிட்டான்.
ஒரு சிறுவனின் இப்படிப்பட்ட மகத்தான கவிதைக்கணம் நேற்று தொலைந்து போய்விட்டது. நான் வாங்கிய சாகித்திய அகாடமிப் பதிப்பில் இது

"வானெங்கும் பிளேனிறகு
தெருவெங்கும் பிணமலை " என்றிருக்கிறது.

இக் கொடூரமான பாடபேதம் யாரால் நிகழ்ந்தது? அது சாகித்திய அகாடமியோ அல்லது பிச்சமூர்த்தியோ ஆனாலும் சரி. நண்பர்கள் கண்டு பிடிக்க உதவினால் ஏதேனும் ஒரு பிறவியில் இதற்குப் பழி வாங்காமல் இருக்க மாட்டேன். இல்லை நான்தான் தற்போதைய ஃபேஷன்படி மாந்த்ரீக யதார்த்தத்தில் மாட்டி ஏதாவது உளறுகிறேனா?
------------------
மேலே இருப்பது 2003இல் அப்போதைய ராயர் காப்பி கிளப்பில் எழுதியது. இதற்கு மறுமொழியாக இரா.முருகன் தன்னிடம் இருக்கும் எழுத்து பிரசுரம் வெளியிட்ட 1975ம் வருட பதிப்பிலும் பிளேனிறகு என்றுதான் இருக்கிறது என்று கூறியிருந்தார்.
அதன் பிறகு இரு ஆண்டுகளில் கழித்து சென்னைப்புத்தகக் காட்சியில் நான் படித்த பதிப்பின் பிரதியைக் கண்டெடுத்தேன். அதில் எஃகிறகு என்றே இருக்கிறது.

எழுத்து பிரசுரம் 1964 இல் வெளியிட்ட பதிப்பு இது. பூக்காரி முழுக்கவிதையையும் அப்போது இருந்தபடி ஒளி வருடி கீழே தந்திருக்கிறேன்.

தற்போது கிடைக்கும் சாகத்திய அகதமி பதிப்பு இது. 2000 ஆம் ஆண்டுப் பதிப்பு. தொகுத்தவர் ஞானக்கூத்தன். இந்தப் பதிப்பில் ஞானக்கூத்தனின் மிக நீண்ட முன்னுரையும், செல்லப்பாவின் மிகநீண்ட பின்னுரையும் (85இல் வெளிவந்த பி.மூர்த்தியின் தொகுப்பின் அணிந்துரை) இருக்கிறது.

பிச்சமூர்த்தியின் கவிதைகளை செம்பதிப்பாக யாராவது கொணரும்போது கவனம் கொள்ளலாம். இந்த மாற்றம் பி.மூர்த்தியே செய்ததா அல்லது இரு வேறு விதமாக அவரே எழுதி சிசுசெல்லப்பாவிடம் கொடுத்தாரா என்பதெல்லாம் கண்டுபிடிக்க முடியாது. இருவரும் இப்போது இல்லை.

---

சாம்பற் கோட்டை

2010-06-10T19:37:00.003+05:30

சாம்பற் கோட்டையின் சரிவு.

தஞ்சைப் பெரியகோயிலுக்கு ஆயிரம் வருடங்கள்

2010-05-10T13:21:00.000+05:30

இராஜராஜ சோழன் தஞ்சைப் பெரிய கோயிலை கட்டி ஆயிரம் ஆண்டுகள்

ஆகின்றன. சென்ற மாதம் சென்றபோது எடுத்த புகைப்படம்.

கோபன்ஹாகன்: புவிவெப்ப மாநாடு (Climate Change Summit )- 1

2009-12-19T14:04:00.001+05:30

கோபன்ஹாகன்: புவிவெப்ப மாநாடு (Climate Change Summit )- 1
================================

ஒருவழியாக மாநாட்டின் கடைசி நாளில் ஏதோ ஒரு உடன்பாடு ஏற்பட்டிருப்பது மகிழ்ச்சிதான். உடன்படிக்கையின் முழுப் பிரதியும் இன்னும் கையொப்பமிடப்படவில்லை. ஆனால் உடன்பாட்டிற்கான முன்னோட்டப் பிரதி அமெரிக்கா, சீனா, இந்தியா, தென்னாப்பிரிக்கா, பிரேசில் ஆகிய ஐந்து நாடுகளின் தலைவர்களுக்குள் நடந்த ஆலோசனையின் பெயரில் ஒப்புக்கொள்ளப்பட்டிருக்கின்றது. இது ஒரு அனைத்துலக மாநாடு என்றபோதும், அமெரிக்க அதிபர் ஒபாமா மாநாட்டுக்கு வந்தவுடன் இந்த ஐந்து நாடுகளின் தலைவர்களுடன் இணைந்து இதுதான் இந்த மாநாட்டிற்கான ஒப்பந்தம் என்று ஒன்றை கொடுத்துவிட்டு, அமரிக்க தெலிவிஷனில் தம் நாட்டுமக்களுக்கும் கூறிவிட்டு நாடு திரும்ப விமானம் ஏறிவிட்டார். ஆனால் ஐரோப்பிய கூட்டமைப்பு மிகுந்த கடுப்பில் இருப்பதுபோல் இருக்கிறது. க்யூபா, பொலீவியா போன்ற மற்ற நாடுகளும் இது ஜனநாயகமான முறை அல்ல, ஏற்கமுடியாது என்று கூறுகின்றன.
எனினும் அனேகமாக ஒப்பந்தமாக மாறக்கூடிய (சிற்சிறு மாற்றங்களுடன்) பிரதியின் சுருக்கப்பட்ட தமிழாக்கம்:

கோபன்ஹாகன் ஒப்பந்தத்தின் முன்வரைவுப் படி: Draft text of new "Copenhagen Accord"
(சுருக்கப் பட்ட, சற்றே மாற்றப்பட்ட வடிவம்)
நீண்டகால கூட்டுச் செயல்பாடுகள், முந்தைய க்யோத்தோ வரைவின் தொடர்ச்சியை முன்வைத்தும் தற்காலிக குழு தொடர்ந்த்து இயங்கும்படி வேண்டிக்கொண்டு இவ்வறிக்கை தொடங்குகிறது.
1. அனைத்து நாடுகளின் ஒன்றுபட்ட குறிக்கோளாக புவிவெப்ப மாறுதல்களை குறைப்பதை ஏற்கிறது. தனித்தனி நாடுகளுக்குள் வேறுபட்ட பொறுப்புகளையும், கடமைகளையும் ஏற்கிறது. பசுங்கூடு (green house) விளைவு ஏற்படுத்தும் கார்பன் டை ஆக்ஸைடு மீத்தேன் போன்ற மாசு வாயுக்களை உமிழ்வதன்மூலம் புவிவெப்பம் உயர்கிறது என்ற அறிவியல் வாதத்தை ஏற்கிறது. இவ்வுமிழ்வை கடுப்படுத்துவதன்மூலம் மேலும் அதிக பட்ச உயர்வாக 2 டிகிரி அளவே இருக்கவேண்டும்.
2. உலகளாவிய மாசுவாயு உமிழ்வு மிகக்கடுமையாக கட்டுப்படுத்தப் படவேண்டும், குறைக்கப் படவேண்டும். அனைத்துலக அளவில் 50% குறைப்பு நிகழ வேண்டும். இது 2050 ஆண்டுக்குள் நிகழத்தப் படவேண்டும். 1990 ஆண்டு அளவில் இந்த உமிழ்வு மட்டுப்படுத்தப்படும். தனித்தனி நாடுகளின் அதிகபட்ச உமிழ்வுகளை அடையும் வருடம் நாட்டுக்கு நாடு வேறுபடலாம். வளரும் நாடுகள், ஏழ்மையைபோக்க தேவையான தம் வளர்ச்சியை மட்டுப்படுத்த ஏலாது என்பதால் அவற்றிற்கு இந்த அதிகபட்ச உமிழ்வு குறிஆண்டை எட்ட அதிக காலம் தேவைப்படும் என்பது உணரப்படுகிறது.
3. கடற் கரையோர நாடுகள், சின்னன்சிறு தீவு நாடுகள், ஆகக்குறைய வளர்ச்சியடைந்த நாடுகள், காலநிலை மாற்றத்தால் பாதிக்கப்படும் வளரும் நாடுகள் இவற்றில் ஏற்படும் வெள்ளாபாயங்கள், பாலைவனமாகுதல் முதலியவற்றை தடுக்கவும், தவிர்க்கவுமான தேவையான பொருள் உதவி, தொழில்நுட்ப உதவி, செயல்திறன் வளர்ச்சி உதவி இவற்றை வளர்ந்த நாடுகள் தரமுன்வரவேண்டும்.
4. பிற்சேர்க்கை 1 ல் வரும் நாடுகள், தனித்தனியாகவோ சேர்ந்தோ 80% உமிழ்வுகளை 2050க்குள் குறைக்கும். 2020 க்குள் தனித்தனியாக அவை குறைக்கும் உமிழ்வுகள் X,Y (1990,2005 அளவுகளுடன் பார்க்க) சதவீதம் இருக்கும் (இவை பின்னர் ஒப்புக்கொள்லப்படும் என்று தெரிகிறது). முக்கியமாக முந்தைய க்யோத்தோ வரையரைகளை கணக்கில் கொண்டு அளக்கத்தக்க, அறியத்தக்க உமிழ்வுக்குறைப்புக்கு இந்நாடுகள் ஒப்புக்கொள்ளும்.
5. பிற்சேர்க்கை 1 இல் வராத நாடுகள், பின்னிணைப்பு 2 இல் வரும் தடுப்பு செயல்பாடுகளையும், தக்கவைக்கக்கூடிய வளர்ச்சி முறைகளையும் பின்பற்றும். இவற்றைபற்றிய அறிக்கைகளை இரண்டாண்டுகளுக்கொருமுறை இந்நாடுகள் அளிக்கும். பன்னாட்டு உதவிகள் இருக்கும்போது அவை முறைப்படி குறிப்பு எடுக்கப்பட்டு, அறிக்கைகள் தயாரிக்கப்படும். அத்திட்டங்கள் பன்னாட்டு மேற்பார்வையிலும், சரிபார்த்தலிலும் நடத்தப்படும்.
6. காடுநசிவு , காடுஅழிப்பு இவற்றின் மூலம் ஏற்படும் உமிழ்வுகளை கட்டுப்படுத்தவும் பாதிக்கப்படும் நாடுகள் அவற்றை சரியாக்கும் முயற்சிகளுக்கான நிதி, தொழில்நுட்ப உதவிகளை வளர்ந்த நாடுகள் அளிக்கும்
7. தடுப்புச் செயல்பாடுகளுக்காக சந்தை பொருளாதார முறைகள் உள்ளிட்ட, அனைத்து வழிகளிலும் முயற்சிகள் செய்யப்படும். நிதிச் சலுகைகளும் அளிக்கப்படும்.
8. இருக்கும் நிதி அதிகரிப்பு, புது நிதி வழங்குதல் இவற்றின் மூலம் காப்புத்திட்டங்கள், காடுபாதுகாப்பு, நுட்பவளர்ச்சி போன்ற திட்டங்களுக்கு உதவி நல்குதல். அது சஏறக்குறைய 30 பில்லியன் டாலர் நிதியாக 2010-2012 க்குள் இருக்கும் என அறிவிக்கப்படுகிறது. 2020லிருந்து ஆண்டுக்கு 100 பில்லியன் டாலர்கள் நிதி திரட்டவும் அவற்றை கண்காணிப்புடன் கூடிய திட்டங்களுக்கு வளர்நாடுகளுக்கு வழங்கவும் முன்மொழியப்படுகிறது.
9. இதற்காக ஒரு உயர்மட்டக் குழு ஒன்று அனைத்து நாடுகளை உள்ளிட்டு அமைக்கப்படும். அது இதனால் வரும் வருமான வழிமுரைகளையும், மாற்று நிதித் திட்டங்களையும் முறைப்படுத்தும்
10. 'கோபன்ஹாகன் தட்பவெப்பநிலை நிதியம்' ஒன்று அமைக்கப்படும். அது அனைத்து திட்டங்களையும், செயல்பாடுகளையும், செயல்திட்டங்களையும் வளர்நாடுகளில் ஆய்வு, நுட்ப அமைப்பு, ஆராய்ச்சி, முதலியவற்றை கவனிக்கும்
11. தனிப்பட்ட நாடுகளின் முன்னுரிமையைகளை முன்வைத்து காப்பச் செயல்திட்டங்கள், நுட்ப பரிமாற்றம், நுட்ப ஆய்வு இவை நடத்தத் தக்க நடைமுறை செயல்திட்டங்கள் வகுக்கப் படும்.
12. 2016 ஆம் ஆண்டிற்குள் இந்த உப்பந்தத்தின் அனைத்து கூறுகளும் நடைமுறையாக்கப் பெற்றமைக்கான தணிக்கை மீள்நோக்கு செய்யப்படும். நீண்டகால திட்டமான வெப்ப உயர்வை 1.5 டிகிரிக்குள் அடக்குவது பற்றியும் இது இருக்கும்.

இம்மாநாட்டின் மூலம் ஏதாவது பயன் உண்டா, புவிவெப்பப் பிரச்சினைதான் என்ன?, இந்தியாவிற்கு என்ன சாதக பாதகங்கள் என்பதைபற்றி அடுத்து பார்ப்போம்.

(தொடரும்)

நான் கடவுள்; ருத்ரம்

2009-01-16T20:44:00.000+05:30

நான் கடவுள் படத்தில் வரும் ஓம் சிவோஹம் பாடலைப் பற்றி டுவிட்டரில் அரட்டை அடிக்கும் போது நடுவில் ருத்ரம் வருகிறதா என்ற கேள்வி வந்தது.

வீட்டில் சளி பிடித்து தூக்கம் போட்ட நேரத்தில் புத்தகங்களைக் குடைந்ததில்
கண்டுபிடித்தேன். இருமலோடு பள்ளிக்குப்போகாமல் வீட்டில் இருந்த பையன் ஒலிப்பான்களை சரிப்படுத்தினான்.
வேதத்தில் சிவனின் மந்திரமான 'நம: சிவாய' இங்கேதான் வருகிறது. அந்த வரிவரை கொடுத்திருக்கிறார்கள்.

இந்த வரிகள் பாடலில் 1:51 இல் இருந்து வருகிறது.

(தைத்திரீய சம்ஹிதா 4.5.8)

நமஹ: சோமாய ச ருத்ராய ச
நமஸ் தாம்ராய சார்ணாய ச
நமஹ: ஷங்காய ச பஷுபதயே ச
நம உக்ராய ச பீமாய ச
நமோ அக்ரேவதாய ச தூரெவதாய ச
நமோ ஹந்த்ரே ச ஹனீயசெ ச
நமோ வ்ருக்ஷேப்யோ ஹரிகேஷேப்யோ
நமஸ் தாராய
நமஹ: ஷம்பவெ ச மயோபவே ச
நமஹ: ஷங்கராய ச மயஸ்கராய ச
நமஹ: ஷிவாய ச ஷிவதராய ச

----
முடிந்த அளவு எனது பெயர்ப்பு:
"
சோமா போற்றி ருத்ரா போற்றி
உதிக்கும் தாமிர, உதித்த செஞ்சூரியா போற்றி
வளப்பமும் அறிவும் தருபவனே போற்றி
உக்கிரமும் பயங்கரனு மானவனே போற்றி
அண்டை அயலில் அழிவதை செய்பவனே போற்றி
ஆழிப்பெருக்கில் உயிர் கோர்வனே போற்றி
பசுமைசூழ் மரங்களே போற்றி
கடைதேற்றுபவனே போற்றி
அமைதியின், ஆனந்த ஊற்றே போற்றி
அமைதியை ஆனந்தத்தை ஆக்குபவனே போற்றி
சிவனே போற்றி போற்றி "

(வெளிப்படையான பொருள் தவிர, உள்உறை பொருள் உண்டு என்பது மரபு. தவறு இருந்தால் சுட்டவும்)
-

மும்பாய் பயங்கரவாதம்

2008-11-30T16:26:00.002+05:30

மும்பாய் பயங்கரவாதம்

மும்பாயில் நடந்தது உலகு தழுவிய இஸ்லாமிய பயங்கரவாதத்தின் இரண்டாவது இந்தியத் தாக்குதல் என்றே கூறலாம். இன்றைக்கு மூன்று ஆண்டுகளுக்கு முன் நடந்த பெங்களூர்த் தாக்குதல் முதலாவது. அதைப் பற்றிய எனது பதிவு இங்கே . அப்போது காலம் கடந்து விட்டது என்று எழுதியிருந்தேன். அது இந்தியாவின் மூளையைக் குறிவைத்த செயல். இது நாட்டின் பொருள் வளத்துக்குக் குறி. இத்தகைய பயங்கரவாதச் செயல்களிலிருந்து மக்களைப் பாதுகாக்க அரசு மூன்றாண்டுகளாக எந்தவித முன்னெடுப்பும் செய்யவில்லை என்பது வெளிப்படையாகத் தெரிகிறது. மன்னிக்க முடியாத குற்றம். காங்கிரஸ் (யூபிஏ) அரசுக்கு தன்னை மறைத்துக்கொள்ள எந்தவித காரணங்களும் இல்லை. சில குறிப்புகள்:

1. பலரும் பயங்கரவாதிகளுக்கு மதம் இல்லை என்று திரும்பத் திரும்ப ஏன் கூறுகிறார்கள். எதைக் காரணமாகக் கொண்டும் பயங்கரவாதத்தைச் செய்யலாம். மதம்தான் உலகசரித்திரத்தில் மிக அதிகமான பயங்கரவாத உயிர்க்கொலைகளுக்கு காரணம். அடுத்த காரணம் நாடு. நடந்தது இஸ்லாமிய பயங்கரவாதம்- இதில் எந்த சந்தேகமும் இல்லை. பாகிஸ்தான், பங்களாதேச முஸ்லிம்கள் இதில் சம்பத்தப் பட்டிருந்ததாக இப்போது செய்திகள் தெரிவிக்கின்றன.

2. இது நடக்கும் போது இந்தியாவில் ஒரு கூட்டத்தில் பேட்டி அளித்துக்கொண்டிருந்தார் பாகிஸ்தானிய அயலுறவு அமைச்சர் ஷா குரேஷி. தொலைக்காட்சியில் காட்டிக்கொண்டிருக்கும்போதே அவருக்கு பிரணாப் முகர்ஜியிடமிருந்து தொலை பேசி அழைப்பு. ஆரவாரமாக பேச ஆரம்பித்த குரேஷியின் முகம் இறுகி வெறுமனே "ஹாங் ஜி", "ஜி" என்று கேட்டுக்கொண்டிருந்தார். தொலைக்காட்சியில் அவரை வறுத்து எடுத்து விட்டார்கள். பாகிஸ்தானின் உளவுப் பிரிவு தலைவர் இந்தியாவிற்கு வருவார் என்று கூறிய குரேஷி இன்று பாகிஸ்தான் சென்றவுடன் 'எங்கள் கைகள் சுத்தமாக இருக்கின்றன. பாகிஸ்தானின் ஆதரவுக்கு ஆதாரம் கொடுங்கள்' என்று எப்போதும் போல் கூறுகிறார். இந்தியாவிற்கு எந்த பாகிஸ்தானிய அரசும் சற்றும் உதவி செய்யாது என்பது தெளிவு. இதில் டிப்ளமேடிக்காக அணுகலாம் என்ற முயற்சிக்கே வழியில்லை போலத்தான் திரும்பத் திரும்பத் தெரிகிறது. இந்தியா என்ன செய்யவேண்டும் ?

3. பாகிஸ்தான் முழுவதுமாக சிதைந்து கொண்டு இருக்கிறது. பலூச்சி, வடமேற்குப் பிராந்தியங்கள் அனைத்தும் மோசமாகிக் கொண்டிருக்கின்றன. பொருளாதாரம் அடிமட்டத்துக்குப் போய்விட்டது. ராணுவமும் உளவுத்துறையும் சிவிலியன் அதிகாரத்தில் இல்லை. அமெரிக்கா ஆப்கான் எல்லையில் இஷ்டத்துக்கு என்னமோ செய்கிறது. ஏகப்பட்ட ஆயுதங்கள் பொதுமக்களிடம் பரவி உள்ளன. அணுஆயுத பலமிக்க கட்டுக்கடங்காத ராணுவம், மோசமான நம்பிக்கையில்லாத பொருளாதாரம், மத அடிப்படைவாத மீட்டெழுச்சி, பிராந்த்தியங்களில் உள்நாட்டுப்போர், அமெரிக்க-மேற்கத்தியப் படைகளின் ஊடுருவல் என அனைத்துக் கோணங்களிலும் பெரும் உள்வெடிப்புக்கு தயாராகி வருகிறது. இந்தியாவிற்கு இதனால் எந்த விதத்திலும் நிம்மதி கிடைக்கப் போவது இல்லை. தற்காப்புதான் ஒரே வழி.

4. இன்றைக்கு மேற்கத்தியர்கள் சம்பத்தப் பட்டிருப்பதால் அமெரிக்கா பிரிட்டன் போன்ர நாடுகளில் சற்றே இந்திய ஆதரவு குரல் கேட்கிறது. அதைதாண்டி எந்த வித தீர்மானமான முடிவுக்கும் இந்நாடுகளின் ஆதரவு இந்தியாவிற்குக் கிடைக்காது. இந்தப் பிரச்சினையில் இந்தியா எப்போதும் போல் தனித்துத் தான் எதிர்கொள்ள வேண்டி இருக்கும்.

5. அதிரடிப் படைகளை நாடுமுழுவதும் பரவலாக்குதலும் உடனடி பிரயோகத்திற்கான செயல் கேந்திரங்களை அமைப்பதும் என்றோ நடந்திருக்க வேண்டியவை. மற்றபடி பாதுகாப்புப் படைகள் அனைத்தும் பழைமையாகிக் கொண்டு இருக்கின்றன. கப்பல் படை போதுமான நீர்மூழ்கிகள், போர்க்கப்பல்கள் இல்லாமல் இருக்கிறது. விமானங்களும் இற்றைப்படுத்தப் படவில்லை.

6. காஷ்மீர் பிரச்சனை இந்திய முஸ்லிம்களின் முழுப் பிரச்சனை அல்ல. ஆட்களைக் கவர முதல் கட்ட ஈர்ப்புக்கு மட்டுமே அதை பயன்படுத்த முடியும். மற்றபடி பெரும்பான்மையான இந்திய முஸ்லிம்களின் பிரச்சனை மற்ற எல்லோருக்கும் இருக்கும் பிழைப்பு பற்றியதுதான். வளர்ந்து வரும் இந்திய பொருளாதாரத்தில் தங்களையும் இணத்துக்கொள்ளலாம் என பெரும்பான்மை மக்களின் அனைத்து பொருளாதார அடுக்குகளிலும் இருக்கும் மக்களுக்குத் தோன்றும் ஒரு மாய நம்பிக்கை கூட முஸ்லிம்களுக்கு இல்லை. இதற்குக் காரணம் மிக முக்கியமாக இஸ்லாமிய மதப் படிப்புதான் காரணம். அதை மற்றவர்களால் சரி செய்ய இயலாது.

7. நாட்டின் அரசியல் கட்சிகளில் நான் பெரிசு நீ பெரிசு என்று பேச ஒன்றுமில்லை. கடந்த பிஜே பி அரசு பாதுகாப்பாக வெளியே கொண்டுபோய் விட்டுவந்த மசூத் அஸார், ஒமார் ஷேக் போன்றவர்களை கடந்த ஆண்டுகளில் இந்தியாவில் நடந்த பல பயங்கரவாதச் செயல்களுடன் சம்பந்தப் படுத்தி பல அறிக்கைகள் உள்ளன. இத்தகைய செயல்களில் காங்கிரசும் பிஜேபியும் ஒரே அளவு அரசியல் தகுதிதான் கொண்டவர்கள். அசிங்கமான அரசியல் செய்ய முயன்ற மோடியை இறந்த அதிரடிப் படைத் தலைவர் ஹேமந்த் கார்கரேயின் மனைவி நடத்தியதை நாடே பார்க்கிறது.

8. இஸ்ரேலில் இருந்து நாங்கள் உதவி இருந்தால் உயிர் இழப்பைத் தடுத்திருக்கலாம் என்று குரல்கள் வருகின்றன. பயங்கரவாதிகளின் குறியே மிக அதிகமானவர்களைக் கொல்லுதல் என்று இருக்கும்போது இந்தியப் படையினர் செய்ததே சரி. இதற்கெல்லாம் பிற நாடுகளின் உதவிகளை பெறத் தேவையில்லை. புலனாய்விலும் துப்புகளை பகிர்ந்து கொள்வதிலும் உலகளாவிய புரிந்துணர்வு இருந்தால் பலதைத் தடுக்கலாம்.

9. உயிர் இழந்த பொதுமக்களுக்கும், பணியில் உயிர் துறந்த படை வீரர்களுக்கும் அஞ்சலி.

10. பொறுப்பேற்று அமைச்சர் சிவராஜ் பாடீல், செயலாளர் எம். கே. நாராயணன் முதலியோர் பதவித்துறப்பு செய்துள்ளதாக செய்திகள் வருகின்றன. இப்போதாவது அமைச்சரவை சில முடிவுகளை எடுப்பதற்கு நன்றி சொல்லத்தான் முடியும்.உருப்படியாக வேறு திட்டங்கள் வந்தால் சரி.

-

எறிந்த விமானங்கள்

2008-10-24T15:04:00.001+05:30

நிலவு போய்ச்சேர எறிந்த விமானங்கள்
உள்/வெளி பேதம் மறந்து அலையும் கனப்பரப்பு.
கற்கள் பெயரக் கலைந்தோடும் எறும்பின் கூட்டம்.
தழலும் கருவேலம் புகையும்
குழல்வழி சென்று நிரப்பிய
அம்மாவின் மூச்சுப்பைகள்
போல்
முப்பரிமாணத்தில் விரியும் இம்மாநகர்
இன்னும் எவ்வளவு கொள்ளும்?
படர்சிதைவுச் சமவெளியின் அப்பால்
மலைச் சரிவுகளில் அளையும்
ஊர்திகளின் தொலைமுடுக்குப் பொறிகள்
இயக்க வரிசையில் நிற்கும் நான் கேட்கிறேன்:
உயிர்வளியை அடக்கிச் செல்லும் குழல் வர்த்தகா
வேகும் அரிசியின் மணம் போன்றதா நிணமும்.

-

சினிமாவும், நானும் ...

2008-10-15T14:01:00.002+05:30

இரண்டு விஷயங்களைப் பற்றி பதிவு எழுதக்கூடாது என்று நீண்டநாட்களாக வைத்திருந்தேன். ஒன்று சினிமா விமரிசனம். இரண்டாவது கிரிக்கெட். இதை முறித்து தாரே ஜமீன் பர் படத்தைப் பற்றி எழுதியதால் சினிமாவைப் பற்றிய விரதம் முடிஞ்சு போச்சு. இப்போது மதி வழியாக வந்த சினிமா மீமை வைத்து இந்தப் பதிவு.

1. எந்த வயதில் சினிமா பார்க்க ஆரம்பித்தீர்கள்? நினைவு தெரிந்து கண்ட முதல் சினிமா. என்ன உணர்ந்தீர்கள்?
எனக்கு நன்றாக நினைவிருக்கும் முதல் படம் ஹட்டாரி. பெரும் பாதிப்பு. ஒட்டகச் சிவிங்கி, காண்டாமிருகம் என்று கனவெல்லாம் நிறைந்த சினிமா. நாலாம் கிளாஸ் படிக்கும்போது பார்த்தது. அதை வைத்து நானும் என் தம்பியும் வரைந்த ஓவியங்களுக்கு மாநில அளவிலான போட்டியில் எங்கள் இருவருக்குமே தத்தம் வயதுக்கான இரண்டாவது பரிசு!. அப்புறம் வா ராஜா வா, அகத்தியர், திருமலை தென்குமரி என்று இப்போதும் நினைவிருக்கும் படங்கள்.

2.கடைசியாக அரங்கில் அமர்ந்து பார்த்த சினிமா?
தசாவதாரம். பையனும் மனைவியும் நன்றாக ரசித்தார்கள்.
ஆங்கிலத்தில்: கடைசி ஜேம்ஸ்பாண்ட் படம்.

 3.கடைசியாக அரங்கிலன்றிப் பார்த்த தமிழ் சினிமா எது, எங்கே, என்ன உணர்ந்தீர்கள்?
சிவாஜி. சங்கரும் இந்தக்கால ரஜினியும் சேர்ந்தால் என்ன உணர்வு வரும்? அதேதான்.

4.மிகவும் தாக்கிய தமிழ்ச்சினிமா
'தாக்கிய' என்பதற்கு பதில் பிடித்த என்று வைத்துக்கொண்டால், ஒரு லிஸ்ட்:
புதிய பறவை, சிவகங்கைச் சீமை, ஆயிரத்தில் ஒருவன், அந்த நாள், வல்லவன் ஒருவன், பதினாறு வயதினிலே, மூடு பனி, ஜானி, அவள் அப்படித்தான்.

5-அ. உங்களை மிகவும் தாக்கிய தமிழ்ச்சினிமா-அரசியல் சம்பவம்?
எம்ஜீயார் உலகம் சுற்றும் வாலிபன் வெளியிட்டபோது அந்தப் படம் பார்த்து விட்டு இதுக்கு ஏன் இவ்வளவு கலாட்டா என்று நினைத்தது. படம் அப்போது பிடித்திருந்தது.
 5-ஆ. உங்களை மிகவும் தாக்கிய தமிழ்ச்சினிமா-தொழில்நுட்ப சம்பவம்?
ஒன்றுமில்லை.

6.தமிழ்ச்சினிமா பற்றி வாசிப்பதுண்டா?
ஒரு காலத்தில் அனத்து சிறுபத்திரிக்கைகளிலும் வருவதை தவறாமல் படித்ததுண்டு. இப்போது இணையத்திலேயே நண்பர்கள் சிலபேர் அருமையாக எழுதுகிறார்கள்.

7.தமிழ்ச்சினிமா இசை?
பாடல்களைச் சொல்கிறீர்கள் என்றால், இசையில்லாத தமிழ் சினிமா எனக்கு மிகவும் அந்நியமாக இருக்கும். தமிழ் சினிமாப் பாட்டு எனக்கு கற்றுத்தராத ஒன்று என்று எதுவுமில்லை எனச் சொல்லும் அளவுக்கு சினிமா பாட்டு பிடிக்கும். மிகப் பிடித்த பாடகர்: டி. எம். சவுந்திரராஜன், மிகப் பிடித்த பாடகி: எல்.ஆர். ஈஸ்வரி, மிகப்பிடித்த இசையமைப்பாளர்கள்: இளையராஜா, எம்.எஸ். வி.
டூயட் பாட்டு எதுக்கு என்று கேட்பவர்களைப் பார்த்து, அரவிந்தனின் போக்குவெய்யிலில் ஹரிபிரசாத் சொளராசியா எதுக்கோ அதுக்கு என்று சொல்லத்தோன்றுகிறது. சினிமாவே ஒரு கட்டமைக்கப்பட்ட புரளிதான். இதில் அமைப்பியல்/வடிவ இயல் ரீதியில் சினிமாப் பாட்டுக்கு என்ன எதிர்ப்பு இருக்கமுடியும். தமிழ்ப் படங்களில் சினிமாப் பாட்டு வருவது அபத்தம் என்று சொல்பவர்கள் முதலில் ஐசன்ஸ்டைன்னின் The Film Sense மட்டுமாவது படித்துவிட்டு வந்தால் ஏதாவது விவாதிக்கலாம். உலகச்சினிமாவில் பாட்டு இல்லை என்றால், தமிழ்ச் சினிமா என்ன செய்யும்.
பழைய இந்திப் பாடல்களும் நிறையப் பிடிக்கும். கிஷோர் குமார், ஆஷா, ஆர்.டி. பர்மன் அங்கே பிடித்தவர்கள்.

8. தமிழ் தவிர வேறு இந்திய, உலக மொழி சினிமா பார்ப்பதுண்டா? அதிகம் தாக்கிய படங்கள்?
இந்தியத் திரைப்படங்கள்: 70/ 80 களில் வந்த ஹிந்தி பேரலல் படங்கள் அனைத்தும், கன்னட கிராமிய புராணிகங்கள் (காடு, சம்ஸ்கரா,சோமன துடி, காடு குதிரே, ஒந்தானொந்து காலதல்லி...), மலையாளத்தின் அடூர், அரவிந்தன் படங்கள் அனைத்தும் என ஒருகாலத்தில் ஒரு சுற்று சுற்றியதுண்டு. 15 வருடங்களாக பார்ப்பதில்லை.
உலகத்திரைப்படங்கள்: 90 க்கு முன் வந்த கிளாசிக்ஸ் என அறியப்படும் ஐரோப்பிய, ரஷ்ய, ஜப்பானிய, அமெரிக்க படங்களில் ஏகதேசம் பார்த்திருப்பேன். அதுக்கப்புறம் இல்லை. பிடித்த இயக்குனர்களும், படங்களும் பல. பெரிய பட்டியலாகும் என்பதால் தரவில்லை.ஏனோ சினிமா போதும் என்று அப்போது தோன்றிவிட்டது. நிறுத்திவிட்டேன்.

9. தமிழ்ச்சினிமா உலகுடன் நேரடித்தொடர்பு உண்டா? என்ன செய்தீர்கள்? பிடித்ததா? அதை மீண்டும் செய்வீர்களா? தமிழ்ச்சினிமா மேம்பட அது உதவுமா?
இல்லை.

10.தமிழ்ச்சினிமாவின் எதிர்காலம் பற்றி என்ன நினைக்கிறீர்கள்?
நன்றாகத்தான் இருக்கிறது. ஹாலிவுட், இந்திப் படங்களின் பாதிப்பில் இந்திய மொழிச் சினிமாக்கள் ஏறக்குறைய அழிந்துபோய்க்கொண்டு இருக்கின்றன. தமிழ் ஒன்றுதான் தாக்குப் பிடிக்கிறது. அதற்கு தமிழ் மசாலா படங்களைத்தான் காரணம் சொல்ல முடியும். ரஜினி, விஜய், கமலஹாசன், வடிவேலு, அஜித், விக்ரம் போன்றவர்கள் தான் காரணம். வேறுவிதமாக நல்ல படங்கள் எடுக்கலாம் என நினைப்பவர்கள் செயல்பட முடிவதும் இந்த மசாலாப் படங்கள் ஏற்படுத்திக் கொடுத்திருக்கும் சந்தையின் காரணமாகத்தான். இல்லா விட்டால் Ivan the terrible II க்கு ஏற்பட்ட கதிதான். சமரசங்கள் யாருடன் செய்யவேண்டும்? அரசுடனா, அதிகாரத்துடனா, மக்களுடனா? மக்கள் சந்தையில் சமரசங்கள் செய்வதே மேல் என்று படுகிறது. புது இயக்குனர்கள் நன்றாகவே செய்கிறார்கள்.

11.அடுத்த ஓராண்டு தமிழில் சினிமா கிடையாது, மற்றும் சினிமா பற்றிய சமாச்சாரங்கள், செய்திகள் எதுவுமே பத்திரிகைகள், தொலைக்காட்சி, இணையம் உள்ளிட்ட ஊடகங்களில் கிடையாது என்று வைத்துக்கொள்வோம்? உங்களுக்கு எப்படியிருக்கும்? தமிழர்களுக்கு என்ன ஆகும் என்று நினைக்கிறீர்கள்?
96-06 பத்தாண்டுகள் சென்னையில் இருந்தேன். ஒரு தமிழ்படம் கூட பார்க்கவில்லை! வீட்டில் தொலைக்காட்சி இணைப்பும் தரவில்லை. அதனால் எனக்கு ஒன்றும் ஆகாது. தமிழர்களுக்கு பொதுவாக பைத்தியம் பிடிக்கலாம்.

நான் அழைக்கவேண்டும் என்று நினைப்பவர்களை ஏற்கனவே மற்றவர்கள் அழைத்து விட்டார்கள். எனவே விருப்பமிருக்கும் அனைவரும் எழுதலாம்.

ஒரு வரி விமரிசனம்

2008-10-14T14:49:00.005+05:30

அறிவியல் என்பது ஒரு முறை செய்யப்பட்ட அறி முறைதான். ஆனாலும் எது அறிவியல் எது அறிவியல் இல்லை என்பது பெரும் வாதங்களுக்கு வழிவகுக்கும் ஒரு கேள்வியாகும். "மொசப் புடிக்கிற நாயை மூஞ்சியப் பாத்தா தெரியாதா" என்பது கோவை மாவட்ட சொலவடை. முயல், உடும்பு வேட்டைக்கு முன்னெல்லாம் நாயோடுதான் மக்கள் செல்வார்கள். அதேபோல சில துறைகளைப் பார்த்தாலே அது அறிவியலா இல்லையா என்பது தெரிந்துவிடும். காட்டாக, சோதிடம், தேர்தல் மக்கள் கணிப்பு இதெல்லாம் அறிவியல் இல்லை. சிலவற்றை இதில் சேர்க்கலாமா முடியாதா என்று குழப்பம் வரும். மொழியியல், சமூகவியல், பொருளாதாரம் என்பன. இவை அறிவியலின் முறைகளை பயன்படுத்துகின்றன, ஆனால் அறிவியல் ஆகமுடியுமா என்பது கேள்விக்குறியது.

இப்போது எதற்கு இதைப்பற்றி? அறிவியல் என்பது முறையாக்கப்பட்ட அறிவின் சுருக்கெழுத்து என்றால் கணிதம் அறிவியலின் சுருக்கெழுத்து எனக்கொள்லலாம். இது ஒரு பார்வைதான். இப்படியெல்லாம் அறிவியலையும் கணிதத்தையும் குறுக்க நான் முயற்சிக்கவில்லை. கணிதம் ஒரு சுருக்கெழுத்தாக இருப்பதாலேயே அதனால் குறைவான் நேரத்தில், குறைவான சொற்களில் மிக அதிக 'விஷயங்களை'ச் சொல்ல முடிகிறது. கணிதத்தில் அழகும் இத்தகைய நோக்குடனே பேணப்படுகிறது.

ஆனால் கணிதம் ' செய்வது ' என்பது கணிதத் தேற்றங்கள்போல சுருக்கமானது அல்ல. அவ்வளவு தெளிவானதும் அல்ல. ஜான் கார்லோ ரோடா (Gian-Carlo Rota ) என்ற ஒரு கணித அறிஞர் பத்தாண்டுகளுக்கு முன்பு வரை இருந்தார். அவர் கூறுவது போல
" கணிதம் என்பது முறையான நிரூபணங்களைப் பற்றியது அல்ல. எது உண்மையாக இருக்கவேண்டும் என்று நாம் உள்ளுனர்வின் மூலம் அறிந்தபிறகே முறைப்படுத்தல் நிகழ்கிறது" கணிதத்தை எளிமையாக கற்பிப்பதிலும், அதற்கும் மெய்யியலுக்கும் இடையேயான தொடர்பைப்பற்றியும் மிகவும் அக்கறை கொண்டவர் ரோடா. இவரைப் பற்றி நிறைய எழுதலாம்.

அவர் "அட்வான்ஸஸ் இன் மாதமாடிக்ஸ்" என்ற துறைசார் இதழுக்கு ஆசிரியராக இருந்தார். நான் பொறியியல் மாணவனாக இருந்தாலும் அந்த இதழை தவறாமல் படிப்பேன். எனக்கு அதில் இருக்கும் கணிதம் ஒன்றும் புரியாது. இதழின் கடைசி பகுதியில் ரோடா புது கணித புத்தகங்களைப் பற்றிய மதிப்புரைகள் எழுதுவார். அது ஒன்றுதான் எனக்கு அதில் புரியும். அதற்காகவே படிப்பேன். ஒரே பக்கத்தில் பல புத்தகங்களுக்கு மதிப்புரை இருக்கும். மதிப்புரை என்றால் அநேகமாக ஒரு பத்திக்கு மிகாது. ஒரு வரி மதிப்புரையும் உண்டு. துறைசார் நகைச்சுவைகள் நிறைய உண்டு. படமே இல்லாமல் லெம்மா- தேற்றம்- நிரூபணம் என வரும் கணிதப் புத்தகங்களை பிரித்து மேய்ந்துவிடுவார். ஒருமுறை ஒரு புத்தகத்தை, 'இது நார்மன் ஸ்டீன்ராடுக்கு (ஒரு புகழ் பெற்ற கணிதவியலாளர்) அவர் நண்பர் எழுதிய கடிதம் போல இருக்கிறது. இதை எந்த மாணவன் படிப்பான்' என்று காட்டமாக விமரிசித்து இருந்தார். அப்போதுதான் நான் ஸ்டீன்ராடின் புத்தகம் ஒன்றை முழுதுமாக செராக்ஸ் செய்து வந்திருந்தேன். நூலகத்தில் இதைப் படித்து சத்தமாக சிரித்து விட்டேன்.
நண்பர் ரோசாவசந்த் தமிழில் யாரோ ஒரு எழுத்தாளர் 12000 பக்க நூல் ஒன்றை எழுதிக்கொண்டிருப்பதாக ட்விட்டரில் ஒரு கிசுகிசு சொல்லி இருந்தார். படித்து விட்டு கண்டிப்பாக ஒரே ஒரு வரி விமரிசனம் செய்யவேண்டும் போல இருக்கிறது. எப்ப நூல் வரும்?

2008 இயல்பியல் நொபல் பரிசு (2008 Physics Nobel )

2008-10-07T21:01:00.014+05:30

இந்த வருட இயல்பியல் நொபெல் பரிசு மிக செறிவான ஒரு துறைக்கு கிடைத்திருக்கிறது. துகள் இயல்பியல் எனப்படும் அனைத்துப் பொருண்மையின் அடிப்படைகளை, பொருண்மை-வினை இயல்புகளை ஆராயும் இப்புலம் இருபதாம் நூற்றாண்டின் முதல் பகுதியில் துவங்கி வெகு வேகமாக வளர்ந்த ஒரு துறையாகும். துகள் இயல்பியல், ஆதாரமான கேள்விகளை எழுப்பும் துறையாதலால் அதிக அளவில் கணிதமயமாக்கப்பட்ட ஒன்றும் ஆகும். ஏறக்குறைய உயர்கணிதத்தின் எல்லைகளை விரிவாக்குவதிலும் இத்துறையின் பங்கு கணிசமானது.

மூன்று ஜப்பானிய இயல்பியலாளர்கள் இப்பரிசினை இவ்வாண்டு தமக்குள் பங்கிட்டுக்கொள்கிறார்கள்.
அவர்கள்:

1. அமெரிக்காவின் சிகாகோ பல்கலையைச் சார்ந்த யோஇசிரோ நம்பு (Yoichiro Nambu)

2. ட்சுகுபா, ஜப்பானின் உயர்சக்தி துகள்முடுக்கி ஆய்வகத்தைச் சேர்ந்த மகோடோ கொபயாஷி
(Makoto Kobayaashi)

3. கியோதோ பல்கலை, ஜப்பானைச் சார்ந்த தொஷிஹிதே மஸ்காவா (Toshihide Maskawa)

இவர்களுக்கு இப்பரிசினை பெற்றுத்தந்த ஆய்வு இயற்கையில் சீர்மை எப்படி தானாக பிளக்கிறது அல்லது உடைகிறது என்பதைப் பற்றியதாகும். சீர்மை என்பது நாம் எல்லோரும் அன்றாடம் உணர்வதுதான். ஒரு உதாரணமாக கடைகளில் அடுக்கடுக்காய் அடுக்கிவைக்கப் பட்ட ஆரஞ்சுப் பழங்கள், சூரியகாந்திப்பூவில் அழகாய் சீராய் அடுக்கப் பட்டுள்ள விதைகள் என்று நாம் அனுதினமும் காண்பவை சீர்மைக்கு காட்டுகளாக கொள்ளலாம். இத்தகைய சீர்மைகளை கணிதத்தில் குரூப் தியரி எனப்படும் தொகுதிகளை ஆய்ந்து அறிகிறோம். இயல்பியலின் பல சமன்பாடுகளை இத்தகைய தொகுதிகளின் அடிப்படையில் வகைப்படுத்த இயலும். அத்தகைய வகைப்படுத்தப் பட்ட சமன்பாடுகளின் சில மாறிலிகளை (invariants) கணிப்பது மிக அழகானதான ஒரு இயல்பியல் வகைபடுத்தலாகும்.
மேற்கண்ட மூவரும் துகள் இயல்பியலின் அடிப்படைச் சமன்பாடுகளில் இயற்கையாக இத்தகைய சீர்மை எப்படி தானாக முறிக்கின்றன என்பதைப் பற்றியதாகும். விவரமாக அடுத்த பதிவில் எழுதுகிறேன்.

இப்பவும் அப்பவும் ...

2008-10-03T00:53:00.001+05:30

நண்பர்கள் வாரணம் ஆயிரம் பாட்டொன்று பற்றி பேசிக்கொண்டிருந்தார்கள். கேட்டபோது ஏனோ இரண்டு மூன்று பழைய பாடல்கள் நினைவுக்கு வருவதை தவிர்க்க முடியவில்லை. என்ன செய்வது....

இதை முதலில் கேளுங்கள்.

ஆனா இது அதுக்கு தாத்தா

ஆனா கடவுள் உலவும் இடம் இங்கே ...

எஞ்சாய்!.

அறிவின் உண்மை

2008-09-14T09:36:00.001+05:30

அறிவிற்கு பல பரிமாணங்கள் உண்டு. பல்லாயிரம் ஆண்டுகளுக்கு முன் மனிதன் கல்லைச் சிதைத்து கூர்முனையாக்கி கோலில் பிணைத்து அடுமா எறிந்து பற்றி உண்டு களித்ததிலிருந்து துவங்குவது அவன் அறிவு. குடி அழைக்கவும், விலங்கு கனி இருப்பிடம் உரைக்கவும், களி கூவவும் உருவாக்கிய மொழி அறிவின் சுமை மிருகமாய் இன்றுவரை உள்ளது. மொழி தன் அழகைக்கண்டு தன்னாட்சி பெறும் முன்னரே காட்சிக் கவன் சொல்லாடல் மானுடத்துக்கு ஓவியமாகவும் பிரதிமைகளாகவும்
உணர் முறையாய் ஆகிவிட்டவை. மானுடத்தின் அடையாளச் செயல்பாடுகளாகிய இவை அனைத்தும் ஆன அறிமுறைகள் மனிதக் குழுக்களின் இருப்பு, பெருப்பு, புவிப் பரவல் என்று நமது வரலாற்றின் கதைதான். இதில் அறிவு என்பது உண்மையாகவும், உண்மை என்பது அறிவியலாகவும் காலப்போக்கில் நடந்த குறுக்கம் இன்று அறிவியலை மனிதனின் அறிவுத்தேடலின் கூர்முனையாக்கி வைத்திருக்கிறது. நமது ஆதி முன்னோர்களின் எறிகோலின் கூர்முனை இன்றைய அறிவியலின் முப்பாட்டன் என்பதை அறிவியல் புழங்குவோரும் அவர் எதிர் வழக்காடுவோரும் என்றும் நினைவிலிருத்துவது தேவை.

இருபத்தி இரண்டு ஆண்டுகளுக்கு முன் ஆய்வுச் சாலையில் என் அறையின் தனிமையில் எழுதிய கவிதை ஒன்று. மூன்று ஆண்டுகளுக்கு முன் ஒரு முறை வலையில் இட்டது. இன்று மறுபடியும்.

ஆய்வுக்கூடத்தின் இழுப்பறைகள்
--------------------------------------------------------------

சீசாக்களில் அடைத்து அடுக்கடுக்காய்த் தேவதைகள்
குளிர் அறைகளின் சுவர்களெங்கும்
இவையன்றோ கோடிகோடி மனிதர்க்கு உணவளித்தன
இவையன்றோ குழந்தைகளின் ஆரோக்கியம் கொடுத்தன
இவையன்றோ மூச்சுக்காற்றையும் எரிபொருளையும்
தீப்பற்றா வீடுகளையும் தந்தன
ஆயினும் ஒரு அதிகாலையில் கண்டேன்
அவற்றின் பற்களில் மனித ரத்தத்தை
அவற்றின் நகங்களூடே மனித தசைத்துணுக்குகளை
அவற்றின் சட்டைப்பைகளில் மனித எலும்பு உதிரிகளை
குளிர் அறையின் மென்மையான சிலுசிலுப்பில்
தேவதைகளின் இளந்தூக்கப்பொழுதில்
நான் பிடுங்கினேன் அவற்றின் பற்களை நகங்களை ஆடைகளை
சீசாக்களை உடைத்து எறியும்முன்
மூடிகளைப் பதுக்கிக்கொண்டேன்
வரும்சீசாக்களுக்கும் பொருந்துகின்றன இதே மூடிகள்

(ஜூலை, 1986)

நண்பர் நாகார்ச்சுனனுடன் நடத்திக் கொண்டிருக்கும் தொடர் உரையாடலின் ஒரு கண்ணி இது.

=

ஒரே ஒரு பின் நவீனத்துவ சுட்டி

2008-07-29T20:43:00.006+05:30

இவ்வளவு நாள் எழுதிய பதிவுகளில் பின் நவீனத்துவம் பற்றி ஒருமுறை கூட நான் எழுதியதில்லை. அறுபதுகளில் இருத்தலியலும் புதுக் கவிதையும், எழுபதுகளில் அந்நியமாதலும் ஹைக்கூவும் எண்பதுகளில் அமைப்பியலும் குறுநாவல்களும் தொண்ணூறுகளில் மாயயதார்த்தமும் பெருங்கதைகளும் இந்த பத்தாண்டில் பின்நவீனத்துவமும் கண்ட கலைப் படைப்புகளுமாக ஒரு பேஷன் ஷோ போல தமிழ் இலக்கியம் தொடர்ந்து மாறிக்கொண்டே இருப்பது. இதில் இலக்கியப் போக்குகளை கவனிக்காமல் நாம் பாட்டுக்கு படித்துக்கொண்டே இருப்பதுதான் எளிதான செயல். தத்துவமும் கலைப்படைப்பும் ஒன்றாக வேறு இயங்குவதால் இன்னும் சற்று உற்சாகம் கூடும் என்பதற்கு இன்றைய இலக்கியங்களே சாட்சி. அதிலும் பின் நவீனத்துவக் கட்டுரைகள் நல்லதொரு வாசிப்பனுபவம். ஆங்கிலம் அறிந்தவர்கள் தமக்கேயான இத்தகைய கட்டுரைகளை தாமே உருவாக்கிக்கொள்ள ஒரு "தானியங்கி கட்டுரை உருவாக்கி" ஒன்றை வடித்துள்ளார்கள்.
கீழ்கண்டதை பக்தியுடன் வாய்விட்டுப் படித்து கடைசி வரியை சொடுக்கவும்.

பாலும் தெளிதேனும்
பாகும் பருப்புமிவை
நாலும் கலந்துனக்கு
நான் தருவேன் - கோலஞ்செய்
துங்கக் கரிமுகத்துத் தூமணியே நீயெனக்கு

பின்நவீக் கருத்தொன்று தா

-

புன்னகையில் மின்சாரம் - கலையும் வடிவும்.

2008-07-15T23:31:00.009+05:30

(அன்றாட மெய்யியல் - 2)
----------------

1. கலையை யாரும் வெற்றிடத்தில் வடிப்பதில்லை. நம் நாட்டுக்கலைகள் முழுவதும் கூட்டுக்கலைகள்தாம். அல்லது கலைஞன் தன்னைத் தானே முன்னிறுத்தாதவைதாம். பாடல்கள், ஆடல்கள், சிற்பம், ஓவியம் என. பலர் சேர்ந்தோ அல்லது பெயரே சொல்லாமலோ வடித்து விட்டுப்போன கலை நிகழ்வுகளே தமிழ் வரலாறு. இயல் சொல்லும் எழுத்து மட்டும் தனியானது. அதுவும் எழுத்து அல்ல. பலருக்கும் எழுதப் படிக்கத் தெரியாது என்பதால் பாடல் தான். சங்கத்திலிருந்து சென்ற நூற்றாண்டு வரை. தனிமனிதன் தன் படைப்பாக்கத்தினால் தூண்டப்பட்டு எழுதி அதை பல படிகளாக தொழில் நுட்பத்தின் உதவியால் புத்தகங்களாக மாற்றி பிரதிகளாக்கி வாசக சந்தைக்கு விற்று ஒரு தனித்துவ மிக்க 'எழுத்தாளனாக' மாறியது தமிழ் வரலாற்றில் மிகச் சமீபத்தில். இன்றும் நிகழ் கலையின் பிரதியான திரைப்படமே நம் மக்களின் அதி முக்கிய கலை நுகர்வுப் பொருள்.
2. தமிழ்த் திரைப்படங்களில் தவிர்க்க முடியாத, என்னைப் பொருத்தவரை தவிர்க்கக் கூடாத, ஒரு கூறான திரைப்பாடல்களைப் படமாக்குதல் பற்றியது இப்பதிவு. என்னைக்கேட்டால் தமிழில் நிகழும் மிகப் பெரிய, அதிக அளவில் படைப்புத் திறமை மிக்க, ஒரே கலை வடிவம் திரைப்பாடல்கள்தான். திரைப்பாடல்களை பாடல், இசை, நடனம், நடிகர்கள், காட்சி அமைப்பு என எல்லாம் அமைந்த ஒரு கலைப் பொதியாகவே நான் அணுகுகிறேன். தமிழ் படங்கள் அனேகமாக நான் பார்ப்பதில்லை. ஆனால் தினமும் சன் மியூசிக் தொலைக்காட்சி தவறாமல் உண்டு. அதனால் அனேகமாக அனைத்துப் பாடல்களும் பார்த்து விடுவேன். இத்தப் பதிவில் எனக்கு மிகவும் பிடித்த ஒரு பாடல் + அதன் படமாக்கல் பற்றி.

3. 1992 ஆம் வருடத்திய ராஜா இசையில் பிரபுதேவா நடனம் கட்டமைத்த "புன்னகையில் மின்சாரம்". ராஜாவைப் பற்றியோ பாடலைப் பற்றியோ அதிகம் சொல்லவேண்டியதில்லை.மொட்டை என்றைக்குமே contemporary தான், சங்கப் பாடல்கள் போல. சீரிளமைத் திறம். மற்றதை பார்ப்போம்.

பிரபு தேவாவின் நடனக் கட்டமைப்பில் எப்போதுமே புவியீர்ப்பு விசை குறைவு. முதன்முதலாக ' லாலாக்கு டோல் டப்பி மா' பாடலை பார்த்தவுடன் மனதில் நிலைத்தது அவர் திரைச் செவ்வகத்தின் பாதி உயரத்தில் ஒரு பக்கத்திலிருந்து மறு பக்கத்துக்கு தரைக்கு மேல் ஒரு இணைகோடாகத் தாவியதுதான். ஒரு கலைஞன் தன் கலைக்கு திருப்பிக் கொடுப்பது அதன் ஆதார வார்த்தைகளை உருவாக்கிச் சேர்ப்பதுதான். (vocabulary ). கலைஞனின் வடிவச் சோதனைகள் சிறந்த படைப்புத் திறம் இருப்பவர்களின் படைப்பில் இயல்பாக நிகழும். இருபதாம் நூற்றாண்டில் ஓவியர்கள் இதை வெளிப்படையாக அறிவித்து நிகழ்த்திக் காட்டினார்கள். ஒவ்வொரு வடிவப் பரிசோதனையும் ஒரு மானிபெஸ்டோவுடன், தர்க்க ரீதியாக , அழகியல் ரீதியாக அறிமுகப் படுத்தப் பட்டது. வடிவமும் உள்ளடக்கமும் பற்றிய விவாதங்களின் நீட்சியாக அவற்றிற்கு உடன் சேர்த்துப் பொருள்கொள்ளத்தக்க வகையில் இவை அமைந்தன. இது கலையின் மெய்யியல் ( Philosophy of Art) கறார்தன்மை பெற மிகவும் உதவியாகவும் இருந்தது. அதை பற்றி பின்னொருமுறை பார்ப்போம். பிரபுதேவா உள்ளிட்ட நடனஅமைப்பாளர்கள் தமிழ் சினிமாவில் சாதித்தது நிறைய. தமிழ்ப் படப் பாடல்பொதிகளின் கூறுமொழி, அதன் அலகுகள் மற்றும் கட்டமைப்பு மிகவும் நுட்பமானது, நாளும் புதுப்பித்துக்கொண்டே இருப்பது.

4. ஒரு ஓவியம் வரைப்படுவது ஒரு செவ்வக திரைப்பரப்பில். அதன் செவ்வக வடிவமே நாம் எப்படி ஓவியத்தை படிக்கிறோம் என்பதைத் தீர்மானிக்கிறது. ஒரு புத்தகம் வரிவரியாக நம்மைப் படிக்கத்தூண்டுகிறது. எழுத்தாளனால் நிகழ்ச்சிகள் ஒன்றன் பின் ஒன்றாக அடுக்கப்படுகின்றன. காலத்தில் ஒன்றன் பின் ஒன்றாக நமக்கு கதையைக் கூறுகிறான் கதை ஆசிரியன். எழுத்து அதனாலேயே லீனியர் - அதாவது நேர்கூறல் வகை சார்ந்தது. ( நான் லீனியர் எழுத்து எனப்படும் வடிவப் பரிசசோதனை பற்றி வேறு ஒரு முறை). ஆனால் ஒரு ஓவியம் அப்படியில்லை. முழுவதுமாக ஒரேயடியாக தன்னை உங்கள் முன் வைக்கிறது. அதை நீங்கள் படிக்க ஒரு வரிசையை அது தீர்மானிப்பதில்லை. உங்களுக்கே விட்டுவிடுகிறது. (ஓவியத்தின் அக ஒழுங்கு பற்றியும் விரிவாக பின்னால்) .
திரைப்படமும் ஒரு செவ்வகத் திரைப்பரப்பில்தான் நமக்கு காட்டப்படுகிறது. ஆனால் இதில் ஓவியம், புத்தகம் இவற்றின் இரு கூறல்முறைகளும் சேர்ந்து விடுகின்றன. அதாவது ஓவியம்போல முழு தாக ஒரு காட்சி அமைப்பு உங்களுக்கு முன்னால் உள்ளது. அந்த ஒரு காட்சியே ஓவியம்போல் ஒரு கதையை நமக்குச் சொல்லவேண்டும். அதோடுகூடி காட்சி, காலத்தில் வேறு மாறுகிறது. அடுத்த அடுத்த காட்சிகள் புத்தகத்தின் அடுத்த அடுத்த வரிகளைப்போல காலத்தில் வருகின்றன. இப்படி ஓவியம், எழுத்து என இரு கலைவடிவங்களையும் உள்ளக்கியது திரைப்படம். அதோடு இசை எனும் இன்னொரு பரிமாணம் கூடுதலாக. இப்படி பல பரிமாணங்களை தன்னுள்ளே கொண்டிருக்கும் ஒரு கலைப் படைப்பை மனிதன் நுகர்வானா, இல்லை இதில் ஏதோ ஒன்றை தேர்ந்தெடுப்பானா?. திரைப்படம் தமிழகத்தின் ஆகப்பெரும்பான்மையான கலைப் பொருளாக இருப்பதில் நமக்குப் பெருமையாக அல்லவா இருக்க வேண்டும்.

5. சரி இந்தப் பாடலுக்கு வருவோம்.

(அ). முதலில் திரைச் செவ்வகத்தை பார்ப்போம். இந்தப்பாடல் காட்சி சாதாரணமாக நமக்குக் காட்டப் படும் திரைக் காட்சி போல நீளம், அகலம், உயரம் என மூன்று பரிமாணங்களைக் காட்டுவதல்ல. இது ஒரு இருபரிமாண கட்டமைப்பு. தமிழக செப்புத்தகட்டுச் சிற்பங்கள் போல (நந்தகோபாலின் ஃபிரண்டல் சிற்பங்கள்). பிரபுதேவா காமிராவை விட்டு தூரப்ப் போவது அல்லது காமிராவை நோக்கி அருகில் வருவது எனும் மூன்றாவது ஆழப் பரிமாணத்தை முடிந்தவரை ஆகக் குறைவாகவே பயன் படுத்துகிறார். நடன அசைவுகள், நகர்வுகள் அனைத்தும் ஏறக்குறைய திரைச் செவ்வகத்தின் குறுக்காகவே இடதிலிருந்து வலது, வலதிலிருந்து இடது என அமைக்கப் பட்டுள்ளன. இது நடனத்திற்கு ஒரு தட்டையான ஸ்டைலைஸ்ட் தன்மையைக் கொடுக்கிறது. இப்பாடலின் பெரும் பலம் அது.

(ஆ). இரண்டாவது நடனத்தைப் பற்றியது.
இசையிலும் நடனத்திலும் இரண்டு இழைகள் உள்ளன. ஒன்று சீராக ஆற்றொழுக்கு போல நழுவும் மொலடியில் அமைந்த பாட்டின் ராகம். இன்னொன்று வெட்டி வெட்டி staccato வாக நிரவும் தாள கதி. ராஜா இதையெல்லாம் அலட்சியமாக செய்வார். ஆனால் பிரபுதேவா அவருக்கு இணையாக காட்டும் திறனைக் காணவேண்டும். நடனக் கட்டமைப்பில் நளினமும் உண்டு, வெட்டி வெட்டி சொடுக்கித் தாவலும் உண்டு. (இதை விஜயகாந்துக்கே அமைக்கும் துணிவு!) . விஜயகாந்தும் பானுபிரியாவும் குறுக்கு நெடுக்காக நகர்வது மெலொடியின் ஏற்ற இறக்கங்களுக்கு ஒத்த காலத் துணுக்குகளில். ஆனால் அவர்கள் கைகள் கால்கள் இயங்குவது தாளத்தின் கதியில். முன்னதை விட இது விரைவானது, வெட்டி வெட்டி அமைந்தது. இரண்டு கால அலகுகளை ஒரே சமயத்தில் அமைத்திருக்கிறார் பிரபு தேவா. அட்டகாசம்.

(இ) மூன்றாவது பின்னணியில் உள்ள மினிமலிஸம். Clutter இல்லாத ஒரு பின்னணி. கூறுபொருள் மட்டுமே வெளித்தெரிய அமைத்த வடிவம். மீண்டும் ஓவியப் பரிசோதனைகள்தான் நினைவுக்கு வருகிறன.
இந்தப் பாடல் வடிவஇயல்வாதிகளுக்கு ஒரு விருந்து. (A formalist delight).

பின்குறிப்பு:
1. தாளத்துக்கு canned loop களைப் பயன்படுத்தி ஹிட் மேல் ஹிட் கொடுக்கும் ஹாரிஸ் ஜெயராஜ் ஒருவாரத்துக்கு தூங்கும் முன் இந்தப் பாடலை ஒருமுறை அதன் தாளகதிக்காக மட்டும் கேட்டால் பரவாயில்லை.
2. அஜீத்தின் பில்லாவுக்கு இந்தப்பாட்டை அப்படியே திரும்பவும் ரீமிக்ஸ் செய்யாமல் படம் பிடித்திருக்கலாம் - ஒரு செபியா பின்னணியில். தூள் பறந்திருக்கும்.ஆனால் பானுபிரியாவுக்கு எங்கே போவது? சரிதான்.
3. இதேபோல ஏறக்குறைய ஸ்பிரிட்டில் உள்ள இன்னொரு பாடல் இது.
http://www.veoh.com/videos/v64804045geq2cap
ஆனால் புன்னகையில் மின்சாரம் போல இல்லை.

இந்தப் பாடலின் இசைக்கோர்வையைப் பற்றி பா.ராகவனின் பதிவு. இதையும் படியுங்கள். முழுமைஅடையும்.

--

அன்றாட மெய்யியல்

2008-07-11T09:34:00.012+05:30

முழுமையின் முயக்கம் (Pretense of the whole )
=======================================

நேற்றைக்கு சில நண்பர்களுடன் செடிகொடிகள் சூழ்ந்த ஒரு இடத்தில் டீ குடித்துக்கொண்டு இருந்தோம். எதிர்பாராமல் ஒரு பட்டாம்பூச்சி படபடத்து முகத்துக்கு அருகில் பறந்தது.
"Here goes another tsunami generator " என்று நான் சொல்ல, சிரித்துக்கொண்டே நண்பன் உடனே
"Watch out, there may be a storm in your tea cup" என்றான். இப்படி நாம் எல்லோரும் கெயாஸ் தியரி பற்றி உளரிக்கொட்டிக்கொண்டு இருப்பதைப் போல கொஞ்சம் மெய்யியலையும் போட்டுப் பார்த்தால் என்ன தோன்றியது. இந்தியாவில் அதுவும் தமிழ் மொழிக்காரர்களுக்கு வாராத மெய்யியலா. அதனால்தான் இந்த அன்றாட மெய்யியல். வெறும் naive உரையாடல் மட்டும்தான். கறாராக வேண்டுமானால் வேறு எப்போதாவது.

ஆதி முதலில் ஆரம்பித்துப் பார்க்கலாம். இப்பொழுதெல்லாம் மதவாதிகள், கலை- இலக்கியக்காரர்கள், சுற்றுச்சூழல் ஆய்வாளர்கள் இவர்களில் ஆரம்பித்து தெருநாய் ஆர்வலர்கள் வரை அனைவருக்கும் இடைவிடாது மெல்லக்கிடைத்த அவல் அறிவியல் போல இருக்கிறது. ஏதேனும் ஒன்று என்றால் உடனே ரிடக் ஷனிஸம், விவிசெக் ஷன் என்று கிளப்பிவிடுகிறார்கள். நாங்கள் எல்லாம் பூரணத்தை பூரணத்துக்குள் திணித்து பூரணமான எங்கள் வாயில் லபக் என்று ஒரே முழுங்கு முழுங்கிவிடுவோம். அறிவியல் மட்டும்தான் பூரணத்தை பொடியாக்கி கால் தொடையெல்லாம் சிந்திக்கொண்டு தப்புத்தப்பாய் சாப்பிடுகிறது என்பது இவர்கள் முனகல். அப்படி என்னதான் அது, அறிவியலின் ரிடக் ஷனிஸப் பிரச்சினை?

இவர்கள் அனைவருக்கும் பொதுவான ஒரு நம்பிக்கை என்னவென்றால் அறிவியல் இயற்கையை அப்படியே முழுமையான ஒன்றாகப் பார்ப்பதில்லை. கூறுபோடுகிறது. அந்த குட்டிக் குட்டி கூறுகளை மட்டும் ஆராய்ந்து ஏதோ புரிந்துகொண்டு அதையெல்லாம் சேர்த்துக்கொள்கிறது. அப்புறம் அந்த முழுமைக்கு பதிலாக இந்தக் கூறுகளைப் பற்றி அறிந்ததையே சேர்த்து வைத்துக்கொண்டு முழுமையை அறிந்து விட்டதுபோல் பாவனை செய்கிறது. இந்தப் பாவனையை எங்களால் தாங்கமுடியவில்லை.
இதுதாங்க விஷயம். ஒரு எடுத்துக்காட்டைப் பார்ப்போம்.

ரசம் வைக்கவேண்டுமானால் என்ன செய்வது. பருப்பு வேகவைத்த தண்ணீர், கரைத்த புளி, உப்பு, பெருங்காயம், எண்ணெய், கருவேப்பிலை, மல்லித் தழை, சீரகம், மிளகு, மிளகாய் இப்படி பலதையும் எடுத்துக் கொள்கிறோம். ஒவ்வொன்றும் தனித்தனியே ஒவ்வொரு சுவை. ரசம் வைத்தாயிற்று. இப்போது ரசத்தின் சுவை என்ன? ரசம் என்பது முழுமை. நாம் பயன்படுத்தும் நானாவிதப் பொருள்களும் அதன் உள்ளுறை கூறுகள். அவற்றின் சுவைகளையெல்லாம் எப்படியாவது சேர்த்தால் ரசத்தின் சுவை வந்துவிடாது. அறிவியல் இப்படி ஒவ்வொரு கூறுகளின் குணங்களை அறிந்துகொண்டு அவற்றைச் சேர்த்தால் முழுமையின் குணங்களையும் முழுதாக அறிந்துவிடலாம் என கருதுகிறது, அது பிழை.

முழுமையின் குணங்களை இப்படி குறுக்கமுடியாது. இந்த குறுக்குப் பார்வைதான் ரிடக் ஷனிஸம். இதுதான் அறிவியலின் மாபெரும்
குறை. என்றைக்கும் அதனால் முழுமையை அறியமுடியாது. அதற்கு ஆன்மீகம் (சாமி?), கலை போன்ற முழுமையைத் தேடும் வழிவகைகள் இருக்கின்றன. சற்றே ஒதுங்கி இரும் பிள்ளாய். அதெல்லாம் நாங்க பாத்துக்கிறோம். சரி, அறிவியலும் கலையும் எப்படி முழுமையைப் பார்க்கின்றன?

-

கடவுளின் போர்வீரர்கள்

2008-07-09T09:27:00.003+05:30

சமுதாயத்தின் எல்லாத் தளங்களிலும் நாத்திகர்கள் எல்லாக் காலத்திலும் அவமானப்படுத்தப் பட்டும், அவர்களுக்கு தகுதியான முறையான இடம் மறுக்கப்பட்டுமே இருக்கிறார்கள். கடவுள் நம்பிக்கையே ஒருவனுக்கு மானுட அறத்தை கற்பித்துவிடும் என்ற இன்னொரு நம்பிக்கையே இதற்கு அடிப்படையாக உள்ளது. மனிதர்கள் சேர்ந்து வாழ கண்டுகொண்ட மக்களாட்சியும் அதன் பல்வேறு அதிகார மையங்களும் இந்த அபத்த நிலையிலிருந்து மாறவில்லை என்பது நாம் அனைவரும் உணர்வதுதான். ஒரு நாட்டின் காவல்துறை, நீதித்துறை, ராணுவம் முதலியவை கடவுள் நம்பிக்கையாளர்களாலும் மதவாதிகளாலும் நிரம்பும் போது அதனால் ஏற்படும் விளைவுகளை சமன்செய்ய வழிகள் வேண்டும். ஆனால் மக்களாட்சி எனும் மெல்லிய போதை புகைமண்டிய சூழல் நம்மை சிந்திக்க விடாமல் மயக்க்ிக்கொண்டிருக்கிறது.

மக்களாட்சியின் த்லைமைப் பீடத்தில் எப்போதும் தன்னை வைத்துப் பார்த்துக்கொள்ளும் அமெரிக்க ராணுவ வீரர் ஒருவர் ஈராக் போரில் பணிசெய்த போது அவரது இறைமறுப்பு நிலைக்காக அவர் ஒதுக்கப் பட்டதையும் , அதனால் அவரது ராணுவ வேலைக்கே வினையாக ஆனதையும் எடுத்துக்காட்டி அமெரிக்க அரசின் மீது வழக்குத் தொடுத்துள்ளார். சி என் என் செய்தி. . அமெரிக்க ராணுவம் ஒரு கிருத்துவ ராணுவம் எனக்கூறும் அவர் இது சட்டத்துக்குப் புறம்பானது என வழக்குத் தொடர்கிறார். வழிபாடு செய்யாவிட்டால் மற்றவர்களிட ம்ிருந்து ஒதுங்கி நிற்கவேண்டும் என்று ஆணையிட்டார்கள் என்றும் கூறுகிறார். இன்னொரு ஓய்வு பெற்ற விமான வீரர் ஒருவர் ஏறக்குறைய 8000 வீரர்கள் கிருத்துவ மதத்தை தழுவ வற்புறுத்தப் படுவதாக தம்மிடம் முறையிடுகிறார்கள் என்று கூறுகிறார். பெண்டகன் ஐ பெண்டகோஸ்டல்கன் என ஏளனம் செய்யும் இவர் உலகின் அனைத்து அமெரிக்கத் தளங்களிலும் இத்தகைய கிருத்துவக் குழுக்களின் உறுப்பினர்கள் உயர் அதிகாரிகளாக உள்ளனர் என அறியப்படுகிறது என்கிறார்.

ஏறக்குறைய ஒரு நூற்றைம்பது ஆண்டுகளுக்குப் பின் மீண்டும் பெரும் ஆத்திக அலை உலகமெங்கும் பரவிக்கொண்டிருக்கிறது. சிக்கலான தற்கால வாழ்வும், பெருகிவரும் பொருளாதார சமூக பிரச்சனைகளும், நவீன வாழ்வு உடைத்தெறிந்த குடும்ப உறவுப் பொதிகளும் ஒரு மனிதனுக்கு ஏற்படுத்தும் கலக்கத்தை கடவுளன்றி வேறு யாரும் சரிசெய்யமுடியுமென்று தெரிய
வில்லை. அதனால் இது ஒரு ஆத்திக நூற்றாண்டாகத்தான் பரிமளிக்கப் போகிறது. நாத்திகச் சேரிகள் உருவாகும் நாள் தொலைவில் இல்லை.

-

firefox 3.0

2008-06-18T18:58:00.002+05:30

நேற்று வெளியிடப்பட்ட ஃப்யர் ஃபாக்ஸ் 3.0 உலவியில் தமிழ் எழுத்துக்கள் தொடர்பான வழு ஒன்று சரி செய்யப்பட்டிருப்பது போல் தெரிகிறதே. இப்போது align justify சரியாகக்கப்பட்டிருக்கிறது எனத் தோன்றுகிறது. பயன்படுத்திப் பாருங்கள். இன்னும் அனைத்து ப்ளக்-இன் களும் ஏட்-ஆன் களும் இற்றைப் படுத்தப் படவில்லை. அதற்கு சில காலம் ஆகலாம்.

உயர் கல்வி, IIT, மற்றும் ...

2008-06-18T11:18:00.001+05:30

-

கடந்த சில தினங்களாக ஐஐடி சேர்க்கை, எஸ்ஸி/எஸ்டி மாணவர்களை கூண்டோடு வெளியேற்றுதல் போன்ற காரணங்களைக் கொண்டு செய்திகள் வந்த வண்ணம் இருக்கின்றன. யாரும் கவலைப்படுவதாகத் தெரியவில்லை. நாட்டில் உயர்கல்வி என்பது அனைத்துத் துறைகளின் முன்னேற்றத்திற்கும் எஞ்சின் போல. நாம் ஐடியில் வல்லரசு, செய்மதி விடுவதில் உலகில் மூன்றாம் இடம், முக்குக்கு முக்கு அணு உலை கட்டி மின்சக்தி பெருக்குவோம் என்றெல்லாம் பெருமைப்படுமுன் முதலில் கல்வி ஒழுங்காக இருக்கிறதா எனப் பார்க்க வேண்டும். நம் நாட்டில் செய்விக்க முடியாத சில மின்னணு பாகங்களை அமெரிக்காவிலிருந்து கடத்தி, நமது எரிகணை ஆய்வுக்கு உதவியதாக நேற்றுத்தான் அமெரிக்க/சிங்கப்பூர் தொடர்புடைய இந்தியத் தொழில் நிறுவனம் ஒன்றின் மேலாளரை அமரிக்க நீதிமன்றம் சிறைக்கு அனுப்பி இருக்கிறது. அந்த நிறுவனமோ நாங்கள் நாட்டுக்காக சேவை செய்தோம் என்கிறார்கள். எல்லோரும் இப்போது சுக நினைப்பில் மிதந்து கொண்டிருக்கும் படி நமது அறிவியல் தொழில் நுட்பவியலாளர்களால் உலகத்தர சாதங்களை வடிவமைக்க இயலுமானால் ஏன் இத்தகைய சாதனங்களைக் கடத்தி மாட்டிக்கொள்ள வேண்டும். நம்மிடம் இருப்பது போதாது எனும் உணர்வு முதலில் வேண்டும். பின்புதான் அதை நிவர்த்திக்க வழிதேடமுடியும். இதில் இப்போது மத்திய அரசின் உயர் ஆய்வுக்கூடங்களில் பணியில் இருக்கும் அறிவியல், நுட்பஇயலாளரும் கூண்டோடு வெளியேறி தனியார் துறைக்குப் போய்க்கொண்டிருக்கிறார்கள் என்று தொடர்ந்து செய்திகள் வருகின்றன. தனியார் துறையில் என்ன உலகத்தரமான ஆராய்ச்சி நடைபெறும் என்பதை அங்கு பணிபுரியும் நண்பர்களை கேட்டு அறிந்து கொள்ளுங்கள்.

அரசு அடிப்படை, இரண்டாம் நிலை (உயர் பள்ளி) கல்வியை சரியாக மக்களுக்கு கொடுக்கட்டும் மீதமெல்லாம் தனியார் கவனித்துக் கொள்வார்கள் என்ற சிறுபிள்ளைத்தனமான வாதங்கள் போக, இருக்கும் ஐஐடி, என்ஐடி போன்ற சற்றே தரமான கல்விக்கூடங்களின் கதி என்ன என்பதே இப்போது பெரும் பிரச்சனையாக உள்ளது. ஐஐடி நுழைவுத்தேர்வின் கட் ஆஃப் மதிப்பெண்கள் இயல்பியல், வேதியியல், கணிதம் இவற்றுக்கு 48, 55, 37 என்று அறிவித்திருந்தாலும், அவர்களே கொடுத்த மதிப்பெண்பட்டியல் படி கணக்கிட்டால் அத் 4, 7, 6 என்று பரிதாபகரமாக இருப்பதைக் காட்டுகிறது என்கிறார் மேற்கண்ட இணைப்பில் ஒரு ஐஐடி பேராசிரியர். என்னதான் நடக்கிறது என்று எல்லோரும் மண்டையை உடைத்துக்கொள்ளும் முன்பு ஒன்றை நினைவில் கொள்ளவேண்டும். தரம் என்பது அந்தந்த வருடத்துக்காக விண்ணப்பிக்கும் மாணவர்களைப் பொருத்தது என்பதுதான். இவ்வளவுதானா சென்ற ஆண்டு நம் அனைத்திந்திய மெரிட் லிஸ்ட் மானவர்களின் தரம் என்று கேள்வி கேட்டால் பதில் ஆம் என்பதுதான். இது மிக போட்டியுள்ள, மாணவர்கள் ஒன்றாம் வகுப்பிலிருந்தே பயிற்சி செய்யும் ஐஐடி நுழைத்தேர்வின் நிலை, ஆய்வகங்களில் உயர் ஆய்வு செய்ய வரும் அறிவியல் நுட்ப மாணவர்களின் தரம் என்னவாக இருக்கும் என்று யூகிக்கத்தான் முடியும்.

-

இயற்கை ஒவ்வாமை

2008-06-12T22:51:00.007+05:30

புல்லாகிப் பூண்டாகி
சிறுபெரு உருவமாய்ப் பலதாகி
இயற்கையாய் குரங்கிலிருந்து வந்த மனிதன்
தன்னைச் சுற்றி
செயல் கையாய் இயக்கி எழுந்தான்
எங்கு கண்டாலும் ஏன் குமைகிறீர்கள்
சக செயற்கை விலங்குகளே?
அபத்தமாய்க் குவிந்து கிடக்கும் மலைகளும்
அர்த்தமன்றி உலவித்திரியும் நதிகளும்
நிறைந்த இப்பூமியைத் தப்ப
ஒரே ஒரு வளை தோண்டி வாழ்கிறேன் நான்
உள்ளே நுழையுமுன்
காலைத் துடைத்து மிதியடியில்
இயற்கையை விட்டு வாரும்

-

இந்திய அறிவியலாளர்கள், கடவுள், மதம், இன்ன பிற ....

2008-06-07T13:29:00.005+05:30

இந்திய அறிவியலாளர்கள் கீழ்கண்டவற்றைப்பற்றி என்ன கருத்துக் கொண்டிருக்கிறார்கள்? ஒரு கருத்துக் கணிப்பு.

1. ஏன் அறிவியல் துறைக்கு வந்தீர்கள்
2. அறிவியல் நோக்கு , பொதுமக்கள் , அரசு
3. அறிவியலில் பெண்கள் நிலை

5. மரபு மருத்துவங்கள்
6. வேத அறிவியல், ஆயுர்வேதம்
7. ராக்கட் விடுவதற்கு திருமலையான் அநுக்கிரகம் கோறல்
8. மரக்கறி

9. ஆன்மீகம்
10. கடவுள்

போன்ற பல முக்கியமான, சமுதாயத்தைப் பாதிக்கும் விஷயங்களைப்பற்றி இந்திய அறிவியலாளர்கள் என்ன நினைக்கிறார்கள். கண்டிப்பாக பொதுமக்கள் கவனத்திற்கு போக வேண்டிய ஒரு கருத்துக் கணிப்பு.

முழுவதும் பெற சுட்டி:

http://cruller.cc.trincoll.edu/NR/rdonlyres/D98B14DA-CC70-4CA2-B270-EA0A6E9B4006/0/WholeIndiaReport.pdf

யாராவது நேரம் இருந்தால் மொழிபெயருங்கள். விவாதிக்க நிறைய இருக்கிறது.

கவிதைகளின் செயல்திறன் : A triptych

2008-06-05T00:04:00.006+05:30

1. நடு:
ஒளிகசியும் கரும்படலங்கள் ஒட்டி
கண்ணாடிகளை நாற்புறமும் ஏற்றி
குளிரூட்டியின் காற்று சிலுசிலுக்க
மெல்லிசை ததும்ப விரையும்
இக்கவிதையின் உள்ளிருந்து
நகரைக் கடக்கையில்
வெப்பமும் தூசியும் கழிவும்
ஊடே மிதக்கும் கனவும்
உள்ளடக்கி அலையும்
மனிதர்களை கவனமாகத் தவிர்த்து
சந்திகளில் கவிதைகளின் நெரிசலில் ஊர்ந்து
நகரில் திரிகையில்

நகரின் பழக்கங்களோ மாறிவிட்டன
கூட்டம் கூடிவந்து
சாலைகளில் நடுவில் விரிந்து
கவிதைகளை வழிமறிக்கின்றார்
எவர்கவிதை எம்மாநிலம் எம்மொழி
எனக்கண்டு வகைபிரித்து
அனுப்புகிறார் வேறுதிக்கில்
சொற்களின் கரும் படலத்தைக் கிழித்து
எழுத்தின் கண்ணாடி இறுக்கத்தை நொறுக்கி
நகரம் தன் முழு விசைச் சுழிப்புடன்
இக்கவிதையின் உள் பாய்ந்து
நம் முகத்தில் அறைகையில்
உணர்வதில்லை நாம்
கவிதையின் திறனை

அரச படைகள் அதிர ஊரும்
தெருக்களின் முனையெங்கும்
எரியூட்டிய கவிதைகள்
கருகிப் புகையும் இக்காலம்
நம் கவிதை விரையும்
செயல்திறனைக் கணிக்கும்
நேரமா நண்பா இது ...

2. வலது:
சொற்களின் உயிர்அரணை முன்செலுத்தி
பதுங்கிமுன்னேறுகிறது எதிரிகள் படை
அரணை துளைக்கும் ஆயுதங்கள் இல்லை
அரணைக் குழப்பும் கொல்லிகள் கண்ட
அறிவியலாளரைக் களப்பலி கொடுத்தோம்
அரணைத் தாவும் விலங்குகள் வளர்த்த
ஆயர்குடிகளை அயல்பெயரச் செய்தோம்
தம்முயிர் ஈந்தும் அரணை சிதைக்கும்
வெல்வலி மாந்தர் சிந்தை கலைத்தோம்
கண்உணரா பொருள் சாந்து பூசி
இணைந்து இணைத்து அரணாய் கட்டிய
இச்சொற்களின் கூட்டத்தை
மொழிந்து ஒலித்து நிறுத்த முயல்

3. இடது:
வித்தின் உன்மத்தமாய்
உறைந்து கிடக்கின்றன சொற்கள்
அறுவடையில் பிரித்தும்
ஆழ விதைத்தும்
காத்திருக்கும் கழனிகளில்
வெடித்து உயரும் பேருருவங்களின்
பார்வையில் தப்ப முயலும் குழுக்கள்
ஆகாது இயலாது நண்பா
ஆழப் பரவி வாழும்
கதிரியக்கம் போல்
கவிதை கலந்த நிலம் நமது
அடுத்தடுத்த தலைமுறைகள்
தப்பாது பரிணாமிக்கும்
எவ்வெவ்வாறோ

பேராசிரியர்: எஸ். கே. ஆர் (Prof. S. K. Rangarajan)

2008-05-17T23:33:00.001+05:30

பேராசிரியர்: எஸ். கே. ஆர்

எஸ்கேஆர் என்றே அறியப்பட்ட பேராசிரியர் கிருஷ்ணமாச்சாரி ரங்கராஜன் கடந்த 29 ஆம் தினம் தம் 75ஆம் அகவையில் காலமானார். இந்திய அறிவியல் கழகத்தில் கனிம வேதியியல் துறையில் பணிபுரிந்தார். மாணவனாக இருக்கும் போது பல முறை அவர் பேசக் கேட்டிருக்கிறேன். இஅக- விற்கு என்று சில தனித்தன்மைகள் உண்டு. அங்கு பணிபுரியும் அறிவியலாளர்களில் பலரும் தம் துறைதவிர பிற அறிவியல் துறைகளிலும் சிறப்பான தேர்ச்சி உடையவர்களாகவும் அத்துறைகளில் சரளமாக இயங்கக் கூடியவர்களாகவும் இருந்தார்கள். அறிவியல் என்பது துறை துறையாய் ஒன்றோடொன்று தொடர்பில்லாமல் பிரிக்கப்பட்ட பெட்டிகளால் ஆனது என்பது போன்ற பொதுப் புத்தி மயமான பிம்பம் அறிவியலாளர் செயல்படும் போது பார்த்தால் முற்றிலும் தகர்ந்துவிடும். இதை நமது ஊடகங்கள் சரிவர மக்களிடம் கொண்டு சேர்ப்பதில்லை.

துறைக்கட்டுகளால் இறுக்கப்படாத அறிவியல் இயக்கத்துக்கு ஒரு எடுத்துக்காட்டு எஸ் ஆர் கே. அவர் வேதியியல் துறையில், குறிப்பாக மின்வேதியியல் துறையில் இயங்கினார். இரும்பு துருப்பிடிப்பது, மின்சேமக்கலன்களின் இயக்கம், முலாம் பூசுதலின் அடிப்படை போன்ற அன்றாட வாழ்வில் காணும் பல பயனுறு செய்கைகள் இத்துறையில் பயிலப்படுகின்றன. ரங்கராஜன் இப்புலத்தின் கணித அமைப்புகளை, அடிப்படைகளை தேர்ந்த்து ஆராய்ந்தவர். குவாண்ட இயங்கியலைலக் கொண்டு மூலக்கூறுகளின் வேதிச் செயல்பாட்டை விளக்கும் பிரிவு குவாண்ட வேதியியல் என்று அழைக்கப் படுகிறது. இதைக்கொண்டே மேற்சொன்ன மின்வேதியியல் இப்போது கட்டமைக்கப் பட்டுள்ளது. இயல்பியலில் இருப்பது போன்றே இத்துறையிலும் கணிதமே இந்த குவாண்டம்மின் வேதியியலுக்கு மொழியாக உள்ளது. ஆனால் இயல்பியலில் பயிலப்படும் குவாண்டம் நிகழ்வுகளும் வேதியியலில் பயிலப்படும் குவாண்டம் நிகழ்வுகளும் வேறு வேறு நீட்டல் அலகுகளில் அமைந்தவை. அதனால் பயன்படுத்தப் படும் கணிதமும் சற்றே வேறுவகையானது. இதைப்பற்றி பின்னர் விரிவாக எழுதலாம். ரங்கராஜன் கணிதத்தில் தேர்ந்த ஒரு அறிவியலாளர், அதனால் இத்துறையில் இயங்குவது இயல்பாக இருந்தது.

ரங்கராஜன் எப்பொழுதும் நிறைய மாணாக்கர்களை பெற்றவரல்லர். எப்போதுமே ஒன்றோ அல்லது இரண்டோ மாணவர்கள்தாம் அவரிடம் முனைவர் பட்டத்திற்காக பயின்று கொண்டிருப்பார்கள். ஆனால் யாரும் அவரிடம் சென்று இயல்பாக உரையாடலாம். எங்களைப் போன்ற பொறியியல் மாணவர்கூட. அனைவருக்கும் இயல்பாக, சரளமாக எதுவும் மிச்சம் வைக்காமல் கொடுக்கும் அறிவுத்திறம் அவருடையது. மிகுந்த மனிதநேயமும் ஆழ்ந்த முற்போக்கு சிந்தனையும் கொண்டவர். மாணவர்களிடமும் தொழிலாளர்களிடமும் நெருக்கமாக இயல்பாக பழகியவர். அவரைப் பற்றி பல நிகழ்வுகளைச் சொல்லலாம். சொல்லாமலும் இருக்கலாம். பல சிறந்த முனைவர் பட்ட ஆய்வுகளை நடத்த வழிகாட்டிய அவர் முனைவர் பட்டமே பெற்றிருக்கவில்லை. இளங்கலைப் பட்டம் மட்டுமே பெற்றிருந்தார். அது வேறு காலம். அப்போது வேறு வகையான அறிவியலாளர்கள் இருந்தார்கள்.

இமையாதிருக்கும் நெடும்பொழுது

2008-05-10T14:48:00.001+05:30

-

-

ஆர்தர் சி கிளார்க் - 90: Arthur C Clarke

2008-03-19T22:47:00.007+05:30

உயர்நுட்ப மாயாவி (Arthur C Clarke)

"மிக்க வளர்சியடந்த உயர்நுட்பத்தை மந்திரவாதத்திலிருந்து வேறுபடுத்திப் பார்ப்பது கடினம்"
என்று எழுதிய அறிபுனை எழுத்தாளர் ஆர்த்தர். சி. க்ளார்க் இன்று மரணமடைந்தார். இவரை நான் எப்படி கண்டுகொண்டேன் என்பது விளையாட்டான ஒரு நிகழ்வு.
எழுபதுகளில் பொள்ளாச்சி ஒரு கிராமம் போலத்தான் இருந்தது. சைக்கிளை எடுத்து ஒரு மிதி மிதித்தால் பதினைந்து இருபது நிமிடத்துக்குள் ஊரின் எந்த எல்லைக்கும் சென்றுவிடலாம். ஊரில் நாலே நாலு திரையரங்குகள்தான். கோடைவிடுமுறையில் பத்தாம் வகுப்பிலிருந்து பதினொன்றாம் வகுப்பு செல்லும் பையனை இன்னும் பொத்திப் பொத்திவைக்கக் கூடாது என்று, 'தம்பியையும் கூட்டிக்கொண்டு ஏதாவது ஒரு சினிமாவுக்குப் போடா' என்று அப்பா விடுதலை அளிக்க தம்பியுடன் சேர்ந்து திட்டம் தீட்டினேன். வீட்டுக்குப் பக்கம் இருப்பது நல்லப்பா தியேட்டர்தான் ஆனால் எம்ஜியார் படங்கள் கோபாலிலோ அல்லது கலைமகள் தியேட்டரிலோதான் வரும். ஆனால் என் வாழ்க்கையின் குறிக்கோள் அப்போதெல்லாம் முறையே : 1. ஒரு சாமியாராவது, 2. ஒரு விஞ்ஞானியாவது. (நல்லவேளையாக இந்த இரண்டு குறிக்கோள்களையும் நான் எட்டவில்லை. ) அதற்காக போஸ்டரில் இரண்டு விண்வெளிவீரர்கள் பூமியின் மீது மிதப்பதைப் போல காத்தியிருப்பதைப் பார்த்து இந்தப் படம்தான் என்று முடிவு செய்து விட்டேன். நான் ஒருமாதிரி தம்பியைத் தேத்தி நல்லப்பாவில் ஆங்கிலப் படத்துக்கு மார்னிங் ஷோ போலாம் என்று மனோவசியம் செய்து விட்டேன். அப்படி சென்றது 2001 A Space Odyssey என்ற படம். படம் முடிந்து தம்பி ரொம்ப கடுப்பாகிவிட்டான். எனக்கும் ஒன்றும் புரியவில்லை. ஆனால் அப்படத்தின் காட்சிகளை நாங்கள் என்றும் மறந்ததும் இல்லை. பின்பு பலமுறை தியேட்டர்களிலும் அடர்வட்டுகளிலும் பார்த்தாலும் அந்த முதல் அனுபவம் புதியதானது. அந்த வருடத்தில் முன்பின்னாக சில அறிபுனை படங்களை நல்லப்பா அரங்கு திரையிட்டது. Logan's Run, Soylent Green போன்ற படங்கள். இவற்றையெல்லாம் வார இறுதி காலைக்காட்சிகளாக என்னையும் சேர்த்து ஒரு 40 அல்லது 50 ஆட்கள் பார்த்தார்கள். இடைவேளை யில் பத்து இருபதுபேர் வெளியேறியும் விடுவார்கள். எதற்காக இதையெல்லாம் தமிழகத்தின் ஒருமூலையில் ஒரு திரையரங்கு காட்டிக்கொண்டிருந்தது, யார் அந்த முடிவை எடுத்தார்கள் என்பதெல்லாம் இன்னும் எனக்கு விளங்கவில்லை.

2001 ஐ இயக்கியவர் ஸ்தான்லி கூப்ரிக். கதை ஆர்தர் சி கிளார்க்கினுடையது. ஹாலிவுட்டின் தலையான படங்களுள் ஒன்று. பிரையன் ஆல்டிஸ் வார்த்தைகளில் சொல்வதானால் அப்போதே அறிபுனை திரிமூர்த்தி டைனோஸார்களில் ஒருவராக கிளார்க் இருந்தார். மற்ற இருவர் ஐஸாக் அசிமாவ், ராபர்ட் ஹைன்லைன். இவர்கள் மூவரும் ஒரு ஆயிரம் கதைகளையாவது எழுதியிருப்பார்கள். தமிழில் அறிபுனை எழுத முயற்சிக்குமுன் நம் நண்பர்கள் இதில் 10% மாவது படித்து விடுவது நல்லது. இதைப்பற்றி பின்னர். இதில் ஐசக் அஸிமாவ் ஒரு எழுத்து இயந்திரம். கதை கட்டுரை என அவர் எழுதிக்குவித்தவை ஏராளம். அஸிமாவ் மூலக்கூறு உயிரியல் கற்றவர். கிளார்க் பொறியியல் கற்றவர். இவர்கள் எழுதும் கதைகளில் அறிவியல் அபத்தங்கள் அனேகமாக இருக்காது. இப்படி நடக்கலாம், இதெல்லாம் கண்டுபிடிக்கப்படலாம் என்ற முன்பார்வை இருக்கும் ஆனால் அடிப்படைத் தவறுகள் செய்யமாட்டார்கள். அதனால் பள்ளி மாணவர்களுக்கு அறிமுகம் செய்ய சரியானவர்கள். அறிவியல் நுட்பம் இவற்றிலிருந்து கிளைபிரிந்து படரும் புனைவும் அழகும் அறியவும் உணரவும் சரியான தொடக்கக் கோடுகள்.
அறிபுனைவுகளை ஒரு கழுகுப் பார்வையில் இரண்டாகப் பிரிக்கலாம். முறையாக அறிவியல் கற்றவர்களால் பெரும்பாலும் எழுதப்படும் கடுஅறிபுனைவுகள். அறிவியல் கற்றவர்களாலும் மற்றவர்களாலும் எழுதப்படும் மென்அறிபுனைவுகள். இக்கூறுபடுத்துதல் ஒரு அரட்டைக்கான முன்னேற்பாடுதான் என்பதை தெரிவித்துக்கொள்கிறேன் - இரண்டிலும் விதிவிலக்குகள் உண்டு. கடுபுனைவுகளில் அறிவியலோ தொழில் நுட்பமோ கறாராக இருக்கும். அறிவியல்/நுட்பம் கற்றவர்களுக்கு இதனால் இத்தகைய கதைகள் பெரும் வாசிப்பு இன்பத்தைத் தரவல்லன. அவ்வளவாக இவற்றில் பயிற்சி இல்லாவிட்டால் ஒரு மொழிபெயர்க்கப் பட்ட கவிதையப் படிப்பது போலத்தான் இருக்கும். அறிவியலும் ஒரு மொழிதான், சொல்லாடல் தான் என்பதை அறிந்தவர்கள் இதை உணர்வார்கள். இத்தகைய கடு புனைவுகளை எழுதுபவர்கள் முன்பு ஆர்தர் சி கிளார்க், வெர்னர் வின்ஞ், ஹால் க்ளமெண்ட், லாரி நிவன், கிரிகோரி பென்போர்ட், க்ரெக் பெர், இவர்களைப் போன்றவர்கள். அனலோக் என்ற அறிபுனை இதழில் அனேகமாக கடுபுனைவுகளே வரும். அவை ஒரு வகைமாதிரியாகவே இப்போதும் உள்ளன. தற்போது இதில் இயன் வாட்ஸன், ஸ்டீபன் பாக்ஸ்டர், ஆலன் ஸ்தீல் என பலர். கிளார்க் இவர்கள் எல்லோருக்கும் மூத்த தலைமுறையைச் சேர்ந்தவர். அறிபுனைவு அடர்காட்டில் அதிர அதிர அலைந்து திரிந்த ஒரு டைனோஸார். எல்லாவிதமான அறிபுனைகளையும் நான் விரும்பிப் படித்தாலும் கடுபுனைவுகள் தரும் இன்பமே தனி.

கிளார்க் எழுதிய சிறுகதைகளும் மிக அருமையானவை. ஆங்கிலத்தில் எழுதப் படிக்கத்தெரிந்த அனைவரும் படித்திருக்கவேண்டும் என்று கூறத்தகுந்த ஒருகதை "கடவுளின் ஒரு பில்லியன் நாமங்கள்" எனும் கதை.நாகார்ஜுனனும் , அகத்தியர் குழும நிறுவுனர் மருத்துவர் ஜெயபாரதி அவர்களும் இதை தமிழில் எழுதிஉள்ளனர். தேடிப் படியுங்கள். எனக்குப் பிடித்த கிளார்க் கதைகள் என்றால், ராந்தேவூ வித் ராமா, 2010, சைல்ட்ஹுட்ஸ் எண்ட் என்பவை. அவருடய கதைகளில் தூவிக்கிடந்த பல நுட்ப கருவிகளும், சூழல்களும் ஹாலிவுட் கடந்த இருபதாண்டுகளாக உருவாக்கித் தள்ளும் பல அறிபுனை திரைப்படங்களில் பயன்படுத்தப்படுவதைப் பார்க்கலாம். சக்கைப்போடுபோடும் டெர்மினேட்டரோ, மாட்றிக்ஸ் படங்களோ, ஏலியன்களோ, 1940-1970 வரை எழுதிய அறிபுனை முன்னோடிகளின் காட்சிப்படுத்துதல் இல்லாமல் சாத்தியமில்லை. விரிவாக எழுதவேண்டிய இழை இது.

அறிபுனைவுகள் நமது சிந்தனைப் பரப்பை வெகு தூரத்துக்கு நீட்டிவிடுகின்றன என்பதே உண்மை.

தமிழில் ஏன் உருப்படியாக ஒரு அறிபுனைவும் இல்லை என்பது பெரிய கேள்விக்குறி. தமிழில் உலகத்தரம் வாய்ந்த சிறுகதைகள் உள்ளன, தற்காலக் கவிதைகள் உள்ளன, நெடுங்கதைகள் உள்ளன. ஆனால் அறிபுனைவுகள் மட்டும்ம சோகையடித்துக் கிடக்கின்றன. ஆனால் இந்திய மொழிகளில் மராத்தியிலும், இந்தியிலும், வங்காளியிலும் உள்ள சில கதைக்கருக்களை அம்மொழி நண்பர்கள் விவரிக்கக் கேட்டிருக்கிறேன். தமிழில் அப்படி ஏதுமில்லை என்பது வருத்தமூட்டும் செய்தி. சுஜாதா எழுதியதெல்லாம் Fanzine அளவுக்கு மேல் இல்லை என்பது அனைவருக்கும் தெரியும். மற்றவர்களைப்பற்றி சொல்லவே வேண்டியது இல்லை. யார் கோபப்பட்டாலும் பரவாயில்லை என்று இதை எழுதவேண்டிய தருணம் வந்துவிட்டது. தமிழகத்தில் எல்லோரும் நிரலாளர் ஆகும் முயற்சியில் ஒரு தலைமுறையே அறிவியலிலும், பொறியியலிலும் மிகவும் பின்தங்கி இருப்பதாகவே படுகிறது. கர்னாடகமும் அதே நிலையில்தான். கல்கத்தா, ஜாதவ்பூர் போன்ற இடங்களில்தான் இயல்பியலும் பூனா போன்ற இடங்களில் தான் பொறி வடிவமைப்பதிலும் முன்னோடியாக இருக்கின்றன. அறிபுனைவுகள் ஒரு ஊக்குக் காரணியாக பயன்படும் பல தளங்களில் இவையும் சில என சொல்லத்தோன்றுகிறது. துப்பறியும் கதைகள் எபிஸ்தமோலஜிகல் விடுதலையைத் தருவதுபோல அறிபுனைவுகள் ஓண்டொலோஜிகல் விடுதலையைத் தருகின்றன. குழந்தைகளின் உலகை நாம் திரும்பப்பெறுவதற்கான முயற்சியின் முதல் அடிகளாக இவை இருக்கக்கூடும்.

1. Wikipedia

2. பிற அறிபுனை எழுத்தாளர்கள் பற்றி:

i. தாயுமாகி நின்றாள்
ii. வாண்டா மெகிந்தாயர்
iii. சில புத்தகங்கள்
iv. ஒக்தோவியா பட்லர்
v. ஸ்தானிஸ்லா லெம்

--

4 கார்ட்டூன்கள்

2008-03-09T23:25:00.006+05:30

அறிவியல் தொடர்பான நான்கு கார்ட்டூன்கள். சற்றே பழையவை ; 1986 ஆம் வருடத்தில் போட்டவை. இவற்றுக்கு முன்பு போட்ட சில கார்ட்டூன்கள் அப்போது வெளிவந்துகொண்டிருந்த ஸயன்ஸ் டுடே இதழில் வெளிவந்தன. அப்போதைய ஆசிரியர் முகுல் ஷர்மா (அவர்தாங்க நம்ம கொங்கொணோ சென்-ஷர்மா இருக்காங்களே அவங்க அப்பா ). கார்ட்டூனுக்கு நூறு ரூபாய் சன்மானம்! அப்போதைய ஸயன்ஸ் டுடே பள்ளி கல்லூரியில் படிக்கும் மாணவர்களுக்கு மிகுந்த உற்சாகத்தை அளிக்கக்கூடியயதாக இருந்தது. 1978 ஆம் ஆண்டு வந்த கருந்துளைகள் (black holes) பற்றிய ஒரு கட்டுரையைப் படித்து நான் வகுப்பில் ஆசிரியர் தினத்தன்று உரையாற்றியது நினைவில் இருக்கிறது.
அருள் மொகொல்வானே என்று கையொப்பம் இட்டுருக்கிறேன். மொகொல்வானே என்பது என்ன மொழிச் சொல் என்றும் அதற்கு என்ன பொருள் என்றும் நீங்களே கண்டுபிடித்துக்கொள்ளவும். ஆனால் அது பொருள் அல்ல. நீங்கள் கண்டுபிடிக்கும் மொழியின் ஒரு சகோதர மொழியில் இன்னும் சற்று நெருக்கமான பொருள். :-)

காளி-தாஸ் 6 கவிதைகள்

2008-03-03T10:53:00.007+05:30

வளரும் பருவத்தில் படித்து வந்தவர்கள் ஒவ்வொருவராக விடைபெறுகிறார்கள்.
ஆத்மாநாம் நடத்திய " ழ " இதழில் 1979 -81 வாக்கில் வெளிவந்த காளி-தாஸ் இன் கவிதைகள் ஆறு. படங்களைச் சொடுக்கவும்.

==

சுஜாதா ...

2008-02-28T00:00:00.003+05:30

சுஜாதாவுக்காக.

நான் கிராமத்தில் நான்காம் வகுப்பு படிக்கும்போது சனிக்கிழமைதான் குமுதம் வரும். வாராவாரம் பிற வீட்டுச் சாமான்களுடன் பொள்ளாச்சியியிலிருந்து அப்பா குமுதம் கல்கண்டு விகடன் எல்லாம் வாங்கி வருவார். குழந்தைகளுக்கு அதெல்லாம் படிக்க அனுமதி கிடையாது. ஆனால் எப்படியும் படித்து விடுவோம். என்ன இருக்கிறது என்று பார்க்கும் ஆர்வம்தான். அப்போது தான் அனிதா இளம் மனைவி வந்துகொண்டிருந்தது. வாரா வாரம் படிப்பேன். அவ்வளவாகப் புரியாவிட்டாலும். மோனிகாவின் மீது சிந்திய பீச்மெல்பா என்பது என்ன என்பது எனக்குத்தெரிய இன்னும் பதினைந்து வருடம் காத்திருந்தேன். ஜனசங் கூட்டத்தினர் பாரத் மாதா கி ஜை என்று கத்தியதை ஒரு பசுமாடு சந்தேகத்துடன் திரும்பிப் பார்த்தது என்று எழுதியது இன்னும் நினைவில் இருக்கிறது. He was irreverent to the core. அப்போதெல்லாம் குமுதம் உள்ளங்கை அளவில் பத்துப்பதினைந்து பக்கம் இலவச இணைப்பு ஒன்று கொடுப்பார்கள். வாரியார் கதைகள் ஆரம்பித்து என்னென்னமோ வரும். அதில் ஒஉ இலவச இணைப்பாக வந்ததுதான் சுஜாதாவின் "பிளேன் ஓட்டக்கற்றுக் கொண்டேன்". இந்த குட்டிப் பிரசுரத்தை பல ஆண்டுகள் நான் ஏனோ வைத்திருந்தேன். அப்புறம் சில ஆண்டுகள் கழித்து தினமணிக்கதிரில் வானமெனும் வீதியிலே எழுதினார். இவையெல்லாம் பள்ளிப் பருவத்தில் ஒரு சிறுவனின் மனதில் ஏற்படுத்தக்கூடிய தாக்கங்கள் பல ஆண்டுகள் கழித்துத்தான் அவர்களுக்கே புலனாகும். உயர்பள்ளியில் முற்றிலுமாக சிறுபத்திரிக்கைகள் வசம் சென்றுவிட்டேன். அங்கேயும் சுஜாதா இல்லாமல் போய்விடவில்லை. அதுக்கப்புறம் எவ்வளவோ எழுதினார். அவர் எழுதியதில் ஒரு 70 சதம் படித்திருப்பேன். இப்போதைக்குப் போதும். சென்றுவாருங்கள் சுஜாதா. அனைத்துக்கும் நன்றி.

Flush The Lit.

2008-02-19T23:12:00.002+05:30

அய்ம்பது ஆண்டுகால திராவிட இயக்கங்களால் முற்றிலுமாக கலையுணர்வு சிதைக்கப்பட்டு, திரிக்கப்பட்ட அழகுணர்ச்சியோடு, எம் முன்னோர்களின் மகா காவியங்களையும் பெரும் உள்ளொளி கண்ட உயர் இலக்கியங்களையும் தேறாமல் மெக்காலே வழியில் மூளைச்சலவை செய்யப்பட்ட வெற்று அறிவியலும், நுட்பமும், மருத்துவமும், நிரலாண்மையும் போன்ற அறவலியற்ற போலி அறிவுப்புலங்களை மனனித்து சோற்றுக்காய் அறிவை விற்றுப் பிழைக்கும் பெருந்தமிழ்க்கூட்டமாகிய நாங்கள், .........

கடும் உழைப்பாளிகளும் , பெரும் படிப்பாளர்களும், சிலுவையென எங்களுக்காய்ச் சுமந்து எம் பண்பாட்டு பாரமனைத்தும் இழுத்தலையும் தமிழ் இலக்கிய சிருஷ்டிப் பிதாமகற்கு சொல்லதெல்லாம்,

leave us alone.

ஒரு பேச்சுக்கு கேட்கிறேன், இருபதாம் நூற்றாண்டு தமிழ் இலக்கியமனைத்தையும் (ஆமாமா , பாரதி உட்படத்தான் ) தூக்கிக் கடாசிவிட்டால் தமிழ் மொழிக்கு ஏதாவது இழப்பா என்ன? பின்ன ஏம்பா இந்தச் சலம்பு சலம்புறிய.

project madurai - மதுரைத் திட்டம்

2008-01-23T20:52:00.000+05:30

நண்பர்களே

மதுரைத்திட்டம் எனப்படும் தமிழ் இலக்கியத் தளம் "ஹேக்" செய்யப்பட்டது என்றும் அதில் ஏற்றப்பட்டிருந்த தமிழ் ஆக்கங்கள் முடக்கப்பத்துள்ளதாகவும் ஓசை செல்ல வருந்தி எழுதி இருந்தார்.

மதுரைத் திட்டத் தலைவர் கல்யாணசுந்தரம் இன்று அகத்தியர் (http://groups.yahoo.com/group/agathiyar/) மற்றும் தமிழ் உலகம்( http://groups.yahoo.com/group/tamil-ulagam/) இணையக்குழுமங்களில் திட்டத் தரவுகள் பாதுகாப்பாக இருப்பதாகவும், இன்னொரு இடைமுகத்துடன் வெள்ளோட்டத்தில் உள்ளதென்றும் தெரிவித்திருக்கிறார். அதன் சுட்டி இதோ:

http://www.projectm adurai.org. vt.edu/newpm2/

திரு கல்யாணசுந்தரத்தின் மடல்:

----------
Dear Friends:

We are aware that for the past few days tamil.net webserver
is no longer accessible (from which Project Madurai website
was running). We do not know yet the reasons. I have
written to Bala Pillai and to the webmaster for details.

No need to worry about loosing PM website altogether.
Project Madurai is very much aliver and we will make sure
that its etext collections are available free on the Net all
the time ;-)

We have been working recently on a new/revamped version
of Project Madurai website. You can view the beta version
of this site at

http://www.projectm adurai.org. vt.edu/newpm2/

We are planning to move this version to tamil.net version as
when it is available. We are also exploring the possibiliity
of running Project Madurai website from an independent
web hosting account of our own. We will post the details
soon.

In the mean time, Project Madurai etexts can be accessed
from the above test version running from Virginia Tech Univ.

We also have mirror sites of Project Madurai running from
Digital LIbrary of India webservers located at IISc, Bangalore

http://bharani. dli.ernet. in/pmadurai

and from the INFITT website

http://www.infitt. org/pmadurai

anbudan
Kalyan

இ. தி. 61 ?

2008-01-07T17:32:00.000+05:30

போட்டா போட்டி ..

-

சே, வர வர யாரு எதச்செய்யரதுன்னு வகைதொகையில்லாமப் போச்சு. இனி இவனுங்களோடவேற போட்டி போடணுமா ...

taare zameen par - ஐ முன் வைத்து சில குறிப்புகள்

2007-12-29T23:04:00.000+05:30

1. திரையரங்கில் சென்று நான் பார்த்த திரைப்படங்கள் கடந்த பத்துப் பதினைந்து ஆண்டுகளில் நாலைந்துதான் இருக்கும். (அதில் மூன்று லோர்ட் ஆப் த ரிங்ஸ்). பையனுக்கு விடுமுறை விட்டவுடன் ஒரு படத்துக்கு கூட்டிப் போகிறேன் என்று சொல்லியிருந்தேன். இது அவனுக்கு திரையரங்கில் இரண்டாவது படம். அவனும் அம்மாவும் சேர்ந்து பக்கத்தில் 'தாரே ஜமீன் பர்' ஓடுது போலாம் என்று முடிவு செய்துவிட்டார்கள். ஹிந்திப் படம் என்பதால் பலியாடு போல நானும் தலையை ஆட்டிவிட்டேன். இதுவரை ஆமீர் கான் படம் பாத்ததில்லை. 'ஆத்தி க்யா கண்டாலா' பாட்டு பாத்து மட்டும், பரவாயில்லை அண்ணே அண்ணே சிப்பாய் அண்ணே போல இந்திக்காரங்களுக்கும் தைரியமாக இசையமைக்க வருது போல இருக்குது என்று நினைத்திருக்கிறேன். மத்தபடி ஷியாம் பெனகல், ஸ்மீதா பட்டேல், அந்தக்கால அமிதாப், 'பன்னா கி தமன்னா' மும்தாஜ் - ஓட முடிந்தது நம்ம இந்தி சினிமா.

2. நம்ம பதிவர்கள் பலபேர் இந்தப்படத்தை பற்றி எழுதியிருக்கிறார்கள். நான் எதிர்பார்க்கவே இல்லை, நல்ல படம். கதை இப்போதே எல்லோருக்கும் தெரிந்திருக்கும். படம் பார்க்கும்போது பையன் எப்படா "நம்ம அப்பா போலவே இல்ல அம்மா?" என்று சொல்லிவிடுவானோ என்று பயந்துகொண்டே பார்த்தேன். முடிந்தவுடன் கேட்டதுக்கு நீ அப்பிடியெல்லாம் இல்லை என்று சொன்னானோ பிழைத்தேனோ. மேலும் அவன் அம்மாவுக்கும் எனக்கும் நடுவில் உட்கார்ந்திருந்தான். எனக்கு புரியாத போதெல்லாம் மொழிபெயர்த்ததும் அவன்தான். பல சமயங்களில் கண்கலங்கியது உண்மைதான். ஆனால் பையன் படத்தை இயல்பாக சிரித்துக்கொண்டேதான் பார்த்தான். நான் பார்த்தவரை குழந்தைகள் யாரும் படத்தைப் பார்த்து வருந்தியதாகவோ அழுததாகவோ தெரியவில்லை. ஆனால் வளர்ந்தவர்கள் ஏறக்குறைய எல்லோரும் ஒருவித இறுக்கத்துடனும், கலக்கத்துடனும் தான் வெளியே வந்தார்கள். திரைப்படத்தின் நாயகனான தர்ஷீல் படும் இடர்களைவிட, ஒவ்வொருவருள்ளும் தாம் இழந்த, தாம் பிறரை இழக்கத்தூண்டிக்கொண்டிருக்கும், வாழ்வின் வகையறியாத் தருணங்களை மீண்டும் காண்பதால் பீரிடும் தன்னிரக்கம் தான் காரணம் என்று தோன்றுகிறது. படத்தில் சில அபாரமான காட்சிகளும் நிகழ்வுகளும் உள்ளன. ஒரு சிறுவனுக்கு ஐஸ் கேண்டி வாங்கிக்கொடுத்து தன் தோளில் அமர்த்திச் செல்லும் ஒரு சட்டையில்லாத் தொழிலாளியின் நடை பலகாலம் எனக்கு நினைவில் இருக்கும்.

3. சொற்கள், சொற்கள் சொற்கள் என எங்கும் என்றும் எல்லோராலும் இடைவிடாது இறுக்கி அடுக்கப்பட்டு மானுடமே திணறிக்கொண்டிருக்கும் காலம் நமது. சொற்கள் இன்றி அறிவு இல்லை, அன்பு இல்லை, கனவு இல்லை, காட்சி இல்லை என சொற்களின் சர்வாதிகாரம் உலுக்கும் நமது வாழ்வில் காண், கேள், தொடு புலன்கள் ஏதோ நாம் பரிணாமத்தில் கழற்றிப்போட்ட முட்டையின் ஓடுபோல சிதறிப்போய்விட்டன. மனிதனின் திறமையை, திறனை அளக்கும் கோல்கள் எல்லாம் சொற்களின் கூட்டச் சுமைகளாகவே இருக்கும்வரை பெரும்பான்மை மழைலையர் நம் சமுதாயத்தின் பார்வையில் தோற்றவர்களாகவே கருதப்படுவர். தேர்வுகளில் தோற்றல் என்பது ஒரு குழந்தையின் மானுடத்திற்கே விடப்படும் சவால் என்பதை உணரும் வரை எத்தகைய கல்விச் சீர்திருத்தங்களாலும் எதுவும் சாதித்துவிடமுடியாது.

4. சொற்களைச் செயலற்றதாக ஆக்கும் ஆக்கங்கள் எப்படிச்செய்யலாம்? சொற்களின் கூட்டங்கள் தூண்டும் நேர்கோட்டுச் சிந்தனையை, அது கட்டும் அறிவின் அடுக்குகளை, அறியும் முறைகளை எவ்வாறு செயலிழக்கச் செய்வது? கூத்தும் இசையும், கூத்தின் முறையும் காட்டும் அனைவரிடமும் சொல்லக் கதைகள் உள்ளனவா மனிதனிடம் இன்னும்? மையமழித்த சொல்லாடல்கள், குவியமறுக்கும் தர்க்கக் கோர்வுகள், எழுத்துகளாகச் சிதைந்த சொற்கூட்டங்கள் என நவயுகத்துக் கலைமுயற்சிகளை உள்வாங்கிச் செரித்து மேனடுக்குகளை உருவாக்கிக்கொண்டிருக்கிறது இன்றைய அறிவியல் - அடுத்த கட்ட, அடுத்த தள அறிவடுக்குகள் எவை? முன்பு அலைத்துப் போட்ட அதே கச்சாப்பொருள்களைக்கொண்டே அறிவுப்புலங்களும், கலைத் தேர்வுகளும் புதுக்க, வடிவமைக்கப் பட்டுக்கொண்டிருக்கின்றன. மாற்றுச் சிந்தனைமுறைகள் என அடையாளப்படுத்தப் பட்டவை தழையுரமாக்கப் பட்டு விளைந்த விருட்சங்களின் காடு சூழ் உலகு இன்றையது. அதனுள் உறங்கும் குறளிகளை எழுப்ப இன்றைய தொழில் நுட்பம் விரவிய சூழலை எப்படி கலைப்பார்கள் நம் கலையார்வலர்கள்?

5. நம் அனைவருக்கும் குழந்தைகள் பிடிக்கிறார்கள். அவர்களுக்காக நாம் உருவாக்கிக்கொண்டிருக்கும் உலகம் யாருக்குமே பிடிக்கவில்லை. குழந்தைகள் நமக்காக ஒரு உலகை உருவாக்கிக் கொண்டிருக்கிறார்கள். அதற்கான அழைப்புகள் நமக்குப் புரிவதில்லை. புரிந்துகொள்ளும் முயற்சியில் பெரியவர்கள் எடுக்கும் முதல் தளிர்நடைகளில் ஒன்று இந்தத் திரைப்படம். பல தடுமாற்றங்கள் உள்ளன. மதிப்பெண்கள் குறித்த போட்டிகளை எதிர்க்கும் ஒரு கதையில் அத்தகைய போட்டிகளில் பங்கெடுக்க இயலாத, தேவையில்லாத ஒரு குழந்தை மற்றொரு 'போட்டியில்' வெல்வதே படத்தின் உச்சகட்டக் காட்சி. நிஜ வாழ்வில் ' வெற்றி' என்ற சொல்லையே கேட்கத் தேவையில்லாத வாழ்வே இக்குழந்தைகளுக்கு நாம் அளிக்கும் ஒரே அர்த்தமுள்ள தேர்வாக இருக்கமுடியும்.

6. சிறப்பான ஒளிப்பதிவு. நிறைய ஹார்மோனிகா, கிதார் இழையும் ப்ரொக்ரெஸிவ் ராக் போன்ற இசை , அவசரப்படாத படக்கோர்ப்பு, சிறுவனின் அருமையான நடிப்பு என பல வகைகளிலும் நல்ல படம்.

7. சொற்களை எதிர்த்துப் பேசும் இடுகையில் எத்தனை சொற்கள் !

இ.தி. 60?

2007-12-05T23:49:00.000+05:30

" ங்கா...ங்கா...ங்கா... "

" உஷ்..., லொட லொடன்னு பேசாம எல்லாத்தையும் நல்லா கவனிச்சுப்ப பாருடா. இல்லைன்னா வளர்ந்தப்புறம் ஒரு குரங்கோடக் கூட போட்டிபோட முடியாது... "

Chimps beat humans in memory test
http://news.bbc.co.uk/2/hi/science/nature/7124156.stm

கார்டூன்கள் - சில கருத்துகள்...

2007-07-29T00:47:00.000+05:30

-

சென்ற இடுகையின் மிக நீஈஈஈஈண்டுவி ட்ட ஒரு பின்னோட்டம் அடுத்த இடுகையின் முன்னுரையாக இங்கு:

>> கார்ட்டூன் வரைவதும் படம் வரைவதும் ஒன்றா?

நம் எல்லோருக்குமே தெரியும். நிச்சயம் வேறு வேறுதான். ஆனால் இங்கு கார்ட்டூன் பற்றி நான் எழுதியது அவற்றையே நிறைய என் பதிவில் போட்டிருப்பதால் - எடுத்துக்காட்ட உதவியாய். பலவகைப் படங்கள் இப்பதிவில் இருக்கின்றன, இல்லஸ்ட்ரேஷன் போலவும். ஆனால் அவை குறைவு. மேலும் அவை பெயின்ட் மட்டும் கொண்டு வரையப்பட்டவை அல்ல. அதனால் இந்த இடுகைக்கு மட்டும் கார்ட்டூன் = வரைதல் சரியா.

பதிவிற்கு வெளியில் பேசினால் வரைகலை என்பதே பெரும் நிலப்பரப்பு. ஒரு ஓவியத்தை எளிதாக அணுக வரைதல் + தீற்றல் (sketching+painting) எனப் பிரிக்கலாம். சிலர் வரைதலில் சிறப்பாக இருப்பார்கள். சிலர் தீற்றலில். ஆனால் வரைதல்தான் அடிப்படை என்பதிலிருந்து மாறி நவீன ஓவியம் பல ஓவியர்களின் முயற்சிகளுக்குப் பின் வெறும் தீற்றலாகவும் இருக்கலாம் என்ற முறைக்கு கடந்த மூன்று நூற்றாண்டுகளாக நகர்ந்து வந்துவிட்டது. இப்போது வரைதல் ஒரு stylised/stylish genre. கருப்பு வெள்ளைப் படங்களைப் போல. தனிப்பட்டமுறையில் பேப்பர், துணி இவற்றில் நான் ஒரு வரைவன். நல்ல தீற்றன் அல்ல. ஆனால் கணினி தீற்றலை நன்கு கற்றுக்கொள்ள பொறுமை இல்லாதிருக்கும் என்னைப்போன்ற சோம்பேறிகளுக்கும் நல்ல தீற்றும் சாத்தியத்தை அளித்திருக்கிறது. :-)

>> கார்ட்டூன் என்பது வரைதலுடன் நின்று விடுகிறதா அல்லது வரைதலில் துவங்குகிறதா?

கார்ட்டூனில் வெறும் வரைதல் மட்டுமே இருக்கும் மொழியில்லாக் கார்ட்டூகள் உண்டு. வரைதலில் துவங்கி மொழியைச் சேர்த்து முழுமை பெரும் கார்ட்டூன்கள். மொழியே இல்லாமல் வரைதல் மட்டும் கொண்டு ஆனால் மொழியின் அர்த்தத்துடன் இருக்கும் விஷுவல் பன்னிங் வகை கார்ட்டூன்கள் உண்டு. Punning is the lowest form of humour - இல்லையா; இந்தகாரணத்துக்காகவே ஹிந்துவின் கேசவ் சில சமயம் கொஞ்சம் எரிச்சலூட்டக்கூடிய கார்ட்டூனிஸ்ட்.

>> வரையத் தெரிந்தால் கார்ட்டூனிஸ்ட் ஆகிவிடலாமா? கார்ட்டூன் வரைய மேட்டர் பிடிப்பது எப்படி?

வரையத் தெரிந்தால் மட்டுமே கார்ட்டூனிஸ்ட் ஆக முடியாது இல்லையா. சற்றே அபத்தத்தை உணரும் மனநிலை வேண்டும். சற்று அபத்தம், சற்று அனைத்து அதிகார எதிர்ப்பு, சற்று எள்ளல் தன்மை, சற்று முட்டாள்தனம் எல்லாம் இயல்பாக கலந்தால்தான் நல்ல கார்ட்டூன். மேட்டர் விஷயம் ரொம்ப சுலபம். நாம் வாழும் அனைத்துக் கணங்களும், அனைத்து நிகழ்வுகளும் முன்னே சொன்ன அபத்தம், எதிர்ப்பு,.. இன்னபிற கூறுகளுடன்தான் இருக்கின்றன அல்லவா. அதை உணரத் தெரிந்தால் போதும். என் இந்தப் பதிவில் நிறைய அறிவியல் தொடர்பான கார்ட்டூன்கள் இருக்கின்றன. அவை வேண்டும் என்றே ஒரு சீரியஸான அறிவியல் பார்வையை உடைத்து எனக்கு நானே உள்வாங்கிக்கொள்ள நான் பயன்படுத்தும் வழிமுறைகள். அந்த வகையில் அவை மிகவும் பெர்சனல் எனக்கொள்ளலாம். மற்றவை பல வகையில் playing to the gallery. தப்பில்லை இல்லையா. :-)

>> படத்தை மறைத்துவிட்டு வாசகத்தைப் படித்தாலோ அல்லது வாசகத்தை மறைத்து விட்டு படத்தைப் பார்த்தாலோ கார்ட்டூன் விளங்கக் கூடாது என்று ஒரு இலக்கணத்தை, குமாரி கமலாவின் வீட்டுக்காரரும், மால்குடிக்காரரின் இளையருமான லெச்சுமண் ஒரு முறை சொன்னார், அது பற்றி உங்கள் கருத்து என்ன?

அவரின் கார்ட்டூன்களில் இருந்தே இதற்கு மறுதலைகளைக் காட்டலாம். எழுபதுகளில் இருந்து அவரது கார்ட்டூன்களை பார்த்துக்கொண்டே இருக்கிறேன்.
அவரது ஒரு பேட்டர்ன் பார்க்கலாம்:
ஒரு இடிந்த கூடிச் சுவர், கீழே தரையில் கிழிந்த துணியும், கலைந்த தலை,தாடியுடன் ஒரு ஏழை ஒருக்களித்து தரையில் கிடக்கிறான். பின்னணியில் ஒரு குடிசை. பக்கத்தில் ஒரு மாங்கரெல் நாய் ... இரண்டு பேண்ட், மூக்குக் கண்ணாடி போட்ட மீசையில்லாத அரசு அலுவலர் இருவர்.
கீழே இரண்டு நாட்களுக்கு முன் அரசு அறிவித்த திட்டத்தைப் பற்றி ஒரு கிண்டல் வாக்கியம். இதுதான் டெம்ப்ளேட். இந்தப்படத்தை வைத்து கடந்த முப்பது வருஷத்தில் அவர் ஒரு ஐயாயிரம் கார்ட்டூன் போட்டிருப்பாரா? இந்த கிரியேட்டிவிட்டி எனும் கலைஞர்களின் சிருஷ்டித்தன்மை பற்றி அறிவியலில் சில முக்கியமான கருத்துப் பரிமாற்றங்கள் உண்டு. அவற்றை பரவலாக்க வேண்டும். தத்துவ பூச்சாண்டி காட்டுவதற்காக அல்ல. இந்த சிருஷ்டித்தன்மைக்கும் ஒரு இரைதேடும் எறும்பின் தேடலுக்கும் இருக்கும் வித்தியாசங்களைப் (அப்படி ஏதாவது இருந்தால்) புரிந்து கொள்ள.

-

இரண்டு நிமிடத்தில் கார்ட்டூன் போடுவது எப்படி?

2007-07-27T23:51:00.000+05:30

(படிக்கப் பொறுமை இல்லை என்றால் கடைசியில் ஒரு குட்டி வீடியோ சுட்டி உள்ளது. பாருங்கள்)

பெயின்ட் செயலி பயன்படுத்தி வரைகலை போட்டி நடக்கிறது. புதிதாக பழகும் நண்பர்களுக்கு இந்தச் செயலியின் மூலம் என்னென்ன சாத்தியங்கள் என்று காட்ட என்னுடைய பழைய இடுகைகளுக்கு சில சுட்டிகள் கொடுத்திருந்தேன். இனி நான் கற்றுக்கொண்டது - எனக்குத் தெரிந்த அளவு:

பெரும்பாலும் நான் இயல்வகை (ரியலிச) ஓவியங்கள் வரைய வேண்டுமானால் பெயின்ட் செயலியை பயன்படுத்துவது இல்லை- இணையத்தில் அதிவேகத்தில் கார்ட்டூன் போட மட்டும்தான். மொத்தம் 5-10 நிமிடங்களுக்கு மேல் எடுக்கக்கூடாது. ஒரு இடுகையை எழுதி இடுவதைவிட இது வேகமான வழி என்பதால் பல சமயங்களில் ஒரு கிறுக்கு கிறுக்கி சொல்ல வந்ததை இட்டுவிட்டு ஓடிவிடுவேன்.

இங்கு நான் பாவிக்கும் சில வழிமுறைகளைச் சொல்லுகிறேன். யாருக்கேனும் பயன்பட்டால் மகிழ்ச்சி.

அ. கணினி எலியை ஒரு வரைகோலாக பயன்படுத்துவது பற்றி:

1. இதுவே போதும். பழகப் பழக நன்றாக வரும். சாதாரண ஒரு எலியே போதும். லேசர் எலியோ, பிற விலை அதிகமான எலிகளோ தேவையில்லை.
2. மேசை பரப்பு போன்ற எத்தகைய பரப்பும் சரிதான். ஒரு கட்டி அட்டை போட்ட 80 பக்க நோட்டுப் புத்தமே சிறந்த எலித்தளம்.
3. முதலிலேயே பென்சில்- தாள் கொண்டு வரையத்தெரிந்தால் நலம். எவ்வளவு நன்றாக உங்களால் பென்சிலில் வரையமுடியுமோ, அவ்வளவுக்கு எலியில் கற்றுக்கொள்ள நேரம் குறையும்.
4. தப்புத் தப்பாக வந்தால் கவலைப் படாதீர்கள். பழகப் பழக வரும். நீங்கள் செய்த தவறுகளைக் கண்டு பிடிக்க மற்றவருக்கும் வரையத் தெரிய வேண்டும். பெரும்பாலும் எல்லோரும் நல்லா இருக்கு என்றுதான் சொல்வார்கள். :-)
5. நன்றாக பென்சில் கொண்டு வரையத் தெரிந்தவரானால் ஒரு வரைதளம் - மின்னெழுதி (டேப்லெட்) வாங்கலாம். விலை அதிகம். வாங்காமல் இருப்பது நல்லது.

ஆ. தவறுகள் செய்வது தவறல்ல. அதை எத்தனை விரைவில் எளிதாகக் களைகிறோம் என்பதுதான் முக்கியம். அதற்காக ஒரு வீடியோ இறுதியில் உள்ளது. இரண்டு நிமிடம் செய்த வேலையில் எத்தனைமுறை தவறி அதை சரி செய்திருக்கிறேன் என்று பாருங்கள். (இது நாலு நிமிடம் ஓடும். ஆனால் 2 நிமிடத்தில் போட்டதுதான்). தவறுகளை பட்டியலிட்டுள்ளேன்.

இ. பொதுவாக ஒரு கார்ட்டூன் போடுவதில் இருக்கும் படிகள்:

1. விரைவான வரைகோட்டு கீற்றுதல்
2. பின்னால் வண்ணங்களை வெள்ளமாக நிரப்பப் போகிறோம். அதாவது ஒரு பரப்பை ஒரே நிறம் கொண்டு ஒரு சொடுக்கில் நிரப்புதல். இதை "ஃபிளட் ஃபில்" என்பார்கள். இதில் ஒரு மூடிய கோட்டுப் பரப்பை செயலி நிரப்பிவிடும்.
3. ஒரே வண்ணம் நிரப்பவேண்டிய மூடிய கோட்டுப் பரப்புகள் மூடி இருக்கின்றனவா என சோதித்தல். காட்டாக இந்த வீடியோவில் முகம், சட்டை, தலை முடி, மூக்குக் கண்ணாடி போன்றைவை.
4. அவை மூடிய கோட்டுப்பரப்புகளாக இல்லாவிட்டால் அவற்றை சிறு கோடிகளைக் கொண்டு மூடுதல்.
5. நிறங்களை நிரப்புதல்.
6. தவறுகளைக் களைதல் - அநேகமாக சிறு கோடுகளால் மூடுதல். இதற்கு உருப்பெருக்கியைப் பயன்படுத்துங்கள்.
7. மீண்டும் நிறங்களால் நிரப்புதல்.

திரும்பத் திரும்ப 2-7 படிகளை செய்தல். அவ்வளவுதான்.

ஈ. மீண்டும் நினைவு படுத்த:

1. வேகமாக வரைதல்
2. மூடிய பரப்புகளுக்காக சோதித்தல்
3. வண்ணம் நிரப்புதல்
4. உருப்பெருக்கி மூடா பரப்புகளை மூடுதல்
5. மீண்டும் வண்ணம் நிரப்புதல்.

உ. வண்ணங்களைப் பற்றி:

பின்னால் இன்னொருமுறை எழுதுகிறேன்.
முடிந்தவரை குறைந்த எண்ணிக்கையில் பயன்படுத்துங்கள்.
மங்கலான வண்ணங்களைப் பயன்படுத்துங்கள்.

நிறைய வண்ணங்களைப் பயன்படுத்தவும், பளிச்சென்ற வண்ணங்களைப் பயன்படுத்தவும் ஒரு ஒழுக்கம் வேண்டும். அது பழகப் பழக வரும்.

http://media.putfile.com/show1-40

-

-

-

பாடு -> பொருள்

2007-07-25T15:33:00.000+05:30

-

கற்றதனாலாய பயனென்? கொல்
கொல் என ஆயுதம் செய்தலா
வெற்றிநம் குழுகூட்டம் முழக்கு
தட்டிப் பேரண்டம் கொய்தலா
ஆங்கோரேழைக்கு எழுத்தரைவைத்து
விண்ணப்பம் நிரப்பலா.

என்கொணர்ந்தாய் பாணாநீ
எனக்கேட்டால் நம்கவிதை
எட்டுத்திக்கும் சென்றிங்கு கொணர்ந்து
சேர்த்த மட்டிலாக் கடவுளர்
றாழ் தொழார் எனின் ஆமழல்
எங்கே பிறந்தாலும் என்?

இங்கே வெந்து தணிந்தது
மழையில் நனைத்த தார் ரோடு

-

சிருஷ்டி கழித்தல்

2007-07-24T21:52:00.000+05:30

-

ஞாயிறு மதியம்
திருப்தியாய் சாப்பிட்டு
சன்னலருகில் சாய்நாற்காலியில்
முயங்கிக் கிடந்தேன்.

நல்ல கவிதை ஒன்று வந்தது.
தன்னியல்புக்கேற்ப தன்னைத்தானே எழுதிக்கொள்ள
தாளையும் எழுதுகோலையும் தேடியது.
அலங்கோலமான அறையில் எனக்கே கிடைக்கா அவை.
காணாமல் சோர்ந்துபோய் மிதியடியில் தடுக்கி வீழ்ந்தது.

கெட்ட கவிதை ஒன்று வந்தது
முகத்தில் நீரடித்து
முடியைப் பிடித்து அதட்டி எழுப்பி
'எழுதடா' என்றது.
பீறிட்டெழுந்த
கறங்கு வெள்ளருவிப் பாய்ச்சலில்
எத்தனை எழுதினேன்
எனக்கே எண்ணிக்கை தெரியவில்லை.

-

Microsoft Paint - மைக்ரொசாப்ட் பெயின்ட் (குறிப்புகள்)

2007-07-24T12:23:00.000+05:30

நண்பர்களுக்கு
இப்பொழுது நடந்துகொண்டிருக்கும் வரைகலை போட்டியை ஒட்டி சிந்தாநதி இந்த பதிவை இட்டுள்ளார். இதில் மைக்ரோஸாப்ட் பெயின்ட் செயலியைப் பயன்படுத்தி எப்படி படம் போடுவது என்று விளக்கியுள்ளார்.
நான் பல வரைகலை செயலிகளைப் பயன்படுத்தினாலும், MS-PAINT கொண்டே வரைந்த பெரும்பாலான சித்திரங்களை என் பதிவில் இட்டுள்ளேன்.
நம்முடைய பல முயற்சிகளுக்கும் இந்த செயலியே போதுமானது.
இந்த செயலியைக்கொண்டு என்னவெல்லாம் செய்யமுடியும் என்பதை செயல் முறையில் காட்ட சில சுட்டிகளை கீழே கொடுத்துள்ளேன்.
நண்பர்களுக்கு பயன்படலாம்.
(சுட்டிகளில் வழவழ என்று நிறைய வார்த்தைகளும் இருக்கும். அதையெல்லாம் படிக்காமல் படங்களை மட்டும் பார்க்கவும்)
எல்லாமே சாதாரண ஒரு எலியைக் கொண்டு வரைந்தவைதான்.
என் பதிவில் இருக்கும் பிற படங்கள் வேறு செயலிகளைக்கொண்டு வரைந்தவை. அவை layering, gradients போன்ற அடுத்த நிலை வசதிகளைக்கொண்டு வரைந்தவை.
வினாக்கள் இருந்தால் பட்டறையில் மட்டிக்கொள்ளுவேன். (:-)
(குறிப்பு: போட்டியில் எனது எந்தப் படமும் இல்லை)
போட்டியில் ஈடுபடும் நண்பர்களுக்கு வாழ்த்து.

எண்களின்மீது சொடுக்கவும்.

அ.

1
2
3
4
5
6
7
8
9

ஆ.

1
2
3

இ.

1
2
3
4
5
6
7
8
9
10
11
12
13
14
15
16

(போதும்.....)
(எ-கலப்பையில் தமிழ் தட்டச்சுவது எப்படி என்ற தலைப்பில் என் அனைத்து இடுகைகளுக்கும் இணைப்புக் கொடுத்து ஒரு இடுகை போடமாட்டேன் என்று உறுதியளிக்கிறேன்)

--

பரம்பரைச் சொத்து

2007-06-27T13:37:00.000+05:30

அரசர்களாலும் பிற முற்காலச் செல்வந்தர்களாலும் நிறுவப்பட்டு காலங்காலமாக மக்களின் கூலியில் வளர்ந்த கோயில்களும் வழிபாட்டுத்தலங்களும், பூசாரிகளின் பரம்பரைச் சொத்துகள் தான் என்பதையே நமது நீதிமன்றங்களும் 'மதச் சம்பிரதாயம்' என்ற பெயரில் இப்போது அடிக்கோடிட்டு கூறிக்கொண்டு இருக்கின்றன.

அப்படி என்னதான் வழிவழியாக கருவறைக்குள் நடக்கிறது என்று யாராலும் கண்டுபிடிக்க முடிவதில்லை. இப்படி ஏதாவது நடந்தால் ஒழிய:

( இன்றைய டெக்கான் ஹெரால்டில் இருந்து ):

While deposing before the three-member Justice K S Paripoornan Commission inquiring into the irregularities in the Devaswom Board in Kochi on Monday, Kantararu Mohanaru was asked whether the pujas at Sabarimala were being conducted properly.
Mohanaru: They are done without much problems.
Commn: Do you know Sanskrit?
Mohanaru: No
Commn: Then how come you were an expert member in the board which interviewed priests?
Mohanaru: I gave marks only for the pujas.
Commn: Have you studied tantras and mantras?
Mohanaru: We have traditionally been ...
Commn: Tradition and all are fine. Just because the father is king the son need not become king. Do you know the vedas?
Mohanaru: No
Commn: Do you know the Veda mantras?
Mohanaru: No
Commn: Do you know Bhagya Sooktham?
Mohanaru: No
Commn: Then how do you do pujas in Sabarimala?
Mohanaru: There, we don’t conduct pujas using these mantras.
Commn: Don’t you conduct Ganapathy Homam and other pujas there?
Mohanaru: I do it myself with some other mantras.
Commn: But isn’t Bhagyasooktham an essential element of Ganapathy Homam. Ok let it go. Do you know the star in which Ganapathy was born ?
Mohanaru: No.
“This is surprising. This concerns the affairs of the lord and the devotees of a great temple.
We do not want to ask you more questions. In fact, we did not intend to ask all these... circumstances forced us to.
We wanted to know more. But we are not troubling you,’’ a truly stunned Justice Paripoornan and Justice B M Thulasidas remarked.
Former Central Bureau of Investigation director D Karthikeyan is the third member of the commission.

எந்தக்கோயிலை யார் சுத்திகரிப்புச் செய்வது?

certain dreams .....

2007-06-20T22:51:00.000+05:30

சில நிகழ்வுகளைப் பார்த்து சும்மா இருக்க முடிவதில்லை ....

" This is an all new attempt ... the certainty dream ...."

Or is it certitude mr. president?

-

bangalore bio 2007

2007-06-13T11:33:00.000+05:30

இந்தியாவின் தகவல் தொழில் நுட்பத் துறை ஓரளவு உலகளவில் இன்று தரம் நிறைந்ததாகவும் சந்தையில் நிலைத்துப் போட்டியிடக்கூடிய அளவில் வலிமை மிக்கதாகவும் இருக்கிறது. எந்திரங்கள், உந்துவண்டிகள், உதிரிப்பாகங்கள் என பிற வனை பொருள் உற்பத்தியிலும் கடந்த ஓரிரு வருடங்களில் இந்தியா பெரும் வளர்ச்சியைக் கண்டுள்ளது. சைனா அளவில் இல்லாவிட்டாலும் வனைபொருள் உற்பத்தி இப்போது மிக அதிக வளர்ச்சிவிகிதம் கண்டுள்ளது. ஏற்றுமதிக்கான உற்பத்தி என்பதே இப்போது சிறு மற்றும் இடைநிலை தொழிற் கூடங்களின் மந்திரமாக இருப்பதை பெங்களூர் போன்ற நகரங்களின் தொழிற்பேட்டைகளில் காணக்கூடியதாக இருக்கிறது.

இப்படி தகவல் தொழில்நுட்பம் போன்று ஒரே துறையில் மட்டுமின்றி பரந்துபட்ட தொழில் வளர்ச்சி நாட்டின் பல பகுதிகளின் வளர்ச்சிச் சமநிலையைப் பேணுவதற்கு மிகவும் தேவையான் ஒன்றாகும். சென்னை, புனே, நோய்டா போன்ற நகரங்கள் இப்படி வளர்ச்சியில் முன்னணியில் இருக்கின்றன. இந்த சூழலில் பெங்களூர், ஹைதராபாத் போன்ற நகரங்கள் உயிரியல் சார்ந்த துறைகளில் தொழில் வளர்ச்சியுறுவதை ஒரு முக்கிய திட்டமாக செயல்படுத்துவதைக் காணமுடிகிறது. சென்னையில் உயிரியல்தொழிற் பூங்கா ஒன்று ஏற்படுத்தி பல வருடங்கள் ஆனாலும் இன்னும் அந்நகரம் முன்னணியில் வரவில்லை என்பதையே சொல்லவேண்டும். தமிழக அரசு செய்யவேண்டியது இத்துறையில் நிரம்ப இருக்கிறது. கோவை, மதுரை போன்ற அடுத்த மட்ட நகரங்களிலும் இத்துறை வளர இப்போதே திட்டமிட்டால் நன்றாக இருக்கும்.ு

பெங்களூரில் சென்ற வாரம் நடைபெற்ற பெங்களூர் பையோ 2007 என்ற ஒரு தொழிற்காட்சி மற்றும் கருத்தரங்கு சிறப்பாகவே நடைபெற்றது. கேட்ட சில உரைகளைப் பற்றிபின்னர் நேரம் கிடைக்கும் போது தொடர்கிறேன். முழு விவரம் இத்தளத்தில் : http://www.bangalorebio.in/

சில படங்கள்:

Kurt Vonnegut

2007-04-13T01:40:00.000+05:30

எங்கள் தலைமுறையில் நாங்கள் மிகவும் அனுபவித்துப் படித்த மற்றொரு அறிபுனை எழுத்தாளர் காலமானார்.

விவரங்கள் இங்கே
(http://en.wikipedia.org/wiki/Kurt_Vonnegut)

=====================
>There is nothing intelligent to say about a massacre.

>The waitress brought me another drink. She wanted to light my hurricane lamp again. I wouldn't let her. "Can you see anything in the dark, with your sunglasses on?" she asked me.
"The big show is inside my head," I said

>I am a humanist, which means, in part, that I have tried to behave decently without any expectation of rewards or punishments after I’m dead.

>So it goes.

======================

As good as it comes; As good when it goes. Bye.
- Arul

தொடரும் சுடர் ...

2007-03-27T22:09:00.000+05:30

சாகரனின் சுடரை எனக்குக் கடத்தியது தேன்துளி பத்மா. ஏதோ ஆறுமாசத்துக்கு ஒரு கார்ட்டூன் என்று ஒப்பேத்தலாம் என்று இருந்தால் இப்படி கேள்விகளால் உலுக்கி விட்டார். உங்கள் பாடு. அனுபவியுங்கள்.
(கல்யாணுக்கு அஞ்சலிகளுடன்)

===========================================
1. ஜீன் தெரபி போன்ற சிகிச்சை முறைகள் பலரால் அணுகக்கூட முடியாத அளவு மிகவும் அதிக பொர்ருள் தேவையாய் இருக்கிறது. உலகின் பல மக்களால் அதிகம் உபயோகிக்க முடியாத சிகிச்சை முறைகளில் ஆராய்ச்சி செய்வது பற்றி உங்கள் கருத்து என்ன?
===========================================

உயிர் காக்கும் ஆதார மருந்துகளின் விலை இப்போது இந்தியாவில் மிக அதிகமாக உயர்ந்துள்ளது. ஆண்டிபயாடிக் மருந்துகள், உதாரணமாக தற்போது வ்ந்துள்ள ஃப்ளாக்ஸாஸின் குடும்பத்தைச் சேர்ந்த சிப்ரோ, லிவொ வகை மாத்திரைகள் ஒன்று 3 ரூ முதல் 27 ரூ வ்ரை விற்கின்றன. மருத்துவர்கள் ஏழைகளுக்கு இவற்றைத் தர இயலுவதில்லை. இப்படி பல ப்ரோட் ஸ்பெக்ட்ரம் ஆண்டிபயாட்டிக்குகளே, உயிர்காக்கும் generic மருந்துகளே நாடு தழுவிய பொது சுகாதர மருத்துவக் கட்டமைப்புக்குள் அனைவருக்கும் அடையமுடியாத அளவில் இருக்கின்றன.

அனைத்து கிராமங்களிலும் பொது சுகாதார மையங்கள், ஒருங்கிணைக்கப் பட்ட தாய்சேய் நல மையங்கள் என்பது நமது அரசின் முதன்மைத் திட்டங்களில் ஒன்றாக வரவேண்டும். இதற்கான திட்ட ஒதுக்கீடும் செயல்முறையும் இப்போதும் மிகக் குறைந்த அளவே இருக்கிறது என்றே கருதுகிறேன். இதில் வேதனையான நிகழ்வு எனில் பல மாநிலங்கள் தமக்கு ஒதுக்கப் பட்ட நிதியைச் செலவழிக்கத் தெரியாமல் திருப்பி அனுப்புவதுதான். நமது சமுதாய, அரசியல் சட்டகம் இன்னும் நாடுதழுவிய செயல்பாடுகளுக்கான முதிர்ச்சியை அடையவில்லை என்பதையே இது காட்டுகிறது. பொருள்,மூலதனம், பணம் என்பது ஒரு தடைக்கல்லென்றால் நமது மக்கள் மூலதனமே இன்னும் பயிற்றுவிக்கப் பட வேண்டியதாக இருக்கிறது. ஓரளவு விஷயம் தெரிந்தவர்கள் நிறைய இருக்கும் நமது நாட்டிலேயே இதுதான் நிலமை. இதில் மற்ற வளரும், ஏழை நாடுகளின் நிலைமை சொல்லமுடியாது.
.
எனவே பொருள் மட்டுமே ஒரு தடை அல்ல என்றே நினைக்கிறேன். இந்த நோக்கில் பார்க்கும்போது மறுபுறம் நீங்கள் குறிப்பிடும் நிறுவனமயப் படுத்தப்பட்ட அறிவியல் பெரும் நிதி சார்ந்தும், அமைப்புகள் சார்ந்துமே இயங்கவேண்டியுள்ளது. (நமது நாட்டின் அறிவியல் அமைப்புகளுக்குள்ளேயும் இந்த விவாதங்கள் எப்போதும் நடந்துகொண்டிருப்பது உங்களுக்குத் தெரியும். எழுபதுகளில் எல்லோரும் பேசிய 'sudra science Vs brahmin science', எண்பதுகளில் ராஜீவ் அரசின் போது விவாதிக்கப்பட்ட 'blue sky research' பற்றிய விமரிசனங்கள் என நமது அறிவியல் அமைப்புக்குள்ளும் கடும் விவாதங்கள் விமரிசங்கள் நடந்துள்ளன. பரவலாக மக்களுக்கு அவை கொண்டு செல்லப் படவோ, மக்கள் ஊடங்கங்களில் விவாதிக்கப் படவோ இல்லை. இப்போது எல்லாமே ஐ.டி என்பதால் அறிவியல் பற்றி யாரும் கவலைப் படுவதும் இல்லை என்பது சோகம். ) காசநோய், எய்ட்ஸ், மலேரியா போன்ற நோய்களுக்கான அடிப்படை ஆராய்ச்சிகள் இன்னும் பலப்படுத்தவேண்டிய நேரத்தில் ஜெனடிக் தெரபி பற்றி நாம் ஆராய வேண்டுமா என்பது நியாயமான கேள்விதான். (இது ஒரு சரியான அரசியல் கேள்வியும்கூட).

ஆனால் அதே சமயம் பணம் என்பதோ, மூலதனம் என்பதோ உலகில் இன்று பற்றாக்குறையானது அல்ல என்பதும் கசக்கும் உண்மை. மலையளவு மூலதனம் இன்று உலகெங்கும் தன்னை பெருக்க வேண்டி சுற்றிக்கொண்டு இருக்கிறது. உலகு முழுவதும் ஒரு முதலாளித்துவ அமைப்பில் கட்டப்பட்டுக்கொண்டிருக்கும் இக்காலத்தில் அதை எப்படி மிக அதிகமான ஏழை மக்களுக்குத் தேவையான, இணக்கமான காரியங்களுக்கு பயன்படுத்தும் படி நாம் கொள்கைத் திட்டங்களை வகுக்கமுடியும் என்பதை கருத்தில் கொள்ளவேண்டும். இதனாலேயே அரசியல் வாதிகளை நான் இகழ்வது இல்லை. அவர்களால் நிறைய காரியங்கள் செய்ய முடியும், சரியான படி மக்களும் ஊடகங்களும் இயங்கும்போது நமது அரசியல்வாதிகளே நல்ல திட்டங்களை முன்னெடுக்கும் காரணிகளாகவும் இருப்பார்கள் - இருந்திருக்கிறார்கள்.

====================================
2. ஏதேனும் ஒரு அறிவியல் புனைவொன்று உண்மையாக மாறக்கூடிய வாய்ப்பிருந்தால் எந்த புனைவு உண்மையாகவேண்டுமென்று ஆசைப்படுவீர்கள்?
===================================

அய்யய்யோ. இப்படி ஒரு கேள்வியா.
அறிவியல் புனைவுகளின் 'புது அலை' அறுபதுகளில் துவங்கியது. ஜே.ஜே, பலார்ட்டின் அப்போதைய (1962) manifesto வில் ஒரு பகுதி :

" Science fiction should turn its back on space, on interstellar travel, extra terrestial life forms, galactic wars and the overlap of these ideas that spreads across the margins of nine - tenths of magazine s.f. Greater writer though he was, I am convinced that HG Wells has had a disastrous influence on the subsequent course of science fiction...

Similarly I think science fiction should jettison its present narrative forms and plots ...

The biggest developments of the immediate future wil take place not on the moon or mars, but on earth, and it is the inner space, not outer that needs to be explored. The only truly alien planet is Earth... "

தொடர்ந்து வந்த அறிபுனைவுகளின் பாய்ச்சல் பல பரிமாணங்களில் விரிந்தது. (மீண்டும் லூகாஸின் ஸ்டார்வார்ஸும், ஸ்பீல்பெர்க்கின் திரில்- எ- மினிட் கதையாடலும் அறிபுனைவுகளை முற்றிலுமாக திரைப்படங்களில் கைமா செய்யும் வரை- அதற்குப் பின் நடந்தவை ஒரு பெரும் காண்டம்)

அறிவியல் புனைவுகள் பலவும் விளையாட்டுப் போல இருந்தாலும் அவை நாம் நம்பும், எடுக்கும் சில அடிப்படை நிலைபாடுகளை குலைப்பவையாகவே இருக்கின்றன. எனக்குப் பிடித்த அறிபுனைவுகள் என ஒரு முப்பது, நாற்பது நெடுங் கதைகளைச் சொல்லலாம். அவற்றில் எது உண்மையில் நடந்தாலும் அத்தகைய ஒரு சூழலில் வாழாமல் இருப்பதே நாம் செய்த புண்ணியம் போல இருக்கும். அறிபுனைவுகளிலும், 'மிக இனிமையான பாடல்கள் மிகச் சோகமானவைதான்'.

=========================================
3. மதனின் கார்ட்டூன்களை நான் அதிகம் சிலாகித்தது இல்லை. உங்கள் பார்வையில் இந்தியாவின் சிறந்த கார்ட்டூனிஸ்டாக யாரைக் கருதுவீர்கள்? சமீபத்தில் இங்கே நீரிழிவு நோயால் பாதிக்கப்பட்ட 12 வயது சகோதரர்கள் அந்த நோயைப்பற்றி, அதன் தன்மையை பற்றி எப்படி கவனமாக இருக்க வேண்டும் என்பது பற்றி கார்ட்டூன்கள் கொண்ட புத்தகம் ஒன்ரை தயாரித்திருக்கிறார்கள். அது போல பொதுவாக விழிப்புணர்வு ஏற்படுத்தும் கார்ட்டூன்களை வரையவேண்டுமென்று உங்களைப் பணித்தால் எது முதலிடம் பெறும்?
=================================

இந்தியாவில் கார்ட்டூனிஸ்ட்கள் என்றால் - இறந்து போன அபு ஆபிரகாம், ஓ.வி.விஜயன் போன்ற மலையாள கார்ட்டூனிஸ்டுகள் பிடிக்கும். மஞ்சுளா பத்மனாபனும் மிக நல்ல கார்டூனிஸ்ட். ஆர்கே லட்சுமணன் is too literal for me.
இரண்டாவது கேள்வி பற்றி - சில காலமாக நானே யோசித்துக்கொண்டிருந்தேன். இப்படி யோசித்து யோசித்து செயல்படுத்தாமல் விட்டது ஏகப்பட்டது இருக்கிறது. வெட்கமாகத்தான் இருக்கிறது. நண்பர்கள் அறிவார்கள். நிச்சயமாக முதலிடம் மற்றுமல்ல ஒரே இடம் அதற்குத்தான்.

====================================
4. மொழி என்பதே மனிதன் தன் எண்ணத்தை பிறருக்கு சொல்ல ஏற்படுத்தியதுதான். எண்ணத்தை வெளிப்படுத்த அடுத்தவருக்கும் புரியும் வண்ணம் அது சைகை மொழியானாலும் உபயோகிப்பதே சரி. அமெரிக்காவில் எந்த மொழி பேசுபவரானாலும் ஒரு அவசர நிலை வரும் போது அவருடைய மொழியில் எப்படி பாதுகாத்துக்கொள்வது என்பதையும் ட்ராமா(trauma) நிலையில் அந்த மொழியில் பேசுவதே பலன் என்று கருதி பல மொழிபெயர்ப்பாளர்கள் உதவியை நாடி பல திட்டங்களை தமிழ் உட்பட பல மொழிகளில் மொழிபெயர்க்கிறார்கள். இது என் மொழி இல்லை என்று பாகுபாடு இல்லாமல் என் ஊருக்கு வந்து வரி செலுத்தும் உன்னை கவனிப்பது என் கடமை என்று கவனமாக (to also avoid law suit) இருக்கிறார்கள். ஆனால் நம் ஊரில் இந்த அணுகுமுறை இல்லாதது ஏன்?
=======================================

நாம் சுதந்திரம் அடைந்து இத்தனை வருடங்களாகியும் அரசு நம்மிடம் அந்நிய மொழியில்தான் பேசுகிறது. நமது சட்டங்கள், நமது தகவல் சாதனங்கள், அரசு இயந்திரம் அனைத்தும் ஒரு குடிமகனுக்கு அந்நியமாகவே இருக்கின்றன. சமீபத்தில் தமிழகத்தில் நீதிமன்றதில் தமிழ் மொழியாக இருக்கவேண்டுமென்ற கோரிக்கையை உச்சநீதிமன்றம் மறுத்து விட்டது. இயல்பாக நடக்கவேண்டிய எதையும் ஏதோ தேச எதிர்ப்பு இயக்கம்போல நடத்தித்தான் பெறவேண்டும் என்பது நமது நாட்டின் சாபம் போலும். ஆயிரக்கணக்கான் வருட பழைமையான மொழிகள் தமிழ், கன்னடம், தெலுங்கு இப்படி பல இருக்கும் நமது நாட்டில் ஏன் இந்த நிலைமை என்று எனக்குப் புரியவில்லை.
நமது நாட்டில் விற்கப்படும் அனைத்து உணவு, மருந்து பொருள்களுக்கும் உறையில் அந்தந்த மாநில மொழிகளில் குறிப்புகள் இருக்கவேண்டும் என சட்டமியற்றுவது கடினமா? ஏன் இதை நாம் இன்னும் செய்யாமல் இருக்கிறோம். முதல் படியாக இதைச் செய்தால் கூடப் போதும். பல காரியங்களை மாநில அளவிலும் செய்யலாம். ஆதார சுகாதார நிலையங்கள், மதிய உணவுக் கூடங்கள் என ஊடுறுவி இருக்கும் அரசின் அமைப்புகளை மாநில அரசுகள் செய்தித் தொடர்புக்கும், சிறு நலக் கையேடுகளை பரப்புவதற்க்கும் பயன்படுத்தலாம். முன்பு பயன்படுத்தியும் இருக்கின்றன. ஆனால் போதாது என்பதே இன்றைய நிலை. தமிழகம் போன்ற மாநிலங்கள் பரவாயில்லை என்றே சொல்ல வேண்டும். அமைப்பே இல்லாத பல மாநிலங்களில் நிலைமை மிக மோசம்.

============================
5. விளையாட்டு வீரர்கள், திரைப்பட தொழிலில் இருப்பவர்களுக்கு இருக்கும் புகழும் பொருளும், அறிவியல் துறைக்கு இல்லாமல் இருப்பது உங்களை எப்போதாவது வியக்க வைத்திருக்கிறதா?(இது அமெரிக்காவிற்கும் பொருந்தும்) ஒரு மூறை ராஜீவ் பிரதமராக இருந்த போது நேரிடயாகவே AICC யில் எங்களிடம் நாங்கள் ஏன் ஆராய்ச்சியாளார்களை கண்டு கொள்ள வேண்டும். கடைசியில் தேர்தல் அன்று வாக்கு போடக்கூட வரமாட்டீர்கள் என்று சொன்னது நினைவுக்கு வருகிறது. அறிவியல் ஆராய்ச்சியாளர்களால் வாக்கு வங்கியை மாற்ற முடியாத நிலைதான் காரணமா?
==========================

அறிவியல் துறைக்கு புகழும் பொருளும் இல்லை என்பது உண்மைதான். ஆனால் அது எனக்கு வியப்பாக இல்லை. அறிவியல் என்பது ஒரு இயல்பான மனிதத் தன்மை என்பதை நாம் மறந்துவிடவே பயிற்றுவிக்கப் ப்ட்டுள்ளோம். அறிவியல் படித்தல் ஒரு சிலரே செய்யும் ஒரு வினோதமான வழக்கம், பொதுவான மனித இயல்புக்கு மாறான ஒன்று என்று ஒரு கற்பிதம். எல்லாக் குழந்தைகளும் ஓயாது சூழலை அறிந்துகொள்ள கேள்வி கேட்கின்றன, எல்லாக் குழந்தைகளும் படங்கள் வரைகின்றன, பாட்டுப் பாடுகின்றன, விளையாடித் தீர்க்கின்றன. ஒரு மனிதக் குழந்தைக்கு இயல்பானது எதுவும் வளர்ந்த மனிதனுக்கும் இயல்பானதுதான். வளர வளர இவற்றில் ஏதாவது ஒன்றைத் தேர்ந்தெடுத்து அதில் மட்டுமே சிறக்கவேண்டும் என்பது மனித இயல்புக்கு முற்றிலும் மாறானது. எந்த வயதிலும் பாட்டுப் பாடுபவர்களாகவும், படம் போடுபவர்களாககவும், கதை சொல்பவர்களாகவும், மீண்டும் மீண்டும் அனத்தையும் அறிந்து கொள்ள கேள்விகள் கேட்பவர்களாகவும் நாம் அனைவரும் இருப்பதே மனிதனின் இயல்பான நிலை. இதை அனைவரும் புரிந்து கொள்ளும் போது ஏதாவது ஒரு துறையில் சிறந்தவர்களை மட்டுமே உயர்த்திப் பிடிப்பதும் முட்டாள்கள் போல் ரசிகர் மன்றம் வைப்பதும் குறைந்து போகும். ஆனால் சிலவற்றை கேளிக்கை என்றும் மற்றதை ஒரு சீரியஸ் விஷமென்றும் தோற்றப் படுத்துவதாலேயே இந்த நிலை வந்திருக்கிறது. அறிவியலில் இல்லாத கேளிக்கையா? ஒரு நல்ல அறிவியல் கோட்பாட்டை புரிந்துகொள்ளும் போது வரும் போதை (கள்வெறி எனும் பாரதியின் வார்த்தை!) க்கு ஈடாக எதைச் சொல்ல முடியும்? அறிவியல் என்பது விளையாட்டுப் போல புத்துணர்ச்சி தருவது, பாடலைப் போல கிறங்க அடிப்பது, ஒரு கதையைப் போல உறவாடக்கூடியது ஒரு ஓவியத்தைப் போல மிதக்க வைப்பது என்ற ஒரு உணர்வை நாம் நம் இளைஞர்களுக்கும் வளர்ந்தவர்களுக்கும் உணரச் செய்ய தவறிவிட்டோம். அறிவியல் கடினம் என்பது மற்றொரு மாயை. எல்லாமே கடினம்தான். நன்றாக சமையல் செய்வது கூட மிகக் கடினமான ஒரு வேலைதான். எல்லா அம்மாக்களும் செய்வதால் சமைப்பது என்பதை மலினப் படுத்த முடியாது. இதில் பீடி சுழற்றும் நடிகர்களும், மலைகளை, காடுகளை ஆன்மீக ரியல் எஸ்ட்டேட்டாக மாற்றி மோட்சப் பிலிம் காட்டும் இன்கார்பரேட்டட் சாமியார்களும் படு பிரபலமாக இருப்பதில் நமக்கென்ன நட்டம் என்று இருக்கவேண்டியதுதான்.

அறிவியல் துறைக்காரர்கள் பொருள் இன்றி இருப்பது பற்றி: சென்ற நூற்றாண்டின் துவக்க ஆண்டுகளிலும் நடந்த இயல்பியல் புரட்சி அறிவியலுக்கு ஒரு பெரிய முடுக்கத்தைக் கொடுத்திருந்தது. "so young but not yet famous?" என்பது போல இளைஞர்கள் ஈர்க்கப்பட்டு அறுபதுகளிலும் எழுபதுகளிலும் கணிதம், இயல்பியல் படித்தவர்கள் ஏராளமாக அமெரிக்காவில் இருந்தனர். ஆனால் வக்கீல்கள், முகைமையாளர்கள் போல இவர்களால் கோடீஸ்வரர்கள் ஆக முடியவில்லை. "if you are so smart, why are you not rich?" என்பது ஒரு உறுத்தும் கேள்வியாக இவர்கள் முன் வைக்கப் பட்டபோது சில துகள் இயல்பியல், அண்ட இயல் போன்றவற்றைப் படித்த இளைஞர்கள் கடுப்பாகி நியூயார்க் பங்குச் சந்தையில் நுழைந்தனர். உயர்கணித உதவிகொண்டு இன்று analytics என்று டிவீ18 இல் கூட உதிர்க்கப்படும் பல வழிமுறைகள் இவர்களால் கணினிகளின் உதவி கொண்டு எழுபதுகளில் வகுக்கப் பட்டவைதான். "the revenge of the nerds" என்று அப்போது அதை அழைத்தார்கள். இன்று அரை சென்ட் ஆர்பிட்ராஜுக்காக ஹாங்காங்கிலிருந்து லண்டனுக்கும், மாஸ்கோவிலிருந்து பாரிசுக்கும் கோடிக்கணக்கான டாலர் மணித்துளிகளில் மாறுகின்றது என்றால் அந்த உயர்கணிதத்தின் மாடல்கள் தான் இவற்றுக்கு முதுகெலும்பு. எண்பதுகளின் இறுதியில் Proceedings of Royal Society இல் ஒரு சிறப்பு மலரே பங்குச் சந்தைக்கான கணிதம் பற்றி வந்தது நினைவிருக்கிறது. பணம் சம்பாதிக்க வேண்டுமானால் அதுவும் பங்குச் சந்தை, போன்றவற்றில் விளையாட வேண்டுமானால் ஓரளவு கணிதமும், தைரியமும் போதும். எல்லோருக்கும் அதில் விருப்பமும் ஆர்வமும் இல்லை என்பதுதான் உண்மை. அந்தப் பக்கமெல்லாம் போகவிடாமல் தடுத்தாட்கொள்ளும் அறிவியலின் இணையற்ற 'கிக்' இன்னொரு காரணமாக இருக்கலாம். சரசுவதியைப் போல ஒரு மோசமான அடிமைப் படுத்தும் எஜமானியை யாராலும் காட்ட முடியாது.

================

எனது கேள்விகள் வளவு இராம.கி அவர்களுக்கு:

1. நீங்கள் சென்ற கோவில்களிலேயே தமிழரின் வரலாற்றில் ஒரு பெரும் தாக்கத்தத்தை ஏற்படுத்தியது என நீங்கள் கருதுவது எது? ஏன்?

2. திராவிட இயக்கத்தின் தமிழ்ப் பங்களிப்பை வரலாற்று நோக்கில் எப்படி கணிப்பீர்கள். ஒரு தமிழறிஞரின் பார்வையில் கேட்கிறேன். சிறுபத்திரிக்கை இயக்கத்தினரின் 'இலக்கிய' மதிப்பீடுகளைப் பற்றி இதில் கணக்கில் கொள்ளாமல் கணிக்கவும்.
(அல்லது)
தமிழருக்குத் தம் மொழியின் மீது ஏன் இத்தனை வெறுப்பு? விளையாட்டாகக் கேட்கவில்லை. காண்பதைத் தான் கேட்கிறேன்.

3. அறிவியல் தமிழ் என்று நிறையப் பேசுகிறோம். அரசு ஏன் எதுவுமே இப்போதெல்லாம் இதற்காக செய்வதில்லை. ஒரு கலைகளஞ்சியத்தை இற்றைப்படுத்த முயற்சியாவது இருக்கிறதா? இணையம் இதில் பங்களிப்பது என்பது எந்த அளவு நடைமுறையில் சாத்தியம்?

4. உங்களுக்குப் பிடித்த எம்ஜீஆர் படம் எது, ஏன்? . உங்களுக்குப் பிடித்த ஹாலிவுட் படம் எது, ஏன்?

5. உங்கள் சிறுவயது, நடுவயது, தற்போதைய பொழுதுபோக்குகளைப் பற்றிக் கொஞ்சம் கூறவும்.

==========

வரி, எழுத்து, சேமித்தல்.

2007-03-01T12:48:00.000+05:30

வரி, எழுத்து, சேமித்தல்.
------------------------------

எழுத்து என்பது நம் எண்ணங்களைச் சேர்த்துவைக்க, நாம் இல்லாத இடத்திலும் மற்றவர்களுக்கு அறியப்படுத்த என மனிதன் கண்டுபிடித்தது. களிமண் பலகைகள், குகைச் சுவர்கள், கற்பலகைகள், பனை ஓலை, விலங்குகளின் தோல், மரப்பட்டை, காகிதம், கணினி வட்டுகள், தற்போது குட்டிக்குட்டி வில்லைகள், யூஎஸ்பீ விரல்சேர்ப்பிகள் எனப் பல வடிவங்களில் சொற்களை நாம் சேகரித்து வருகிறோம்.
இவை அனைத்தும் காலத்தால் அழியக்கூடியவை தான். களிமண் பலகைகள் உடைகின்றன. பனை ஓலைகள் நசிகின்றன, தோல்கள் பட்டுப்போகின்றன. காகிதம் பூச்சிகளால் அரிக்கப்படுகிறது. குகைகளையும், கற்பலகைகளையும் நாம் எல்லோரும் பயன்படுத்த முடிவதில்லை. இந்த (சென்ற) நூற்றாண்டின் கணினிக் கண்டுபிடிப்புக்குப்பின் ஆஹா மனிதனின் அனைத்துச் எழுத்துகளையும் இனி கணினியில் டிஜிடைஸ் செய்து சேகரம் செய்துவிட்டால் விட்டது தொல்லை என்று உலகம் முழுவதும் உழைத்துக்கொண்டிருக்கிறார்கள். அதிலும் இருக்கிறது பிட்ராட் (வில்லியம் கிப்ஸன் நினைவுக்கு வரவேண்டும்) எனப்படும் பிட்அழுகல். எழுபதுகளில் அல்லது எண்பதுகளில் கணினியைப் பயன் படுத்தியவர்கள் யாராவது நண்பர்கள் இருந்தால் அவர்களது பழைய கணினித் தரவுகளை படிக்கக்கூடிய படிப்பான்கள் தற்காலத்திய கணிகளில் இருக்கின்றனவா எனப் பார்க்கவேண்டும். (ஐபிஎம் 370 இல் ஃபோர்ட்ரான் நிரல் ஓட்டிய ஹோலரித் அட்டைகள் சில மிச்சம் வைத்திருக்கிறேன். சும்மா புத்தகம் படிக்கும்போது பக்க நினைவுறுத்தியாகப் பயன்படுத்த). இப்போது நாம் பெரும் தரவு மலைகளை கணினிகளில் சேகரித்து, சேமிக்க டேப்புகளையும், கடினவட்டுஅடுக்குகளையும் பயன்படுத்துகிறோம். இவை பெரும்பாலும் காந்தத்துகள்களை அடுக்கிச் சீரமைத்து சேர்க்கும் நுட்பமாகும். நம் வீடுகளிலும், அலுவலகங்களிலும் இருக்கும் தற்போக்கான மின்காந்தப் புலம்களாலோ, நீர், உராய்வு, தவறி வீழ்தல் போன்ற எளிதில் பெறப்படும் காரணிகளாலோ இந்த காந்தத் துகள் கட்டமைப்பு கலைந்து போக சாத்தியங்கள் ஏராளம். ஒரு நூறுவருடங்களுக்குமேல் இவை தாங்காது என்பதே இன்றைய நிலை.
ஜப்பானில் ஒரு ஆய்வகத்தில் பாக்டீரியாகளின் டிஎன்ஏயில் தரவுகளை குறிஏற்றம் செய்து சேகரித்து வைக்கலாம் என கண்டுபிடித்திருக்கிறார்கள் . டிஎன் ஏ இல் சேகரிப்பதால் தலைமுறை தலைமுறையாக இந்த பாக்டீரியாக்கள் பல்கிப் பெருகும்போது இந்த குறியேற்றப்பட்ட தரவு பதிவெடுக்கப் பட்டுக்கொண்டே இருக்கும். அதனால் ஆயிரக்கணக்கான (!) வருடங்களுக்கு இந்தத் தரவுகளுக்கு அழிவே இல்லாமல் இருக்க சாத்தியங்கள் உண்டு. முதன் முதலில் நம் எல்லோருக்கும் நன்கு புரிந்த 'E=MC^2 1905' என்பதை குறியேற்றியிருக்கிறார்களாம். வாழ்க.

எல்லாம் சரி, நம்மால் முடிந்ததெல்லாம் இ.தி -தான்.

"....என்னடா இது, புதுக்கவிதையிலே காவியம் படைக்கலாம்னா சொற்குவை இத்தனை குறைவா இருக்குதே. பேசாம ஹைக்கு நாலு பாடிடலாமா. "

--

2006- டூரிங் பரிசு

2007-02-22T23:03:00.000+05:30

பிரான் அலன் எனும் ஐபிஎம்மில் பணிபுரியும் பெண்மணி இந்த ஆண்டின் (2006) டூரிங் பரிசைப் பெறுகிறார் . டூரிங் பரிசு என்பது ஒவ்வொரு ஆண்டும் தரப்படுவது. அதைபெறுபவர்கள் தம் வாழ்நாளில் கணினித் துறைக்காக ஆற்றிய சேவைக்காகவும் கண்டுபிடிப்புகளுக்காகவும் வழங்கப்படுகிறது. இது பிரிட்டனின் கணினியாளரான டூரிங் அவர்கள் நினைவாக 'கணினிப் பொறி கூட்டமைப்பினால்' தரப்படுகிறது. பிரான் அலன் இப்பரிசைப்பெறும் முதல் பெண்மணி ஆவார்.

கணினித் துறையில் பிரானின் பங்களிப்பு உயர் செயல்திறம் மிக்க கணினிகளை ஆக்க உதவியதாக கருதப்படுகிறது. கணினிகளில் செயல்திறம் என்பது குறிப்பிட்ட காலத்தில் எத்தனை கணிப்புகளை அவை நடத்திக் காட்டும் என்பதைப் பொறுத்தே அளவிடப்படுகிறது. அதற்கு ஏதுவாக நாம் ஏறக்குறைய மானுட மொழியில் எழுதும் நிரல்களை பொறிமொழிக்கு மாற்றக்கூடிய தனியங்கி நிரல்தொகுப்புகள் வேண்டும். இவற்றை கொம்பைலர் என்று அழைப்பர். இத்தகைய மொழிமாற்று நிரல்தொகுதிகளை வடிவமைப்பதில் பிரானின் ஆய்வுகளும் முயற்சிகளும் பெரிதளவும் துணை புரிந்தன. இத்தகைய திறம்மிக்க மொழிமாற்று நிரல்களின் உதவியுடனும், ஒரு தீர்வைத்தரும் பெரும் நிரல்தொகுதியை பல பகுதிகளாக்கி பல சில்லுகளில் ஒவ்வொன்றாக ஒரே வேளையில் ஓட்டும் இணைகணிப்பு நிரல்களின் உதவியுடனும், உயர்திறக்கணிப்புகள் இக்காலத்தில் எளிதாக செய்யப்படுகின்றன. இவற்றிற்கான பல ஆதார பங்களிப்புகளைச் செய்தவர் என்றமுறையில் அவருக்கு இவ்வாண்டின் பரிசு கிட்டியுள்ளது. இச்சமயத்தில் உலகின் முதல் நிரலாளரும் ஒரு பெண்தான் (அடா லவ்லேஸ்) என்பதை நினைவுகூர்வோம்.

இணைச்சொற்கள்:
டூரிங் பரிசு: Turing Prize
கணினிப் பொறி கூட்டமைப்பு: Association of Computing Machinery
உயர்திறக் கணினி : High Performance computer
செயல்திறம்: Performance
கணிப்புகள்: Computations
பொறிமொழி: machine language
நிரல்தொகுப்பு: program
இணைகணிப்பு: parallel computation

(நிழற்படம் உரிமம்: http://www.computerhistory.org)

-

மொழி,வரி - நாம் - 2

2007-02-21T23:23:00.000+05:30

நண்பர்கள் மன்னிக்கவும். இந்த இடுகையில் மத்வாச்சாரியாரின் நூலின் பனையோலை ஏட்டை மாதவாச்சாரியின் நூல் என தவறுதலாக குறிப்பிட்டு விட்டேன். பிறகு சரி செய்து போடுகிறேன்.
உஷாவுக்கு நன்றி.

கோவை படங்கள் ...

2007-02-09T21:28:00.000+05:30

ஊருக்குப் போன போது எடுத்த இன்னும் சில படங்கள்:

3.சற்றே தொலைவில் மருத மலைக் கோவில்

2.ஊர் போற வழி

1." மூக்குத்திப் பூ மேலே காத்து உக்காந்து பேசுதையா "

(படங்களைப் பெரிதாய்க் காண அவற்றின்மீது சொடுக்கவும்)

.

செம்போத்துப் பறவை

2007-02-08T23:36:00.000+05:30

இந்தப் பறவையை எங்க ஊர்ப்பக்கம் செம்போத்து (செம்பூத்து என்பது பேச்சு வழக்கு) என்றழைப்பார்கள்.
கிராமத்தில் பள்ளிப் பருவத்தில் விடுமுறை நாள் பகல் வேளைகளில் புன்செய்க் காட்டில் சுற்றித்திரியும் போது மிகுந்து இருக்கும் கள்ளிப் புதர்களிலும், அடர்தென்னைத் தோப்பின் நிழல்களிலும் தத்திப் போகும் பறவை. இரண்டிரட்டாய் சற்றே தூரத்தில் தரையில் நடந்து புழுபூச்சிகளை தேடும் இணைப் பறவைகள் நம் காலடி அதிர்விலோ, பேச்சின் ஒலியிலோ எழுப்பிப் பறக்கும்போது வெகுதூரம் பறப்பதில்லை.

தரையிலிருந்து அருகில் தாழ உள்ள மரக்கிளைகளுக்கோ அல்லது கிளைவிட்டு கிளைதாவியோ சிறு தூரங்களையே பறந்து கடக்கின்றன. மழை பெய்ந்து ஓய்ந்த மதிய நேரங்களில் குகுக் குகுக் எனக் கத்தி அழைக்கும் ஒலி எவராலும் எளிதில் இனம் காணமுடியும். செம்போத்தின் இன்னொரு பெயர் குக்கில் என்கிறது சூடாமணி நிகண்டு.

கோவை அருகில் மருதமலை அடிவாரத்தில் எடுத்த படம்

kaveri verdict

2007-02-05T14:25:00.000+05:30

கர்நாடகா-தமிழ்நாடு-பாண்டிச்சேரி-கேரளா மாநிலங்களுக்கான காவிரி நதிநீர்ப் பகிர்வு பற்றிய தீர்ப்பாயத்தின் தீர்ப்பு வெளியாகியிருக்கிறது.
தமிழ் நாடு 419 டிஎம்சி
கர்நாடகா 270 டிஎம்சி
கேரளா 30 டிஎம்சி
பாண்டிச்சேரி 9 டிஎம்சி
முதல் எதிர்வினகள் கர்நாடகத்திலிருந்து சற்றே கோபமாகவும், தமிழகத்திலிருந்து சற்றே சமாதனத்துடனும் இருக்கின்றன.
முக்கியமாக இந்த நேரத்தில் நோக்க வேண்டியது:

1. இந்த பகிர்வு மொத்த காவிரி நதிப் படுகை முழுக்க உள்ளடக்கியது. காவிரி நதியில் பாயும் நீர் *மட்டுமே* பற்றியதல்ல. இதில் இருக்கும மொத்த 719 டிஎம்சி காவிரியில் மட்டுமே இல்லை. கர்நாடகா 419 டி எம் சி நீரை தமிழகத்துக்கு 'தர' வேண்டியதில்லை. இருந்தால்தானே தருவதற்கு.

2. இதில் மழை பொய்த்த ஆண்டுகளில் மீண்டும் பற்றக்குறையையும் பகிர்ந்து கொள்ள வேண்டும்

3. இந்தத் தீர்ப்பை யார் அமல்படுத்துவார்கள். மத்திய அரசோ, நீதிமன்றங்களோ ஏதேனும் செய்யமுடியுமோ என குழப்பமில்லாமல் இல்லை. கர்நாடகா 110 டிஎம்சி தரவே மிகவும் பிணக்கும் என்பதே நிதரிசனம்.

4. இதில் விவசாய சங்கங்களும், அரசியல்வாதிகளும் முக்கிய பங்கு வகிப்பார்கள். 'காவிரி விவசாயக் குடும்பம்' இதை முதிர்ச்சியுடன் கையாளும் என எதிர்பார்க்கலாம்.

5. கர்நாடகாவில் இதுவரை வன்முறை ஏதும் இல்லை. பெங்களூர் அமைதியாகத்தான் இருக்கிறது.
பள்ளிகளில் இருந்து தொ்லைபேசி மானவர்களை வீட்டுக்கு அனுப்பிவிட்டார்கள். நிரலாளர்கள் பயந்துபோய் வீட்டில்தான் இருக்கிறார்கள்.

6. இன்னும் மேல்முறையீடுகள் மிச்சம் இருக்கின்றன.

beta testing

2007-02-01T15:17:00.000+05:30

பீட்டாவுக்கு மாறியதற்கு ஒரு சோதனைப் பதிவு

நாய்கள், நாங்கள், நீங்கள் ...

2007-01-12T13:29:00.000+05:30

இங்கே பெங்களூரில் தெரு நாய்களின் தொல்லை தாங்க முடியாமல் போய்விட்டது. விலங்குநேச அமைப்பாளர்கள் , ஆர்வலர்கள் போடும் ஆட்டத்தில் நகராண்மைக் கழகம் நமக்கேன் வம்பு என்று சில வருடங்களாக இதைக்கண்டு கொள்ளவே இல்லை. சென்ற வாரம் ஒரு எட்டு வயது குழந்தையை தெருநாய்கள் குழு வாக வேட்டையாடி தெருவில் கடித்துக் குதறி எல்லோரும் பார்க்கும்போதே குழந்தை இறந்து விட்டது. உடனே மக்கள் குரல் எழுப்ப அரசு சில நாய்களைப் பிடிப்பதும், அல்லது கருத்தடை ஊசி போடுவதும் என நாடகமாடிக்கொண்டு இருக்கிறது. பலர் நாய்ப்பாசம் பொங்க இதற்கெல்லாம் குப்பைகூழங்களை உடனடியாக அகற்றாததும், மீதமாகும் இறைச்சி போன்றவற்றை தெருவில் கொட்டுவதும் காரணம் என்றும் , அதை உண்டு பழகிய நாய்கள் பாவம் வேறு வழியில்லாததால் குழந்தைகளை கடிக்கின்றன என்றும் ஆங்கிலத்தில் வாசகர் கடிதம் எழுதிக்கொண்டு இருக்கிறார்கள். இவர்கள் வாதப்படி தெரு நாய்களை யாரும் தொல்லைப்படுத்தக்கூடாது. அரசு தன் கடமையை சரிவரச் செய்தால் நாய்களும் இலைதழைகளைத் தின்று சாதுவாக இருக்கும். ஆமாம் தெருக்களை அரசு சுத்தம் செய்து சரியாகப் பராமரித்தால் இந்த நாய்கள் எதைத்தின்று தெருவில் வாழும்? சில பெண்மணிகள் இன்னும் ஒருபடி மேலே போய் தாங்கள் ஓரிரு தெரு நாய்களை தத்தெடுத்துக் கொண்டிருப்பதாகவும் அன்றாடம் உணவளித்துப் பேணுவதாகவும் அன்பு பொங்க பேட்டி கொடுத்தனர். அம்மணி, அப்படியே அந்த நாய்களை உங்கள் இல்ல வரவேற்பறையில் வாழ வைக்காமல் மீண்டும் ஏன் தெருவில் விரட்டுகிறீர்கள் என்று கேட்கலாம் போலிருந்தது. இன்று மீண்டும் ஒரு குழந்தையை நாய்கள் விரட்டிக் கடித்துள்ளன. அரசு உடனடியாக அனைத்துத் தெருநாய்களையும் பிடித்துக் ..... (சொல்ல பயமாக இருக்கிறது).
அகற்றப்படாத தெருநாய்களால் இங்கே தொல்லை என்றால் மக்கள் சீனத்தை முன்னுதாரணமாகக் கொள்ளும் பொதுவுடைமைக் கோட்டையான மேற்கு வங்கத்தில் அகற்றப் பட இயலாத மக்களால் தொல்லை. ஒழுங்காக நிலச் சீர்திருத்தம் செய்தோமா அதிலிருந்து நேரடியாக சர்வீஸ் எகானமிக்கு மாறினோமோ என்று உலகம் சுற்றும் வெள்ளைக்காரகளுக்கு வைத்தியம் செய்து எதிர்காலத் தாய்லாந்து ஆக கனவுகாணும் கேரளாபோல இல்லாமல் மே.வ. வில் உற்பத்திப் பொருளாதாரம் வேண்டுமாம். 60,000 ஏக்கர் விளைநிலத்தை பொதுவுடைமை அரசு 'மார்க்கட் விலையில்' கையகப்படுத்தி பெரும் தொழில் நிறுவனங்களை அமைக்க ஏற்பாடு செய்துகொண்டிருக்கிறது. மக்கள் கிராமம் கிராமமாக ஆயுதங்களை எடுத்து போலீஸையும், கட்சித் தொண்டர்களையும் தாக்குகிறார்கள். இதற்கு நடுவில் அமைச்சர்கள் அதிபயங்கர "மு" வார்த்தையைச் சொல்லத்தொடங்கி விட்டார்கள். முஸ்லீம் சமய , இடம்பெயர்ந்த , பொய்பிரச்சாரத்துக்கு அடிமையான மக்கள் அறியாமையால் அரசுத்திட்டங்களை எதிர்க்கிறார்கள் , இன்ன பிற. பங்களாதேஷிலிருந்து ஆயிரக்கணக்கில் கள்ளத்தனமாக உள்ளே வந்த மக்கள் நாடெல்லாம்தான் இருக்கிறார்கள். இது ஒரு வலதுசாரிப் பிரச்சனையாகத்தான் இத்தனை நாள் இருந்தது. மாநில பொருளாதார மாயக் கண்ணாடி சில வர்க்கப் பிரச்சனைகளை இனப்பிரச்சினைகளாக மாற்றுகிறது போலும். CPI-M நிலையின்றித் தடுமாறும் தருணமிது. முதலாளித்துவ அமெரிக்காவைவிட மிகக்குறைந்த அளவில் தொழிலாளர் உரிமை பேணும் மக்கள்சீனத்தை லட்சியமாகக் கொண்டால் எதுவும் நடத்தலாம்.
அசிங்கமான அரசியல்வாதியாக இருந்தால்தான் இவ்வளவு தடுமாறி மக்களின் சார்பாக ஏதோ முணுமுணுத்துக் கொண்டாவது இருக்கவேண்டும். கார்பரேட் குடிமகனாக இருந்தால் படு ஜாலி.
இன்போஸிஸ் நாராயணமூர்த்தி சில தினக்களுக்கு முன்னாடி தம்மைப்போன்ற பன்னாட்டுக் கம்பெனிகள் தேசநலங்களைப் பற்றி கவலைப் பட முடியாது, தாம் உலகக் குடிமகன்கள் என்ற ரீதியில் பேசி இருந்தார். இன்று நந்தன் தம் கம்பெனி பயங்கர வாதத் தாக்குதலுக்கு முன்னெச்சரிக்கையாக பாதுகாப்பு ஏற்பாடுகள் செய்துள்ளதாக அறிவித்திருக்கிறார். இன்போஸிஸ் நண்பர்கள் பதுங்குகுழிகளுக்குள் இருந்து எப்படி ஒரு SOA ஆர்கிடெக்சர் போடலாம் என்பதை தனிமடலில் தெரிவிக்கவும்.

பிகாரில் IIT

2007-01-05T15:44:00.000+05:30

கூடிய விரைவில் நாட்டில் அமையவிருக்கும் மூன்று புதிய இந்திய தொழில் நுட்பக் கழகங்களில் ( ஐஐடி ) ஒன்று பிகாரில் அமையவிருப்பதாக செய்திகள் வந்துள்ளன. இது மிகவும் வரவேற்கத்தக்க முடிவாகும். அண்மையில் அலோசனை செய்யப்பட்ட (இன்று அப்துல் கலாம் ஒப்புதல் அளித்துள்ள) பிற்படுத்தோருக்கான இட ஒதுக்கீட்டுக் கொள்கையை அடுத்து நடந்த கருத்துப் பரிமாற்றங்களின் போது இருக்கும் நுட்பக்கழகங்களில் மாணவர் எண்ணிக்கையைக் கூட்டுவதும், புது நுட்பக்கழகங்களைத் தொடங்குவதும் உடனடித்தேவைகளாக உணரப்பட்டன. அதன் தொடராக விரைந்து முடிவுகள் எடுக்கப்படுதலும் அமல் படுத்துதலும் தேவையாகிறது.
இதில் புது நுட்பக்கழகங்களை பிகார், சட்டிஸ்கார், ராஜஸ்தான் போன்ற தேச ஒப்பீட்டளவில் பின்தங்கிய மாநிலங்களில் அமைப்பதே சரியானதாகும். வளரும் நாட்டின் பொருளாதர முன்னேற்றம் நாடு முழுவதும் சமச்சீராகப் பரவ கல்வியே முதல் படி என்பதில் அரசு இன்னும் கவனம் செலுத்தி இத்தகைய மாநிலங்களில் ஆதார, இரண்டாம் நிலைப் பள்ளிக் கல்வி நிறுவனகங்களையும் பெரும் அளவில் துவக்குவது அவசியம். இதற்காக நடுவண் அரசு தனியாக சிறப்பு வரி விதித்தாலும் தகும் .

மீண்டும் மீண்டும் - 2

2006-10-27T16:17:00.000+05:30

சென்ற வருடத்திய பெங்களூர் ஐஐஎஸ்ஸி தாக்குதலைத் தொடர்ந்து அடுத்த பயங்கரவாத செயல் கர்னாடகாவில் தடுக்கப்பட்டிருக்கிறது. இந்து செய்தி இங்கே.
வெள்ளி அதிகாலையில் மைசூரில் நடந்த துப்பாக்கிச் சண்டைக்குப்பிறகு பாகிஸ்தானைச் சேர்ந்த அல்பாதர் அமைப்பின் இரு உறுப்பினர்களைப் பிடித்ததாக மைசூர் போலிஸ் அறிவித்துள்ளது. இவர்கள் சட்டமன்றத்தையும், இன்னபிற 'முக்கிய' இடங்களையும் தகர்க்கத் திட்டமிட்டதாகவும் போலிஸ் கூறுகிறது.
இச்செய்திகள் உண்மையானால் பெரும் சதியிலிருந்து பெங்களூர் தப்பியதாகவே கருதலாம். எல்லைகடந்த பயங்கரவாதம் தென்னிந்திய நகரங்களுக்கு நகர்வதன் மூலம் இந்தியாவின் இன்றைய பொருளாதார வளர்ச்சிக்கான காரணிகள் குலைக்கப்படுகின்றன. அரசு அமைப்புகள் எந்த அளவு முன்னெச்சரிக்கையாக இருக்கவேண்டும் என்பதையும் இத்தகைய நிகழ்வுகள் தீர்மானிக்கும்.

சொல், காட்சி, பொருள் - 2

2006-10-10T22:10:00.000+05:30

சொல்லுக்கும் காட்சிக்கும் இடையிலான இணக்கமும் பிளவும் என்றுமே திகைப்பூட்டக்கூடியது. அதை உணர்விக்கும் ஒரு முயற்சியாக ரெனெ மாக்ரித்தெ எனும் ஓவியர் தீட்டியது இது ஒரு புகைக்குழாய் அல்ல எனும் ஓவியம். சொல் ஒரு குறிப்பானாக இருந்து ஒரு சொல்லாக மட்டுமே உறையும் அழகு.
எல்லாச் சொல்லும் பொருள் குறித்தனவே.?
இதேபோல் சொல்லுக்கும் சொல்லுக்கும் இடையிலான இணக்கமும் பிளவும் என்பதை எப்படி அணுகுவது?

---------------------------

ஒரு நாத்திகக் கவிதை
---------------------------

இரவெல்லாம் எலிமுகரும்
தெருப் பரப்பில்
பொறுக்கிய் இக்கணிதம்
கனல் சிவந்து
வெளிகடக்கப்
பாயும் இவ்வோடத்தின்
கலன் திருப்ப
உயிர் உறைக்க
உணவு வெதுக்கவென
அலையும் மின்துகளை
ஏவிச் சிரிக்கிறது

.....***
...***

மனம் பெற்றால் போதுமென
திரியும் கோள்குழுக்கள்
மதி அற்றால் கூடுமென
பதறும் உயிர்த் திரள்கள்
அழல் சுற்றி கணம் வற்றி
அதிர்வடங்கும் அப்போழ்தில்
எதுகற்று எம் இமைமூட
குன்றுறையும் வேலனே
குமார குருபரனே.

----------------------

இ.தி. 57

2006-10-08T01:32:00.000+05:30

--

" I knew it is coming, now it is the kin of some Bin L who want an urgent appoinment with our president".
--

physics nobel - 2006 :இயல்பியல் நொபல் பரிசு

2006-10-04T02:46:00.000+05:30

இயல்பியலுக்கான இவ்வாண்டின் நொபல் பரிசு அறிவிக்கப்பட்டுள்ளது. அமெரிகாவைச் சேர்ந்த ஜான் மாதெர் (நாசா கோடார்ட் வெளிப்பறப்பு மைய்யம்), ஜோர்ஜ் ஸ்மூட் (கலிபோர்னியா பெர்க்கிலி பல்கலை) ஆகியோருக்கு "அண்டப் பின்புல நுண் அலைக்கதிவீச்சு" பற்றிய கண்டுபிடிப்புகளுக்காக இப்பரிசு தரப்பட்டுள்ளது.
விவரங்கள் பிபிசிதளத்தில் இங்கே.
நொபல் கமிட்டியின் வலைத்தளத்தில் மேலும் விரிவான விவரங்கள் இங்கே, இங்கே.

அண்டப் பின்புல நுண் அலைக்கதிவீச்சு பற்றி ஆராய 'கொபெ' எனும் செயற்கைக்கோளை நாசா விண்வெளியகம் 1989 இல் அனுப்பியது.
இச் செயற்கைக்கோள் மூலம் மாதெரும் ஸ்மூட்டும் செய்த பரிசோதனைகளில் இந்தக்கதிர் வீச்சு உண்மையில் அண்டம் எங்கும் அனத்துத் திசைகளிலும் ஒரே அளவில் சீராகப் பரவாமல் திசைச்சீரற்று பரவியிருப்பதைக் கண்டறிந்தார்கள்.

இதெல்லாம் என்ன என்று சிறிது பார்ப்போம்.
சென்ற நூற்றாண்டின் துவக்கத்துக்குப் போவோம். அப்போது நிகழ்ந்த சில இயல்பியல் கதைகள் தெரிந்தால்தான் இப்போதைய கதை புரியும்.

முதலில் கரும்பொதி கதிர்வீச்சு என்றால் என்ன என்று அறியலாம்.
ஒரு டென்னிஸ் பந்து போன்ற கோளம் ஒன்று இருப்பதாக எடுத்துக்கொள்வோம். இதன் சிறப்பு என்னவென்றால் இது இதன் பரப்பின் மீது படியும் அனைத்து ஒளிக் கதிர்களையும் விழுங்கி சாப்பிட்டு விடுகிறது என்று கொள்வோம். ஒரு டார்ச் இதன்மீது அடித்தால் ஒளியை அது விழுங்கி விடுகிறது. பகலில் வெளிச்சம் பட்டால் அதுவும் அதோகதிதான். இப்படி எல்லாவற்றையும்
விழுங்கிக்கொண்டிருக்கும் ஒரு கோளம் நமக்கு கருப்பாகத்தான் தோன்றும். ஏனெனில் நமக்கு பொருள்களின் வண்ணங்களாகத் தெரிவது எல்லாமே ஒளி பொருள்களின் மேற்பரப்பின் மீது பட்டு பிரதிபலிப்பாலும், சிதறலாலும் தான். பொருள்கள் ஒளியை விழுங்கிவிட்டால் அவை கருப்பாகவே தெரியும். இத்தகைய ஒரு பொருளை, பொதியை கரும்பொதி என்று இயல்பியலாளர்
அழைப்பர்.

இப்படி அனைத்து மின்காந்த அலைவரிசைகளிலும் கதிர்வீச்சை விழுக்கிக்கொண்டிருப்பவற்றை நாம் கரும்பொதி என்று அழைக்கிறோம். ஒளியும் ஒரு மின்காந்த கதிர்வீச்சுதான் என்பதை நாம் இங்கே நினைவில் கொள்வோம். இப்படி எதற்காக கரும்பொதி என்பதை இயல்பியலாளர் கற்பனை செய்யவேண்டும். பயன் இருக்கிறது. இப்படிப்பட்ட கரும்பொதிகள் எப்படி தம்மீது
படும் அனைத்து மின்காந்த அலைகளையும் விழுங்கிக் கொள்கின்றனவோ அதேபோன்று அனைத்து அலைவரிசைகளிலும் அவை கதிர்வீச்சு செய்துகொண்டும் இருக்கின்றன எனக்கொள்வோம். இப்படி ஒரு கரும்பொதி செய்யும் கதிர்வீச்சு அதன் வெப்பநிலைக்கு நேர்விகிதத்தில் இருக்கும். அதாவது இக்கரும்பொதியின் வெப்பநிலை 2 டிகிரியாக இருந்தால் அது ஒரு மின்காந்த
அலைவரிசையிலும் 200 டிகிரியாக இருந்தால் வேறு அலைவரிசையிலும் கதிர்வீசும்.
இப்படி வீசும் கதிர்கள் ஏறக்குறைய 425 டிகிரி சென்டிகிரேட் வரை நாம் காணும் ஒளி அலைவரிசைகளில் இருப்பதில்லை. அதனால்தான் அவை கருப்பாகத்தெரிகின்றன. இதற்குமேல் வெப்பமாக இருந்தால் சிகப்பு, நீலம் வெள்ளை என அவை பல ஒளிகளையும் வீசும். இக்கதிர்வீச்சை கரும்பொதி கதிர்வீச்சு என்பர். இதனால் என்ன பயன்?
இக்கரும்பொதி கதிர்வீச்சு இப்பொதி எதனால் ஆனது என்பதை சார்ந்தில்லை. அதன் மற்ற எந்த இயல்பியல் தமையிலும் சார்ந்தில்லை. அப்பொதியின் வெப்பத்தைமட்டுமே சார்ந்துள்ளது.

இப்படி வெப்பத்தை மட்டுமே சார்ந்த ஒரு கரும் பொதியின் கதிர்வீச்சின் அலைப் பரப்பை சரியாக கணக்கிட ஒரு கோட்பாடுதேவையாக இருந்தது. 1900 ஆம் ஆண்டில் மக்ஸ் ப்ளான்க் என்ற இயல்பியலாளர் முதன்முதலில் குவாண்டம்
கோட்பாட்டை இதை விளக்க பயன்படுத்தினார். பின்பு ஐன்ஸ்டைன் அக்கொள்கையை அனைத்து மின்காந்தகதிர்களுக்கும் பொதுமைப்படுத்தியதால் குவாண்டம் கோட்பாடு உதித்தது.

இதற்கும் நம் அண்டத்துக்கும் என்ன தொடர்பு?
அண்டம் என்பது ஆதியில் ஒரு கால-வெளி தனிப்புள்ளியாகத் தோன்றியது என்பது இயல்பியல் கருதுகோள். அப்புள்ளியில் அண்டத்தில் வெறும் சக்திதான் இருந்தது. பின்பு நடந்த பெருவெடிப்பில் அந்தப்புள்ளி விரிவடைந்து வெளியும் காலமும் பிரிந்தன. அப்போதும் அண்டத்தினுள்ளே வெறும் சக்திதான். ஒரு பலூன் போல ஊதிப் பெருகிய அண்டம் ஆதியில் இருந்த பெரும் வெப்பத்திலிருந்து பொருளாகவும், கதிர்வீச்சாகவும் பிரிந்தது. இப்படி விரிவடந்து கொண்டே வரும் அண்டத்தில் கதிர்வீச்சு குளிர்ந்து கொண்டே வருகிறது. பொருளோ எனில் வெளியில் புகையாகவும், விண்மீன்களாகவும், மீன்கூட்டங்களாகவும், மின்தொகுதிகளாகவும் மாறுகிறது.

விண்மீன் கள் உருவாகும் இந்த மாற்றம் பெரு வெடிப்பு நடந்து 200 மில்லியன் ஆண்டுகள் கழித்து நடக்கிறது. அதற்குமுன்னே பெருவெடிப்பின் பின் 380000 ஆண்டுகள் வரை குளிர்ந்துகொண்டே வரும் ஒரு கரும்பொதியப் போன்றே அண்டம் இருந்தது என்பது ஒரு கருதுகோள். (அப்பாடா, கரும்பொதிகளை கொண்டுவந்து சேர்த்தாச்சு) இப்படி அண்டம் ஒருகரும்பொதியாக மின்காந்த அலைகளில் இப்போதும் கதிர்வீச்சிக்கொண்டிருந்தால் நாம் அக்கதிர்வீச்சைப்பார்க்க
முடியவேண்டுமல்லவா? இப்போதும் பார்க்கலாம். விண்வெளியை நோக்கி ஒரு மின்காந்த கதிர்வீச்சு உணர்பொறியைத் திருப்பினால் நாம் இக்கதிர்வீச்சு எப்படி நம் அண்டத்தின் பின்புலத்தில் பரவி இருக்கிறது என்பதை அளக்கலாம்.

அப்படி அளந்தபோதுதான் இயல்பியலாளர்கள் ஒரு அதிசயத்தைக்கண்டார்கள். அதாவது அண்டம் இயல்பாக ஆதியிலிருந்து விரிவடைந்துகொண்டிருந்தால் இந்த கதிர்வீச்சு எல்லாத் திசைகளிலும் சமமான அளவுடன் இருக்கவேண்டுமல்லவா? இந்த கதிர்வீச்சு அண்டம் குளிர்ந்து உள்ளதால் நுண் அலை வரிசைகளில் வீசுகிறது. இந்த நுண் அலைவரிசை கதிர்வீச்சு அண்டத்தில்
திசைச் சீரற்று பரவி இருக்கிறது. இதை 'அண்டப் பின்புலத்தின் திசைச் சீரற்ற நுண் அலைப் பரவல்' என்று இயல்பியலாளர் அழைக்கிறார்கள். இது ஏன் இப்படி இருக்கிறது என்பதை விளக்க கருதுகோள்கள் உள்ளன.
இந்த கதிர்வீச்சை அளக்க ஒரு செயற்கைக்கோளை வடிவமைத்து ஏவி அண்டத்தில் கதிர்வீச்சுப்பரவலை சிறப்பாக அளந்து தேர்ந்ததால் இயல்பியலாளர்கள் இருவரும் இந்த வருடத்தின் நொபல் பரிசு பெறுகின்றனர்.

இயல்பியலின் சோதனை அளவிடல் வெற்றிபெறும் இன்னொரு காட்சி. கொண்டாடுவோம்.

அனைத்துப் படங்களுக்கும் நன்றி: நொபல் இணையத்தளம்.
(pictures copyright info @ nobelprize.org website )

ஆங்கில இணைச் சொற்கள்:
------------------------
ஜான் மாதெர்: John C. Mather
நாசா கோடார்ட் வெளிப்பறப்பு மைய்யம்: NASA Goddard Space Flight Center
Greenbelt, MD, USA

ஜோர்ஜ் ஸ்மூட்: George F. Smoot
கலிபோர்னியா பெர்க்கிலி பல்கலை: University of California
Berkeley, CA, USA

அண்டப் பின்புல நுண் அலைக்கதிவீச்சு: cosmic microwave background radiation
திசைச்சீரற்று: anisotropic

கரும்பொதி: blackbody

இயல்பியல் நொபல் பரிசு - 2006

2006-10-04T02:13:00.000+05:30

இயல்பியலுக்கான இவ்வாண்டின் நொபல் பரிசு அறிவிக்கப்பட்டுள்ளது. அமெரிகாவைச் சேர்ந்த ஜான் மாதெர் (நாசா கோடார்ட் வெளிப்பறப்பு மைய்யம்), ஜோர்ஜ் ஸ்மூட் (கலிபோர்னியா பெர்க்கிலி பல்கலை) ஆகியோருக்கு "அண்டப் பின்புல நுண் அலைக்கதிவீச்சு" பற்றிய கண்டுபிடிப்புகளுக்காக இப்பரிசு தரப்பட்டுள்ளது.
விவரங்கள் பிபிசிதளத்தில் இங்கே.
நொபல் கமிட்டியின் வலைத்தளத்தில் மேலும் விரிவான விவரங்கள் இங்கே, இங்கே.

அண்டப் பின்புல நுண் அலைக்கதிவீச்சு பற்றி ஆராய 'கொபெ' எனும் செயற்கைக்கோளை நாசா விண்வெளியகம் 1989 இல் அனுப்பியது.
இச் செயற்கைக்கோள் மூலம் மாதெரும் ஸ்மூட்டும் செய்த பரிசோதனைகளில் இந்தக்கதிர் வீச்சு உண்மையில் அண்டம் எங்கும் அனத்துத் திசைகளிலும் ஒரே அளவில் சீராகப் பரவாமல் திசைச்சீரற்று பரவியிருப்பதைக் கண்டறிந்தார்கள்.

இதெல்லாம் என்ன என்று சிறிது பார்ப்போம்.
சென்ற நூற்றாண்டின் துவக்கத்துக்குப் போவோம். அப்போது நிகழ்ந்த சில இயல்பியல் கதைகள் தெரிந்தால்தான் இப்போதைய கதை புரியும்.

முதலில் கரும்பொதிவு கதிர்வீச்சு என்றால் என்ன என்று அறியலாம்.
ஒரு டென்னிஸ் பந்து போன்ற கோளம் ஒன்று இருப்பதாக எடுத்துக்கொள்வோம். இதன் சிறப்பு என்னவென்றால் இது இதன் பரப்பின் மீது படியும் அனைத்து ஒளிக் கதிர்களையும் விழுங்கி சாப்பிட்டு விடுகிறது என்று கொள்வோம். ஒரு டார்ச் இதன்மீது அடித்தால் ஒளியை அது விழுங்கி விடுகிறது. பகலில் வெளிச்சம் பட்டால் அதுவும் அதோகதிதான். இப்படி எல்லாவற்றையும்
விழுங்கிக்கொண்டிருக்கும் ஒரு கோளம் நமக்கு கருப்பாகத்தான் தோன்றும். ஏனெனில் நமக்கு பொருள்களின் வண்ணங்களாகத் தெரிவது எல்லாமே ஒளி பொருள்களின் மேற்பரப்பின் மீது பட்டு பிரதிபலிப்பாலும், சிதறலாலும் தான். பொருள்கள் ஒளியை விழுங்கிவிட்டால் அவை கருப்பாகவே தெரியும். இத்தகைய ஒரு பொருளை, பொதியை கரும்பொதி என்று இயல்பியலாளர்
அழைப்பர்.

இப்படி அனைத்து மின்காந்த அலைவரிசைகளிலும் கதிர்வீச்சை விழுக்கிக்கொண்டிருப்பவற்றை நாம் கரும்பொதி என்று அழைக்கிறோம். ஒளியும் ஒரு மின்காந்த கதிர்வீச்சுதான் என்பதை நாம் இங்கே நினைவில் கொள்வோம். இப்படி எதற்காக கரும்பொதி என்பதை இயல்பியலாளர் கற்பனை செய்யவேண்டும். பயன் இருக்கிறது. இப்படிப்பட்ட கரும்பொதிகள் எப்படி தம்மீது
படும் அனைத்து மின்காந்த அலைகளையும் விழுங்கிக் கொள்கின்றனவோ அதேபோன்று அனைத்து அலைவரிசைகளிலும் அவை கதிர்வீச்சு செய்துகொண்டும் இருக்கின்றன எனக்கொள்வோம். இப்படி ஒரு கரும்பொதி செய்யும் கதிர்வீச்சு அதன் வெப்பநிலைக்கு நேர்விகிதத்தில் இருக்கும். அதாவது இக்கரும்பொதியின் வெப்பநிலை 2 டிகிரியாக இருந்தால் அது ஒரு மின்காந்த
அலைவரிசையிலும் 200 டிகிரியாக இருந்தால் வேறு அலைவரிசையிலும் கதிர்வீசும்.
இப்படி வீசும் கதிர்கள் ஏறக்குறைய 425 டிகிரி சென்டிகிரேட் வரை நாம் காணும் ஒளி அலைவரிசைகளில் இருப்பதில்லை. அதனால்தான் அவை கருப்பாகத்தெரிகின்றன. இதற்குமேல் வெப்பமாக இருந்தால் சிகப்பு, நீலம் வெள்ளை என அவை பல ஒளிகளையும் வீசும். இக்கதிர்வீச்சை கரும்பொதி கதிர்வீச்சு என்பர். இதனால் என்ன பயன்?
இக்கரும்பொதி கதிர்வீச்சு இப்பொதி எதனால் ஆனது என்பதை சார்ந்தில்லை. அதன் மற்ற எந்த இயல்பியல் தமையிலும் சார்ந்தில்லை. அப்பொதியின் வெப்பத்தைமட்டுமே சார்ந்துள்ளது.

இப்படி வெப்பத்தை மட்டுமே சார்ந்த ஒரு கரும் பொதியின் கதிர்வீச்சின் அலைப் பரப்பை சரியாக கணக்கிட ஒரு கோட்பாடுதேவையாக இருந்தது. 1900 ஆம் ஆண்டில் மக்ஸ் ப்ளான்க் என்ற இயல்பியலாளர் முதன்முதலில் குவாண்டம்
கோட்பாட்டை இதை விளக்க பயன்படுத்தினார். பின்பு ஐன்ஸ்டைன் அக்கொள்கையை அனைத்து மின்காந்தகதிர்களுக்கும் பொதுமைப்படுத்தியதால் குவாண்டம் கோட்பாடு உதித்தது.

இதற்கும் நம் அண்டத்துக்கும் என்ன தொடர்பு?
அண்டம் என்பது ஆதியில் ஒரு கால-வெளி தனிப்புள்ளியாகத் தோன்றியது என்பது இயல்பியல் கருதுகோள். அப்புள்ளியில் அண்டத்தில் வெறும் சக்திதான் இருந்தது. பின்பு நடந்த பெருவெடிப்பில் அந்தப்புள்ளி விரிவடைந்து வெளியும் காலமும் பிரிந்தன. அப்போதும் அண்டத்தினுள்ளே வெறும் சக்திதான். ஒரு பலூன் போல ஊதிப் பெருகிய அண்டம் ஆதியில் இருந்த பெரும் வெப்பத்திலிருந்து பொருளாகவும், கதிர்வீச்சாகவும் பிரிந்தது. இப்படி விரிவடந்து கொண்டே வரும் அண்டத்தில் கதிர்வீச்சு குளிர்ந்து கொண்டே வருகிறது. பொருளோ எனில் வெளியில் புகையாகவும், விண்மீன்களாகவும், மீன்கூட்டங்களாகவும், மின்தொகுதிகளாகவும் மாறுகிறது.

விண்மீன் கள் உருவாகும் இந்த மாற்றம் பெரு வெடிப்பு நடந்து 200 மில்லியன் ஆண்டுகள் கழித்து நடக்கிறது. அதற்குமுன்னே பெருவெடிப்பின் பின் 380000 ஆண்டுகள் வரை குளிர்ந்துகொண்டே வரும் ஒரு கரும்பொதியப் போன்றே அண்டம் இருந்தது என்பது ஒரு கருதுகோள். (அப்பாடா, கரும்பொதிகளை கொண்டுவந்து சேர்த்தாச்சு) இப்படி அண்டம் ஒருகரும்பொதியாக மின்காந்த அலைகளில் இப்போதும் கதிர்வீச்சிக்கொண்டிருந்தால் நாம் அக்கதிர்வீச்சைப்பார்க்க
முடியவேண்டுமல்லவா? இப்போதும் பார்க்கலாம். விண்வெளியை நோக்கி ஒரு மின்காந்த கதிர்வீச்சு உணர்பொறியைத் திருப்பினால் நாம் இக்கதிர்வீச்சு எப்படி நம் அண்டத்தின் பின்புலத்தில் பரவி இருக்கிறது என்பதை அளக்கலாம்.

அப்படி அளந்தபோதுதான் இயல்பியலாளர்கள் ஒரு அதிசயத்தைக்கண்டார்கள். அதாவது அண்டம் இயல்பாக ஆதியிலிருந்து விரிவடைந்துகொண்டிருந்தால் இந்த கதிர்வீச்சு எல்லாத் திசைகளிலும் சமமான அளவுடன் இருக்கவேண்டுமல்லவா? இந்த கதிர்வீச்சு அண்டம் குளிர்ந்து உள்ளதால் நுண் அலை வரிசைகளில் வீசுகிறது. இந்த நுண் அலைவரிசை கதிர்வீச்சு அண்டத்தில்
திசைச் சீரற்று பரவி இருக்கிறது. இதை 'அண்டப் பின்புலத்தின் திசைச் சீரற்ற நுண் அலைப் பரவல்' என்று இயல்பியலாளர் அழைக்கிறார்கள். இது ஏன் இப்படி இருக்கிறது என்பதை விளக்க கருதுகோள்கள் உள்ளன.
இந்த கதிர்வீச்சை அளக்க ஒரு செயற்கைக்கோளை வடிவமைத்து ஏவி அண்டத்தில் கதிர்வீச்சுப்பரவலை சிறப்பாக அளந்து தேர்ந்ததால் இயல்பியலாளர்கள் இருவரும் இந்த வருடத்தின் நொபல் பரிசு பெறுகின்றனர்.

இயல்பியலின் சோதனை அளவிடல் வெற்றிபெறும் இன்னொரு காட்சி. கொண்டாடுவோம்.

அனைத்துப் படங்களுக்கும் நன்றி: நொபல் இணையத்தளம்.
(pictures copyright info @ nobelprize.org website )

ஆங்கில இணைச் சொற்கள்:
------------------------
ஜான் மாதெர்: John C. Mather
நாசா கோடார்ட் வெளிப்பறப்பு மைய்யம்: NASA Goddard Space Flight Center
Greenbelt, MD, USA

ஜோர்ஜ் ஸ்மூட்: George F. Smoot
கலிபோர்னியா பெர்க்கிலி பல்கலை: University of California
Berkeley, CA, USA

அண்டப் பின்புல நுண் அலைக்கதிவீச்சு: cosmic microwave background radiation
திசைச்சீரற்று: anisotropic

கரும்பொதிவு: blackbody

Fields Medal -2006

2006-08-23T16:27:00.000+05:30

2006 ஆம் வருடத்திற்கான கணிதத் துறைப் பரிசுகள் அகிலஉலக கணித கூட்டமைப்பால் (International Mathematical Union) அறிவிக்கப்பட்டுள்ளன.
நான்கு ஆண்டுகளுக்கு ஒருமுறை உலக அளவில் தேர்வுசெய்யப்பட்டு அளிக்கப்படும், ஃபீல்ட்ஸ் மெடல் (Fields Medal) எனும் இப்பரிசு கணிதத்தின் நோபல் என கருதப்படுகிறது.

இதில் கிரிகோரி பெரல்மான் கணிதத்தில் மிகமுக்கியமாக கருதப்படும் நூறாண்டுகளுக்குமேல் தீர்க்கவியலாததாக இருந்த போன்காரெ யூகமுடிபு (Poincare Conjecture) க்கு தீர்வுகண்டவர் என போற்றப்படுகிறார். அவரைப்பற்றி ஒரு நல்ல கட்டுரையை இங்கே விக்கிபீடியாவில் காணலாம்.

கீழ்க்கண்டவர்கள் பரிசுபெறுவோர்:

1. அந்த்ரெய் ஒகுன்கோவ் (பெர்க்லி பல்கலை, அமெரிகா)
2. க்ரிகோரி பெரல்மான் (ஸ்டெக்லாவ் பல்கலை- தற்போது எப்பணியிலும் இல்லை, ரஷ்யா)
3. டெரன்ஸ் டஒ (யூக்லா, அமெரிகா)
4. வெண்டெலின் வெர்னெர் (பாரிஸ் பல்கலை, பிரான்சு)

பெரல்மான் பற்றி முன்னொருகாலத்தில் நான் எழுத ஆரம்பித்து தொடராமல் போனது இங்கே. அல்லது இங்கே :-( .

-----
-

கூகுள் செயலிகள் - 3

2006-08-21T01:41:00.000+05:30

இப்படி கூகுள் இணையம் வழியாகவே நமக்கு அன்றாட வாழ்க்கைக்குத் தேவையான (!?) அனைத்துச் செயலிகளையும் வழங்க முற்படுகிறது. அதுவும் இலவசமாக. நிறைய கணினிச் செயலுறுப்புகளைக்கொண்ட பெரும் கணினிப் பண்ணைகள் அமைத்து அவற்றில் இருந்து இச்செயலிகள் நமக்கு வழங்கப்படுகின்றன. இத்தகைய கணினிப் பண்ணைகளை கூகுள் உலகில் பல இடங்களில் வழங்கிகளாக நிறுவி இருக்கிறது. இந்தியாவிலும் இத்தகை ஒரு பண்ணையை கூகுள் விரைவில் நிறுவ இருக்கிறது. இப்பண்ணைகள் இணையத்தின் ஒருபகுதியாகவும் இருக்கின்றன. ஆதலால் இணையத்தில் நாம் உலவும் போது நம் அடையாளங்களுடன் நம்மைப்பற்றிய தரவுகள் அனைத்தையும் கூகுள் நொடியில் கோர்த்துவிடலாம். இவை நமது இணையச் செயல்பாடுகளை கண்காணிக்க உதவும் கருவிகளாகவும் அரசுகளினால் பயன்படுத்தப் படலாம். உதாரணமாக அமெரிக்கா/இங்கிலாந்தில் தவிர்க்கப்பட்ட சமீபத்திய பயங்கரவாத வான் வெடிப்புகள் பற்றி இணையத்தில் கிடைக்கும் தகவல்களைக்கொண்டே அவர்களால் அதச் செய்ய இயலும் என அரசுகள் கணிக்கின்றன. சந்தேகத்துக்குரிய அத்தகைய நபர்களை அவர்கள் இணையத்தில் உலவும் தளங்கள், அவற்றில் இருந்து பெறும் தகவல்கள் இவற்றை அரசுகள் கூகுள் இடமிருந்து பெறலாம். கெட்டவர்களுக்குத்தான் இதைப்பற்றிய கவலை எல்லாம் ஆகவே பொதுவாக நாம் நிம்மதியாக இருக்கலாம்.

ஒருபக்கம் தேடுபொறி அமைப்பைச் செம்மைப்படுத்துவதிலும் மறுபுறம் மேலும் மேலும் பயன்படு செயலிகளை அனைவருக்கும் அளித்து அனைவரையும் பயனாளராக்கி அவர்களது தரவுகளை தன்வயமாக்குவதிலும் இன்னொருபுறம் மாபெரும் கணினிப்பண்ணைகள் நிறுவி இணையக் கட்டமைப்பின் இன்றியமையாப் பகுதியாக தன்னை ஆக்குவதிலும் இப்படி அனைத்து வழிகளிலும் கூகுள் தவிர்க்க இயலாத பொதுமக்கள் தரவுக் காவலனாக மாறிக்கொண்டிருக்கிறது. 'Dont be evil' என்பது கூகிளின் (மைக்ரோசாப்ட் நிறுவனத்தை திறமூல நிரலாளர்கள் அப்படித்தான் அழைப்பார்கள்) உயிர்மூச்சான மந்திரம். அப்படியா இல்லையா என்று சில வருடங்களில் தெரியும்.